៤៤៩. មដ្ឋកុណ្ឌលីជាតកំ (១១)

១១៥. អលង្កតោ មដ្ឋកុណ្ឌលី [មដ្ដកុណ្ឌលី (សី. បី.)], មាលធារី [មាលភារី (សី. បី.)] ហរិចន្ទនុស្សទោ;

ពាហា បគ្គយ្ហ កន្ទសិ, វនមជ្ឈេ កិំ ទុក្ខិតោ តុវំ.

១១៦. សោវណ្ណមយោ បភស្សរោ, ឧប្បន្នោ រថបញ្ជរោ មម;

តស្ស ចក្កយុគំ ន វិន្ទាមិ, តេន ទុក្ខេន ជហាមិ ជីវិតំ.

១១៧. សោវណ្ណមយំ មណីមយំ, លោហមយំ អថ រូបិយាមយំ;

[អាចិក្ខ មេ ភទ្ទមាណវ (វិ. វ. ១២០៩)] បាវទ រថំ ករិស្សាមិ [ការយាមិ (សី. បី.)] តេ [អាចិក្ខ មេ ភទ្ទមាណវ (វិ. វ. ១២០៩)], ចក្កយុគំ បដិបាទយាមិ តំ.

១១៨. សោ [អថ (ស្យា.)] មាណវោ តស្ស បាវទិ, ចន្ទិមសូរិយា [ចន្ទិមសូរិយា (ស្យា.)] ឧភយេត្ថ ភាតរោ [ទិស្សរេ (វិ. វ. ១២១០)];

សោវណ្ណមយោ រថោ មម, តេន ចក្កយុគេន សោភតិ.

១១៩. ពាលោ ខោ ត្វំសិ មាណវ, យោ ត្វំ បត្ថយសេ អបត្ថិយំ;

មញ្ញាមិ តុវំ មរិស្សសិ, ន ហិ ត្វំ លច្ឆសិ ចន្ទសូរិយេ.

១២០. គមនាគមនម្បិ ទិស្សតិ, វណ្ណធាតុ ឧភយេត្ថ វីថិយោ;

បេតោ បន នេវ ទិស្សតិ, កោ នុ ខោ [កោ និធ (វិ. វ. ១២១២)] កន្ទតំ ពាល្យតរោ.

១២១. សច្ចំ ខោ វទេសិ មាណវ, អហមេវ កន្ទតំ ពាល្យតរោ;

ចន្ទំ វិយ ទារកោ រុទំ, បេតំ កាលកតាភិបត្ថយេ.

១២២. អាទិត្តំ វត មំ សន្តំ, ឃតសិត្តំវ បាវកំ;

វារិនា វិយ ឱសិញ្ចំ, សព្ពំ និព្ពាបយេ ទរំ.

១២៣. អព្ពហី [អព្ពុហិ (ស្យា.), អព្ភុឡ្ហំ (ក.)] វត មេ សល្លំ, យមាសិ ហទយស្សិតំ [សោកំ ហទយនិស្សិតំ (វិ. វ. ១២១៥)];

យោ មេ សោកបរេតស្ស, បុត្តសោកំ អបានុទិ.

១២៤. សោហំ អព្ពូឡ្ហសល្លោស្មិ, វីតសោកោ អនាវិលោ;

ន សោចាមិ ន រោទាមិ, តវ សុត្វាន មាណវាតិ.

មដ្ឋកុណ្ឌលីជាតកំ ឯកាទសមំ.