៤៤៨. កុក្កុដជាតកំ (១០)

១០៤. នាស្មសេ កតបាបម្ហិ, នាស្មសេ អលិកវាទិនេ;

នាស្មសេ អត្តត្ថបញ្ញម្ហិ, អតិសន្តេបិ នាស្មសេ.

១០៥. ភវន្តិ ហេកេ បុរិសា, គោបិបាសិកជាតិកា [គោបិបាសកជាតិកា (សី. ស្យា. បី.)];

ឃសន្តិ មញ្ញេ មិត្តានិ, វាចាយ ន ច កម្មុនា.

១០៦. សុក្ខញ្ជលិបគ្គហិតា, វាចាយ បលិគុណ្ឋិតា;

មនុស្សផេគ្គូ នាសីទេ, យស្មិំ នត្ថិ កតញ្ញុតា.

១០៧. ន ហិ អញ្ញញ្ញចិត្តានំ, ឥត្ថីនំ បុរិសាន វា;

នានាវិកត្វា [នានាវ កត្វា (សី. បី.)] សំសគ្គំ, តាទិសម្បិ ច នាស្មសេ [តាទិសម្បិ ន វិស្សសេ (ស្យា.)].

១០៨. អនរិយកម្មមោក្កន្តំ, អថេតំ [អត្ថេតំ (សី. ស្យា. បី.)] សព្ពឃាតិនំ;

និសិតំវ បដិច្ឆន្នំ, តាទិសម្បិ ច នាស្មសេ.

១០៩. មិត្តរូបេនិធេកច្ចេ, សាខល្យេន អចេតសា;

វិវិធេហិ ឧបាយន្តិ, តាទិសម្បិ ច នាស្មសេ.

១១០. អាមិសំ វា ធនំ វាបិ, យត្ថ បស្សតិ តាទិសោ;

ទុព្ភិំ ករោតិ ទុម្មេធោ, តញ្ច ហន្ត្វាន [ឈាត្វាន (សី. បី.), ហិត្វាន (ស្យា.)] គច្ឆតិ.

១១១. មិត្តរូបេន ពហវោ, ឆន្នា សេវន្តិ សត្តវោ;

ជហេ កាបុរិសេ ហេតេ, កុក្កុដោ វិយ សេនកំ.

១១២. យោ ច [យោធ (ជា. ១.៨.២៥ សុលសាជាតកេ)] ឧប្បតិតំ អត្ថំ, ន ខិប្បមនុពុជ្ឈតិ;

អមិត្តវសមន្វេតិ, បច្ឆា ច អនុតប្បតិ.

១១៣. យោ ច ឧប្បតិតំ អត្ថំ, ខិប្បមេវ និពោធតិ;

មុច្ចតេ សត្តុសម្ពាធា, កុក្កុដោ វិយ សេនកា;

១១៤. តំ តាទិសំ កូដមិវោឌ្ឌិតំ វនេ, អធម្មិកំ និច្ចវិធំសការិនំ;

អារា វិវជ្ជេយ្យ នរោ វិចក្ខណោ, សេនំ យថា កុក្កុដោ វំសកាននេតិ.

កុក្កុដជាតកំ ទសមំ.