៤៤៤. កណ្ហទីបាយនជាតកំ (៦)

៦២. សត្តាហមេវាហំ បសន្នចិត្តោ, បុញ្ញត្ថិកោ អាចរិំ [អចរិំ (សី. ស្យា. បី.)] ព្រហ្មចរិយំ;

អថាបរំ យំ ចរិតំ មមេទំ [មម យិទំ (ស្យា.), មមាយិទំ (បី.)], វស្សានិ បញ្ញាស សមាធិកានិ;

អកាមកោ វាបិ [វាហិ (បី. ក.)] អហំ ចរាមិ, ឯតេន សច្ចេន សុវត្ថិ ហោតុ;

ហតំ វិសំ ជីវតុ យញ្ញទត្តោ.

៦៣. យស្មា ទានំ នាភិនន្ទិំ កទាចិ, ទិស្វានហំ អតិថិំ វាសកាលេ;

ន ចាបិ មេ អប្បិយតំ អវេទុំ, ពហុស្សុតា សមណព្រាហ្មណា ច.

អកាមកោ វាបិ អហំ ទទាមិ, ឯតេន សច្ចេន សុវត្ថិ ហោតុ;

ហតំ វិសំ ជីវតុ យញ្ញទត្តោ.

៦៤. អាសីវិសោ តាត បហូតតេជោ, យោ តំ អទំសី [អឌំសី (ស្យា.)] សចរា [ពិលរា (សី.), បិឡារា (ស្យា.), បតរា (បី.)] ឧទិច្ច;

តស្មិញ្ច មេ អប្បិយតាយ អជ្ជ, បិតរិ ច តេ នត្ថិ កោចិ វិសេសោ;

ឯតេន សច្ចេន សុវត្ថិ ហោតុ, ហតំ វិសំ ជីវតុ យញ្ញទត្តោ.

៦៥. សន្តា ទន្តាយេវ [ទន្តា សន្តា យេ ច (ស្យា. ក.)] បរិព្ពជន្តិ, អញ្ញត្រ កណ្ហា នត្ថាកាមរូបា [អនកាមរូបា (សី. ស្យា. បី.)];

ទីបាយន កិស្ស ជិគុច្ឆមានោ, អកាមកោ ចរសិ ព្រហ្មចរិយំ.

៦៦. សទ្ធាយ និក្ខម្ម បុនំ និវត្តោ, សោ ឯឡមូគោវ ពាលោ [ឯឡមូគោ ចបលោ (ស្យា. ក.)] វតាយំ;

ឯតស្ស វាទស្ស ជិគុច្ឆមានោ, អកាមកោ ចរាមិ ព្រហ្មចរិយំ;

វិញ្ញុប្បសត្ថញ្ច សតញ្ច ឋានំ [វិញ្ញូបសត្ថំ វសិតំ ច ឋានំ (ក.)], ឯវម្បហំ បុញ្ញករោ ភវាមិ.

៦៧. សមណេ តុវំ ព្រាហ្មណេ អទ្ធិកេ ច, សន្តប្បយាសិ អន្នបានេន ភិក្ខំ;

ឱបានភូតំវ ឃរំ តវ យិទំ, អន្នេន បានេន ឧបេតរូបំ;

អថ កិស្ស វាទស្ស ជិគុច្ឆមានោ, អកាមកោ ទានមិមំ ទទាសិ.

៦៨. បិតរោ ច មេ អាសុំ បិតាមហា ច, សទ្ធា អហុំ ទានបតី វទញ្ញូ;

តំ កុល្លវត្តំ អនុវត្តមានោ, មាហំ កុលេ អន្តិមគន្ធនោ [គន្ធិនោ (ស្យា. បី. ក.), គន្ធិនី (សី.)] អហុំ;

ឯតស្ស វាទស្ស ជិគុច្ឆមានោ, អកាមកោ ទានមិមំ ទទាមិ.

៦៩. ទហរិំ កុមារិំ អសមត្ថបញ្ញំ, យំ តានយិំ ញាតិកុលា សុគត្តេ;

ន ចាបិ មេ អប្បិយតំ អវេទិ, អញ្ញត្រ កាមា បរិចារយន្តា [បរិចារយន្តី (សី. បី.)];

អថ កេន វណ្ណេន មយា តេ ភោតិ, សំវាសធម្មោ អហុ ឯវរូបោ.

៧០. អារា ទូរេ នយិធ កទាចិ អត្ថិ, បរម្បរា នាម កុលេ ឥមស្មិំ;

តំ កុល្លវត្តំ អនុវត្តមានា, មាហំ កុលេ អន្តិមគន្ធិនី អហុំ;

ឯតស្ស វាទស្ស ជិគុច្ឆមានា, អកាមិកា បទ្ធចរាម្ហិ [បដ្ឋចរាម្ហិ (ស្យា. ក.)] តុយ្ហំ.

៧១. មណ្ឌព្យ ភាសិំ យមភាសនេយ្យំ [ភាសិស្សំ អភាសនេយ្យំ (សី. ស្យា. បី.), ភាសិស្ស’មភាសនេយ្យំ (?)], តំ ខម្យតំ បុត្តកហេតុ មជ្ជ;

បុត្តបេមា ន ឥធ បរត្ថិ កិញ្ចិ, សោ នោ អយំ ជីវតិ យញ្ញទត្តោតិ.

កណ្ហទីបាយនជាតកំ [មណ្ឌព្យជាតកំ (ស្យា. ក.)] ឆដ្ឋំ.