៤៥០. ពិលារកោសិយជាតកំ (១២)

១២៥. អបចន្តាបិ ទិច្ឆន្តិ, សន្តោ លទ្ធាន ភោជនំ;

កិមេវ ត្វំ បចមានោ, យំ ន ទជ្ជា ន តំ សមំ.

១២៦. មច្ឆេរា ច បមាទា ច, ឯវំ ទានំ ន ទិយ្យតិ;

បុញ្ញំ អាកង្ខមានេន, ទេយ្យំ ហោតិ វិជានតា.

១២៧. យស្សេវ ភីតោ ន ទទាតិ មច្ឆរី, តទេវាទទតោ ភយំ;

ជិឃច្ឆា ច បិបាសា ច, យស្ស ភាយតិ មច្ឆរី;

តមេវ ពាលំ ផុសតិ, អស្មិំ លោកេ បរម្ហិ ច.

១២៨. តស្មា វិនេយ្យ មច្ឆេរំ, ទជ្ជា ទានំ មលាភិភូ;

បុញ្ញានិ បរលោកស្មិំ, បតិដ្ឋា ហោន្តិ បាណិនំ.

១២៩. ទុទ្ទទំ ទទមានានំ, ទុក្ករំ កម្ម កុព្ពតំ;

អសន្តោ នានុកុព្ពន្តិ, សតំ ធម្មោ ទុរន្នយោ.

១៣០. តស្មា សតញ្ច អសតំ [អសតញ្ច (សី. ស្យា. បី.)], នានា ហោតិ ឥតោ គតិ;

អសន្តោ និរយំ យន្តិ, សន្តោ សគ្គបរាយនា.

១៣១. អប្បស្មេកេ [អប្បម្បេកេ (ស្យា.)] បវេច្ឆន្តិ, ពហុនេកេ ន ទិច្ឆរេ;

អប្បស្មា ទក្ខិណា ទិន្នា, សហស្សេន សមំ មិតា.

១៣២. ធម្មំ ចរេ យោបិ សមុញ្ឆកំ ចរេ, ទារញ្ច បោសំ ទទមប្បកស្មិំ [ទទំ អប្បកស្មិបិ (បី.)];

សតំ សហស្សានំ សហស្សយាគិនំ, កលម្បិ នាគ្ឃន្តិ តថាវិធស្ស តេ.

១៣៣. កេនេស យញ្ញោ វិបុលោ មហគ្ឃតោ [មហគ្គតោ (សំ. និ. ១.៣២)], សមេន ទិន្នស្ស ន អគ្ឃមេតិ;

កថំ សតំ សហស្សានំ [កថំ សហស្សានំ (សី. ស្យា. បី.)] សហស្សយាគិនំ, កលម្បិ នាគ្ឃន្តិ តថាវិធស្ស តេ.

១៣៤. ទទន្តិ ហេកេ វិសមេ និវិដ្ឋា, ឆេត្វា [ឈត្វា (សី. បី.), ឃត្វា (ស្យា.)] វធិត្វា អថ សោចយិត្វា;

សា ទក្ខិណា អស្សុមុខា សទណ្ឌា, សមេន ទិន្នស្ស ន អគ្ឃមេតិ;

ឯវំ សតំ សហស្សានំ [ឯវំ សហស្សានំ (សី. ស្យា. បី.)] សហស្សយាគិនំ, កលម្បិ នាគ្ឃន្តិ តថាវិធស្ស តេតិ.

ពិលារកោសិយជាតកំ ទ្វាទសមំ.