៤៤៦. តក្កលជាតកំ (៨)

៨២. ន តក្កលា សន្តិ ន អាលុវានិ [អាលុបានិ (សី. ស្យា. បី.)], ន ពិឡាលិយោ ន កឡម្ពានិ តាត;

ឯកោ អរញ្ញម្ហិ សុសានមជ្ឈេ, កិមត្ថិកោ តាត ខណាសិ កាសុំ.

៨៣. បិតាមហោ តាត សុទុព្ពលោ តេ, អនេកព្យាធីហិ ទុខេន ផុដ្ឋោ;

តមជ្ជហំ និខណិស្សាមិ សោព្ភេ, ន ហិស្ស តំ ជីវិតំ រោចយាមិ.

៨៤. សង្កប្បមេតំ បដិលទ្ធ បាបកំ, អច្ចាហិតំ កម្ម ករោសិ លុទ្ទំ;

មយាបិ តាត បដិលច្ឆសេ តុវំ, ឯតាទិសំ កម្ម ជរូបនីតោ;

តំ កុល្លវត្តំ អនុវត្តមានោ, អហម្បិ តំ និខណិស្សាមិ សោព្ភេ.

៨៥. ផរុសាហិ វាចាហិ បកុព្ពមានោ, អាសជ្ជ មំ ត្វំ វទសេ កុមារ;

បុត្តោ មមំ ឱរសកោ សមានោ, អហិតានុកម្បី មម ត្វំសិ បុត្ត.

៨៦. ន តាហំ [ត្យាហំ (ស្យា.)] តាត អហិតានុកម្បី, ហិតានុកម្បី តេ អហម្បិ [អហញ្ហិ (ស្យា.)] តាត;

បាបញ្ច តំ កម្ម បកុព្ពមានំ, អរហាមិ នោ វារយិតុំ តតោ.

៨៧. យោ មាតរំ វា បិតរំ សវិដ្ឋ [មាតរំ បិតរំ វា វសិដ្ឋ (សី. បី.)], អទូសកេ ហិំសតិ បាបធម្មោ;

កាយស្ស ភេទា អភិសម្បរាយំ, អសំសយំ សោ និរយំ ឧបេតិ [បរេតិ (សី. បី.)].

៨៨. យោ មាតរំ វា បិតរំ សវិដ្ឋ, អន្នេន បានេន ឧបដ្ឋហាតិ;

កាយស្ស ភេទា អភិសម្បរាយំ, អសំសយំ សោ សុគតិំ ឧបេតិ.

៨៩. ន មេ ត្វំ បុត្ត អហិតានុកម្បី, ហិតានុកម្បី មេ [មម (?)] ត្វំសិ បុត្ត;

អហញ្ច តំ មាតរា វុច្ចមានោ, ឯតាទិសំ កម្ម ករោមិ លុទ្ទំ.

៩០. យា តេ សា ភរិយា អនរិយរូបា, មាតា មមេសា សកិយា ជនេត្តិ;

និទ្ធាបយេ [និទ្ធាមសេ (បី.)] តញ្ច សកា អគារា, អញ្ញម្បិ តេ សា ទុខមាវហេយ្យ.

៩១. យា តេ សា ភរិយា អនរិយរូបា, មាតា មមេសា សកិយា ជនេត្តិ;

ទន្តា ករេណូវ វសូបនីតា, សា បាបធម្មា បុនរាវជាតូតិ.

តក្កលជាតកំ អដ្ឋមំ.