៩. អបាយិម្ហវគ្គោ

៨១. អបាយិម្ហ អនច្ចិម្ហ, អគាយិម្ហ រុទិម្ហ ច;

វិសញ្ញិករណិំ បិត្វា [បីត្វា (សី. ស្យា. បី.)], ទិដ្ឋា នាហុម្ហ វានរាតិ.

សុរាបានជាតកំ បឋមំ.

៨២. អតិក្កម្ម រមណកំ, សទាមត្តញ្ច ទូភកំ;

ស្វាសិ បាសាណមាសីនោ, យស្មា ជីវំ ន មោក្ខសីតិ.

មិត្តវិន្ទកជាតកំ ទុតិយំ.

៨៣. មិត្តោ ហវេ សត្តបទេន ហោតិ, សហាយោ បន ទ្វាទសកេន ហោតិ;

មាសឌ្ឍមាសេន ច ញាតិ ហោតិ, តតុត្តរិំ អត្តសមោបិ ហោតិ;

សោហំ កថំ អត្តសុខស្ស ហេតុ, ចិរសន្ថុតំ [ចិរសន្ធវំ (ក.), ចិរសត្ថុនំ (បី.)] កាឡកណ្ណិំ ជហេយ្យន្តិ.

កាលកណ្ណិជាតកំ តតិយំ.

៨៤. អារោគ្យមិច្ឆេ បរមញ្ច លាភំ, សីលញ្ច វុទ្ធានុមតំ សុតញ្ច;

ធម្មានុវត្តី ច អលីនតា ច, អត្ថស្ស ទ្វារា បមុខា ឆឡេតេតិ.

អត្ថស្សទ្វារជាតកំ ចតុត្ថំ.

៨៥. អាយតិំ ទោសំ នាញ្ញាយ, យោ កាមេ បដិសេវតិ;

វិបាកន្តេ ហនន្តិ នំ, កិំបក្កមិវ ភក្ខិតន្តិ.

កិំបក្កជាតកំ បញ្ចមំ.

៨៦. សីលំ កិរេវ កល្យាណំ, សីលំ លោកេ អនុត្តរំ;

បស្ស ឃោរវិសោ នាគោ, សីលវាតិ ន ហញ្ញតីតិ.

សីលវីមំសកជាតកំ ឆដ្ឋំ.

៨៧. យស្ស មង្គលា សមូហតាសេ [សមូហតា (សី. ស្យា. បី. សុ. និ. ៣៦២], ឧប្បាតា [ឧប្បាទា (បី.)] សុបិនា ច លក្ខណា ច;

សោ [ស (សី. បី. ក.)] មង្គលទោសវីតិវត្តោ, យុគយោគាធិគតោ ន ជាតុមេតីតិ.

មង្គលជាតកំ សត្តមំ.

៨៨. កល្យាណិមេវ មុញ្ចេយ្យ, ន ហិ មុញ្ចេយ្យ បាបិកំ;

មោក្ខោ កល្យាណិយា សាធុ, មុត្វា តប្បតិ បាបិកន្តិ.

សារម្ភជាតកំ អដ្ឋមំ.

៨៩. វាចាវ កិរ តេ អាសិ, សណ្ហា សខិលភាណិនោ;

តិណមត្តេ អសជ្ជិត្ថោ, នោ ច និក្ខសតំ ហរន្តិ.

កុហកជាតកំ នវមំ.

៩០. យោ បុព្ពេ កតកល្យាណោ, កតត្ថោ នាវពុជ្ឈតិ;

បច្ឆា កិច្ចេ សមុប្បន្នេ, កត្តារំ នាធិគច្ឆតីតិ.

អកតញ្ញុជាតកំ ទសមំ.

អបាយិម្ហវគ្គោ នវមោ.

តស្សុទ្ទានំ –

អបាយិម្ហ ច ទូភកំ សត្តបទំ, ឆឡទ្វរ ច អាយតិនា ច បុន;

អហិសីលវ មង្គលិ បាបិកស្សា, សតំនិក្ខ កតត្ថវរេន ទសាតិ.