៤៥១. ចក្កវាកជាតកំ (១៣)

១៣៥. វណ្ណវា អភិរូបោសិ, ឃនោ សញ្ជាតរោហិតោ;

ចក្កវាក សុរូបោសិ, វិប្បសន្នមុខិន្ទ្រិយោ.

១៣៦. បាឋីនំ បាវុសំ មច្ឆំ, ពលជំ [វាលជំ (សី. បី.), ពលជ្ជំ (ស្យា.)] មុញ្ជរោហិតំ;

គង្គាយ តីរេ និសិន្នោ [គង្គាតីរេ និសិន្នោសិ (ស្យា. ក.)], ឯវំ ភុញ្ជសិ ភោជនំ.

១៣៧. ន វាហមេតំ [សព្ពត្ថបិ សមានំ] ភុញ្ជាមិ, ជង្គលានោទកានិ វា;

អញ្ញត្រ សេវាលបណកា, ឯតំ [អញ្ញំ (ស្យា.)] មេ សម្ម ភោជនំ.

១៣៨. ន វាហមេតំ សទ្ទហាមិ, ចក្កវាកស្ស ភោជនំ;

អហម្បិ សម្ម ភុញ្ជាមិ, គាមេ លោណិយតេលិយំ.

១៣៩. មនុស្សេសុ កតំ ភត្តំ, សុចិំ មំសូបសេចនំ;

ន ច មេ តាទិសោ វណ្ណោ, ចក្កវាក យថា តុវំ.

១៤០. សម្បស្សំ អត្តនិ វេរំ, ហិំសយំ [ហិំសាយ (ស្យា. បី. ក.)] មានុសិំ បជំ;

ឧត្រស្តោ ឃសសី ភីតោ, តេន វណ្ណោ តវេទិសោ.

១៤១. សព្ពលោកវិរុទ្ធោសិ, ធង្ក បាបេន កម្មុនា;

លទ្ធោ បិណ្ឌោ ន បីណេតិ, តេន វណ្ណោ តវេទិសោ.

១៤២. អហម្បិ [អហញ្ច (?)] សម្ម ភុញ្ជាមិ, អហិំសំ សព្ពបាណិនំ;

អប្បោស្សុក្កោ និរាសង្កី, អសោកោ អកុតោភយោ.

១៤៣. សោ ករស្សុ អានុភាវំ, វីតិវត្តស្សុ សីលិយំ;

អហិំសាយ ចរ លោកេ, បិយោ ហោហិសិ មំមិវ.

១៤៤. យោ ន ហន្តិ ន ឃាតេតិ, ន ជិនាតិ ន ជាបយេ;

មេត្តំសោ សព្ពភូតេសុ, វេរំ តស្ស ន កេនចីតិ.

ចក្កវាកជាតកំ តេរសមំ.