១. ឯកកនិបាតោ

១. អបណ្ណកវគ្គោ

១. អបណ្ណកជាតកំ

១. អបណ្ណកំ ឋានមេកេ, ទុតិយំ អាហុ តក្កិកា;

ឯតទញ្ញាយ មេធាវី, តំ គណ្ហេ យទបណ្ណកន្តិ [តំ គណ្ហេយ្យ អបណ្ណកំ (ក.)].

អបណ្ណកជាតកំ បឋមំ.

២. វណ្ណុបថជាតកំ

២. អកិលាសុនោ វណ្ណុបថេ [វណ្ណបថេ (ក.)] ខណន្តា, ឧទង្គណេ តត្ថ បបំ អវិន្ទុំ;

ឯវំ មុនី វីរិយ [មុនិ វិរិយ (បី.), មុនិ វីរិយ (ស្យា. ក.)] ពលូបបន្នោ, អកិលាសុ វិន្ទេ ហទយស្ស សន្តិន្តិ.

វណ្ណុបថជាតកំ ទុតិយំ.

៣. សេរិវវាណិជជាតកំ

៣. ឥធ ចេ នំ [ឥធ ចេ ហិ នំ (សី. បី.)] វិរាធេសិ, សទ្ធម្មស្ស និយាមតំ [និយាមកំ (ស្យា. ក.)];

ចិរំ ត្វំ អនុតប្បេសិ [អនុតបេស្សសិ (សី. បី.), អនុតប្បិស្សសិ (?)], សេរិវាយំវ វាណិជោតិ.

សេរិវវាណិជជាតកំ តតិយំ.

៤. ចូឡសេដ្ឋិជាតកំ

៤. អប្បកេនបិ មេធាវី, បាភតេន វិចក្ខណោ;

សមុដ្ឋាបេតិ អត្តានំ, អណុំ អគ្គិំវ សន្ធមន្តិ.

ចូឡ [ចុល្ល (សី.), ចុល្លក (ស្យា. បី.)] សេដ្ឋិជាតកំ ចតុត្ថំ.

៥. តណ្ឌុលនាឡិជាតកំ

៥. [កិមគ្ឃតី តណ្ឌុលនាឡិកា ច, ពារាណសី អន្តរពាហិរានិ; អស្សបញ្ចសតេ តានិ, ឯកា តណ្ឌុលនាឡិកាតិ; (ស្យា.)] កិមគ្ឃតិ តណ្ឌុលនាឡិកាយ, អស្សាន មូលាយ វទេហិ រាជ [នាឡិកា ច (សី.), នាឡិកាយ (ក. សី. អដ្ឋ.)];

ពារាណសិំ សន្តរពាហិរតោ [ពាហិរន្តំ (សី.)], អយមគ្ឃតិ តណ្ឌុលនាឡិកាតិ [កិមគ្ឃតី វណ្ឌុលនាឡិកា ច, ពារាណសី អន្តរពាហិរានិ; អស្សបញ្ចសតេ តានិ, ឯកា តណ្ឌុលនាឡិកាតិ; (ស្យា.)].

តណ្ឌុលនាឡិជាតកំ បញ្ចមំ.

៦. ទេវធម្មជាតកំ

៦. ហិរិឱត្តប្បសម្បន្នា, សុក្កធម្មសមាហិតា;

សន្តោ សប្បុរិសា លោកេ, ទេវធម្មាតិ វុច្ចរេតិ.

ទេវធម្មជាតកំ ឆដ្ឋំ.

៧. កដ្ឋហារិជាតកំ

៧. បុត្តោ ត្យាហំ មហារាជ, ត្វំ មំ បោស ជនាធិប;

អញ្ញេបិ ទេវោ បោសេតិ, កិញ្ច [កិញ្ចិ (ក.)] ទេវោ សកំ បជន្តិ.

កដ្ឋហារិ [កដ្ឋវាហន (ក.)] ជាតកំ សត្តមំ.

៨. គាមណិជាតកំ

៨. អបិ អតរមានានំ, ផលាសាវ សមិជ្ឈតិ;

វិបក្កព្រហ្មចរិយោស្មិ, ឯវំ ជានាហិ គាមណីតិ.

គាមណិជាតកំ អដ្ឋមំ.

៩. មឃទេវជាតកំ

៩. ឧត្តមង្គរុហា មយ្ហំ, ឥមេ ជាតា វយោហរា;

បាតុភូតា ទេវទូតា, បព្ពជ្ជាសមយោ មមាតិ.

មឃទេវ [មខាទេវ (សី. បី.), ទេវទូត (ក.)] ជាតកំ នវមំ.

១០. សុខវិហារិជាតកំ

១០. យញ្ច អញ្ញេ ន រក្ខន្តិ, យោ ច អញ្ញេ ន រក្ខតិ;

ស វេ រាជ សុខំ សេតិ, កាមេសុ អនបេក្ខវាតិ.

សុខវិហារិជាតកំ ទសមំ.

អបណ្ណកវគ្គោ បឋមោ.

តស្សុទ្ទានំ –

វរាបណ្ណក វណ្ណុបថ សេរិវរោ, សុវិចក្ខណ តណ្ឌុលនាឡិកស្សា;

ហិរិ បុត្តវរុត្តគាមណិនា, យោ ច ន រក្ខតិ តេន ទសាតិ.

២. សីលវគ្គោ

១១. លក្ខណមិគជាតកំ

១១. ហោតិ សីលវតំ អត្ថោ, បដិសន្ថារ [បដិសន្ធារ (ក.)] វុត្តិនំ;

លក្ខណំ បស្ស អាយន្តំ, ញាតិសង្ឃបុរក្ខតំ [បុរក្ខិតំ (ស្យា.), បុរេក្ខិតំ (ក.)];

អថ បស្សសិមំ កាឡំ, សុវិហីនំវ ញាតិភីតិ.

លក្ខណមិគជាតកំ បឋមំ.

១២. និគ្រោធមិគជាតកំ

១២. និគ្រោធមេវ សេវេយ្យ, ន សាខមុបសំវសេ;

និគ្រោធស្មិំ មតំ សេយ្យោ, យញ្ចេ សាខស្មិ [សាខស្មិំ (សី. បី.)] ជីវិតន្តិ.

និគ្រោធមិគជាតកំ ទុតិយំ.

១៣. កណ្ឌិជាតកំ

១៣. ធិរត្ថុ កណ្ឌិនំ សល្លំ, បុរិសំ គាឡ្ហវេធិនំ;

ធិរត្ថុ តំ ជនបទំ, យត្ថិត្ថី បរិណាយិកា;

តេ ចាបិ ធិក្កិតា [ធិក្កតា (?)] សត្តា, យេ ឥត្ថីនំ វសំគតាតិ.

កណ្ឌិជាតកំ តតិយំ.

១៤. វាតមិគជាតកំ

១៤. ន កិរត្ថិ រសេហិ បាបិយោ, អាវាសេហិ វ [វា (សព្ពត្ថ)] សន្ថវេហិ វា;

វាតមិគំ គហននិស្សិតំ [គេហនិស្សិតំ (សី. បី.)], វសមានេសិ រសេហិ សញ្ជយោតិ.

វាតមិគជាតកំ ចតុត្ថំ.

១៥. ខរាទិយជាតកំ

១៥. អដ្ឋក្ខុរំ ខរាទិយេ, មិគំ វង្កាតិវង្កិនំ;

សត្តហិ កាលាតិក្កន្តំ [សត្តហិ កលាហ’តិក្កន្តំ (សី.), សត្តកាលេហ’តិក្កន្តំ (ស្យា.), សត្តហិ កាលាហ’តិក្កន្តំ (បី.)], ន នំ ឱវទិតុស្សហេតិ.

ខរាទិយជាតកំ បញ្ចមំ.

១៦. តិបល្លត្ថមិគជាតកំ

១៦. មិគំ តិបល្លត្ថ [តិបល្លត្ត (ក.)] មនេកមាយំ, អដ្ឋក្ខុរំ អឌ្ឍរត្តាបបាយិំ [អឌ្ឍរត្តាវបាយិំ (សី. បី.)];

ឯកេន សោតេន ឆមាស្សសន្តោ, ឆហិ កលាហិតិភោតិ [កលាហតិភោតិ (សី. ស្យា. បី.)] ភាគិនេយ្យោតិ.

តិបល្លត្ថមិគជាតកំ ឆដ្ឋំ.

១៧. មាលុតជាតកំ

១៧. កាឡេ វា យទិ វា ជុណ្ហេ, យទា វាយតិ មាលុតោ;

វាតជានិ ហិ សីតានិ, ឧភោត្ថមបរាជិតាតិ.

មាលុតជាតកំ សត្តមំ.

១៨. មតកភត្តជាតកំ

១៨. ឯវំ ចេ សត្តា ជានេយ្យុំ, ទុក្ខាយំ ជាតិសម្ភវោ;

ន បាណោ បាណិនំ ហញ្ញេ, បាណឃាតី ហិ សោចតីតិ.

មតកភត្តជាតកំ អដ្ឋមំ.

១៩. អាយាចិតភត្តជាតកំ

១៩. សចេ មុច្ចេ [មុញ្ចេ (សី. ស្យា. បី.)] បេច្ច មុច្ចេ [មុញ្ចេ (សី. ស្យា. បី.)], មុច្ចមានោ ហិ ពជ្ឈតិ;

ន ហេវំ ធីរា មុច្ចន្តិ, មុត្តិ ពាលស្ស ពន្ធនន្តិ.

អាយាចិតភត្តជាតកំ នវមំ.

២០. នឡបានជាតកំ

២០. ទិស្វា បទមនុត្តិណ្ណំ, ទិស្វានោតរិតំ បទំ;

នឡេន វារិំ បិស្សាម [បិវិស្សាម (សី. ស្យា. បី.)], នេវ [ន ច (ក.)] មំ ត្វំ វធិស្សសីតិ.

នឡបានជាតកំ ទសមំ.

សីលវគ្គោ ទុតិយោ.

តស្សុទ្ទានំ –

អថ លក្ខណ សាខ ធិរត្ថុ បុន, ន កិរត្ថិ រសេហិ ខរាទិយា;

អតិភោតិ វរ [រស (សព្ពត្ថ)] មាលុត បាណ, មុច្ចេន នឡអវ្ហយនេន ភវន្តិ ទសាតិ.

៣. កុរុង្គវគ្គោ

២១. កុរុង្គមិគជាតកំ

២១. ញាតមេតំ កុរុង្គស្ស, យំ ត្វំ សេបណ្ណិ សិយ្យសិ [សេយ្យសិ (សី. ស្យា. បី.)];

អញ្ញំ សេបណ្ណិ គច្ឆាមិ, ន មេ តេ រុច្ចតេ ផលន្តិ.

កុរុង្គមិគជាតកំ បឋមំ.

២២. កុក្កុរជាតកំ

២២. យេ កុក្កុរា រាជកុលម្ហិ វទ្ធា, កោលេយ្យកា វណ្ណពលូបបន្នា;

តេមេ ន វជ្ឈា មយមស្ម វជ្ឈា, នាយំ សឃច្ចា ទុព្ពលឃាតិកាយន្តិ.

កុក្កុរជាតកំ ទុតិយំ.

២៣. គោជានីយជាតកំ

២៣. អបិ បស្សេន សេមានោ, សល្លេភិ សល្លលីកតោ;

សេយ្យោវ វឡវា គោជោ [ភោជ្ជោ (សី.), ភោជ្ឈោ (ស្យា. បី.)], យុញ្ជ មញ្ញេវ សារថីតិ.

គោជានីយ [ភោជាជានីយ (សី. ស្យា. បី.)] ជាតកំ តតិយំ.

២៤. អាជញ្ញជាតកំ

២៤. យទា យទា យត្ថ យទា, យត្ថ យត្ថ យទា យទា;

អាជញ្ញោ កុរុតេ វេគំ, ហាយន្តិ តត្ថ វាឡវាតិ.

អាជញ្ញជាតកំ ចតុត្ថំ.

២៥. តិត្ថជាតកំ

២៥. អញ្ញមញ្ញេហិ តិត្ថេហិ, អស្សំ បាយេហិ សារថិ;

អច្ចាសនស្ស បុរិសោ, បាយាសស្សបិ តប្បតីតិ.

តិត្ថជាតកំ បញ្ចមំ.

២៦. មហិឡាមុខជាតកំ

២៦. បុរាណចោរាន វចោ និសម្ម, មហិឡាមុខោ បោថយមន្វចារី;

សុសញ្ញតានញ្ហិ វចោ និសម្ម, គជុត្តមោ សព្ពគុណេសុ អដ្ឋាតិ.

មហិឡាមុខជាតកំ ឆដ្ឋំ.

២៧. អភិណ្ហជាតកំ

២៧. នាលំ កពឡំ បទាតវេ, ន ច បិណ្ឌំ ន កុសេ ន ឃំសិតុំ;

មញ្ញាមិ អភិណ្ហទស្សនា, នាគោ ស្នេហមកាសិ [សិនេហមកាសិ (សី. ស្យា. បី.)] កុក្កុរេតិ.

អភិណ្ហជាតកំ សត្តមំ.

២៨. នន្ទិវិសាលជាតកំ

២៨. មនុញ្ញមេវ ភាសេយ្យ, នាមនុញ្ញំ កុទាចនំ;

មនុញ្ញំ ភាសមានស្ស, គរុំ ភារំ ឧទទ្ធរិ;

ធនញ្ច នំ អលាភេសិ, តេន ចត្តមនោ អហូតិ.

នន្ទិវិសាលជាតកំ អដ្ឋមំ.

២៩. កណ្ហជាតកំ

២៩. យតោ យតោ គរុ ធុរំ, យតោ គម្ភីរវត្តនី;

តទាស្សុ កណ្ហំ យុញ្ជន្តិ, ស្វាស្សុ តំ វហតេ ធុរន្តិ.

កណ្ហជាតកំ នវមំ.

៣០. មុនិកជាតកំ

៣០. មា មុនិកស្ស បិហយិ, អាតុរន្នានិ ភុញ្ជតិ;

អប្បោស្សុក្កោ ភុសំ ខាទ, ឯតំ ទីឃាយុលក្ខណន្តិ.

មុនិកជាតកំ ទសមំ.

កុរុង្គវគ្គោ តតិយោ.

តស្សុទ្ទានំ –

កុរុង្គស្ស កុក្កុរគោជវរោ, បុន វាឡវស្សសិរិវ្ហយនោ [សិរិវយនោ (សព្ពត្ថ)];

មហិឡាមុខនាមនុញ្ញវរោ, វហតេ ធុរ មុនិកេន ទសាតិ.

៤. កុលាវកវគ្គោ

៣១. កុលាវកជាតកំ

៣១. កុលាវកា មាតលិ សិម្ពលិស្មិំ, ឦសាមុខេន បរិវជ្ជយស្សុ;

កាមំ ចជាម អសុរេសុ បាណំ, មា មេ ទិជា វិក្កុលវា [មាយិមេ ទិជា វិកុលាវា (សី. ស្យា. បី.)] អហេសុន្តិ.

កុលាវកជាតកំ បឋមំ.

៣២. នច្ចជាតកំ

៣២. រុទំ មនុញ្ញំ រុចិរា ច បិដ្ឋិ, វេឡុរិយវណ្ណូបនិភា [វណ្ណូបដិភា (ស្យា.), វណ្ណសន្និភា (ក.)] ច គីវា;

ព្យាមមត្តានិ ច បេខុណានិ, នច្ចេន តេ ធីតរំ នោ ទទាមីតិ.

នច្ចជាតកំ ទុតិយំ.

៣៣. សម្មោទមានជាតកំ

៣៣. សម្មោទមានា គច្ឆន្តិ, ជាលមាទាយ បក្ខិនោ;