១០. លិត្តវគ្គោ

៩១. លិត្តំ បរមេន តេជសា, គិលមក្ខំ បុរិសោ ន ពុជ្ឈតិ;

គិល រេ គិល បាបធុត្តក, បច្ឆា តេ កដុកំ ភវិស្សតីតិ.

លិត្តជាតកំ បឋមំ.

៩២. ឧក្កដ្ឋេ សូរមិច្ឆន្តិ, មន្តីសុ អកុតូហលំ;

បិយញ្ច អន្នបានម្ហិ, អត្ថេ ជាតេ ច បណ្ឌិតន្តិ.

មហាសារជាតកំ ទុតិយំ.

៩៣. ន វិស្សសេ អវិស្សត្ថេ, វិស្សត្ថេបិ ន វិស្សសេ;

វិស្សាសា ភយមន្វេតិ, សីហំវ មិគមាតុកាតិ [មិគមាតុយា (ក.)].

វិសាសភោជនជាតកំ តតិយំ.

៩៤. សោតត្តោ សោសិន្ទោ [សោសីតោ (សី. ស្យា. បី.), សោសិនោ (ក.)] ចេវ, ឯកោ ភិំសនកេ វនេ;

នគ្គោ ន ចគ្គិមាសីនោ, ឯសនាបសុតោ មុនីតិ.

លោមហំសជាតកំ ចតុត្ថំ.

៩៥. អនិច្ចា វត សង្ខារា, ឧប្បាទវយធម្មិនោ;

ឧប្បជ្ជិត្វា និរុជ្ឈន្តិ, តេសំ វូបសមោ សុខោតិ.

មហាសុទស្សនជាតកំ បញ្ចមំ.

៩៦. សមតិត្តិកំ អនវសេកំ, តេលបត្តំ យថា បរិហរេយ្យ;

ឯវំ សចិត្តមនុរក្ខេ, បត្ថយានោ ទិសំ អគតបុព្ពន្តិ.

តេលបត្តជាតកំ ឆដ្ឋំ.

៩៧. ជីវកញ្ច មតំ ទិស្វា, ធនបាលិញ្ច ទុគ្គតំ;

បន្ថកញ្ច វនេ មូឡ្ហំ, បាបកោ បុនរាគតោតិ.

នាមសិទ្ធិជាតកំ សត្តមំ.

៩៨. សាធុ ខោ បណ្ឌិតោ នាម, ន ត្វេវ អតិបណ្ឌិតោ;

អតិបណ្ឌិតេន បុត្តេន, មនម្ហិ ឧបកូឡិតោតិ [ឧបកូលិតោតិ (សី.), ឧបកុដ្ឋិតោតិ (ស្យា.), ឧបកុដិតោ (ក.)].

កូដវាណិជជាតកំ អដ្ឋមំ.

៩៩. បរោសហស្សម្បិ សមាគតានំ, កន្ទេយ្យុំ តេ វស្សសតំ អបញ្ញា;

ឯកោវ សេយ្យោ បុរិសោ សបញ្ញោ, យោ ភាសិតស្ស វិជានាតិ អត្ថន្តិ.

បរោសហស្សជាតកំ នវមំ.

១០០. អសាតំ សាតរូបេន, បិយរូបេន អប្បិយំ;

ទុក្ខំ សុខស្ស រូបេន, បមត្តមតិវត្តតីតិ.

អសាតរូបជាតកំ ទសមំ.

លិត្តវគ្គោ ទសមោ.

តស្សុទ្ទានំ –

គិលមក្ខកុតូហល មាតុកស្សា, មុនិនា ច អនិច្ចត បត្តវរំ;

ធនបាលិវរោ អតិបណ្ឌិតកោ, សបរោសហស្សអសាតទសាតិ.

មជ្ឈិមោ បណ្ណាសកោ.