៤៤៥. និគ្រោធជាតកំ (៧)

៧២. ន វាហមេតំ [ន ចាហមេតំ (សី.)] ជានាមិ, កោ វាយំ កស្ស វាតិ វា [ចាតិ វា (សី.)];

យថា សាខោ ចរិ [វទី (សី. ស្យា. បី.)] ឯវំ, និគ្រោធ កិន្តិ មញ្ញសិ.

៧៣. តតោ គលវិនីតេន, បុរិសា នីហរិំសុ មំ;

ទត្វា មុខបហារានិ, សាខស្ស វចនំករា.

៧៤. ឯតាទិសំ ទុម្មតិនា, អកតញ្ញុន ទុព្ភិនា;

កតំ អនរិយំ សាខេន, សខិនា តេ ជនាធិប.

៧៥. ន វាហមេតំ ជានាមិ, នបិ មេ កោចិ សំសតិ;

យំ មេ ត្វំ សម្ម អក្ខាសិ, សាខេន ការណំ [កឌ្ឍនំ (សី. ស្យា.)] កតំ.

៧៦. សខីនំ សាជីវករោ, មម សាខស្ស ចូភយំ;

ត្វំ នោសិស្សរិយំ ទាតា, មនុស្សេសុ មហន្តតំ;

តយាមា លព្ភិតា ឥទ្ធី, ឯត្ថ មេ នត្ថិ សំសយោ.

៧៧. យថាបិ ពីជមគ្គិម្ហិ, ឌយ្ហតិ ន វិរូហតិ;

ឯវំ កតំ អសប្បុរិសេ, នស្សតិ ន វិរូហតិ.

៧៨. កតញ្ញុម្ហិ ច បោសម្ហិ, សីលវន្តេ អរិយវុត្តិនេ;

សុខេត្តេ វិយ ពីជានិ, កតំ តម្ហិ ន នស្សតិ.

៧៩. ឥមំ ជម្មំ នេកតិកំ, អសប្បុរិសចិន្តកំ;

ហនន្តុ សាខំ សត្តីហិ, នាស្ស ឥច្ឆាមិ ជីវិតំ.

៨០. ខមតស្ស មហារាជ, បាណា ន បដិអានយា [ទុប្បដិអានយា (សី. ស្យា. បី.)];

ខម ទេវ អសប្បុរិសស្ស, នាស្ស ឥច្ឆាមហំ វធំ.

៨១. និគ្រោធមេវ សេវេយ្យ, ន សាខមុបសំវសេ;

និគ្រោធស្មិំ មតំ សេយ្យោ, យញ្ចេ សាខស្មិ ជីវិតន្តិ.

និគ្រោធជាតកំ សត្តមំ.