៤៥២. ភូរិបញ្ញជាតកំ (១៤)

១៤៥. សច្ចំ កិរ ត្វំ អបិ [ត្វម្បិ (សី.), តុវម្បិ (ស្យា.), ត្វំ អសិ (ក.)] ភូរិបញ្ញ, យា តាទិសី សីរិ ធិតី មតី ច;

ន តាយតេភាវវសូបនិតំ, យោ យវកំ ភុញ្ជសិ អប្បសូបំ.

១៤៦. សុខំ ទុក្ខេន បរិបាចយន្តោ, កាលា កាលំ វិចិនំ ឆន្ទឆន្នោ;

អត្ថស្ស ទ្វារានិ អវាបុរន្តោ, តេនាហំ តុស្សាមិ យវោទនេន.

១៤៧. កាលញ្ច ញត្វា អភិជីហនាយ, មន្តេហិ អត្ថំ បរិបាចយិត្វា;

វិជម្ភិស្សំ សីហវិជម្ភិតានិ, តាយិទ្ធិយា ទក្ខសិ មំ បុនាបិ.

១៤៨. សុខីបិ ហេកេ [សុខី ហិ ឯកេ (សី.), សុខីតិ ហេកេ (?)] ន ករោន្តិ បាបំ, អវណ្ណសំសគ្គភយា បុនេកេ;

បហូ សមានោ វិបុលត្ថចិន្តី, កិំការណា មេ ន ករោសិ ទុក្ខំ.

១៤៩. ន បណ្ឌិតា អត្តសុខស្ស ហេតុ, បាបានិ កម្មានិ សមាចរន្តិ;

ទុក្ខេន ផុដ្ឋា ខលិតាបិ សន្តា, ឆន្ទា ច ទោសា ន ជហន្តិ ធម្មំ.

១៥០. យេន កេនចិ វណ្ណេន, មុទុនា ទារុណេន វា;

ឧទ្ធរេ ទីនមត្តានំ, បច្ឆា ធម្មំ សមាចរេ.

១៥១. យស្ស រុក្ខស្ស ឆាយាយ, និសីទេយ្យ សយេយ្យ វា;

ន តស្ស សាខំ ភញ្ជេយ្យ, មិត្តទុព្ភោ ហិ បាបកោ.

១៥២. យស្សាបិ [យស្ស ហិ (សី. ក.)] ធម្មំ បុរិសោ [មនុជោ (សី.)] វិជញ្ញា, យេ ចស្ស កង្ខំ វិនយន្តិ សន្តោ;

តំ ហិស្ស ទីបញ្ច បរាយនញ្ច, ន តេន មេត្តិំ ជរយេថ បញ្ញោ.

១៥៣. អលសោ គិហី កាមភោគី ន សាធុ, អសញ្ញតោ បព្ពជិតោ ន សាធុ;

រាជា ន សាធុ អនិសម្មការី, យោ បណ្ឌិតោ កោធនោ តំ ន សាធុ.

១៥៤. និសម្ម ខត្តិយោ កយិរា, នានិសម្ម ទិសម្បតិ;

និសម្មការិនោ រាជ, យសោ កិត្តិ ច វឌ្ឍតីតិ.

ភូរិបញ្ញជាតកំ ចុទ្ទសមំ.