១១. បរោសតវគ្គោ

១០១. បរោសតំ ចេបិ សមាគតានំ, ឈាយេយ្យុំ តេ វស្សសតំ អបញ្ញា;

ឯកោវ សេយ្យោ បុរិសោ សបញ្ញោ, យោ ភាសិតស្ស វិជានាតិ អត្ថន្តិ.

បរោសតជាតកំ បឋមំ.

១០២. យោ ទុក្ខផុដ្ឋាយ ភវេយ្យ តាណំ, សោ មេ បិតា ទុព្ភិ [ទូភិ (សី. បី.)] វនេ ករោតិ;

សា កស្ស កន្ទាមិ វនស្ស មជ្ឈេ, យោ តាយិតា សោ សហសំ [សហសា (សី. ស្យា. បី.)] ករោតីតិ.

បណ្ណិកជាតកំ ទុតិយំ.

១០៣. យត្ថ វេរី និវិសតិ [និវសតិ (សី. ក.)], ន វសេ តត្ថ បណ្ឌិតោ;

ឯករត្តំ ទិរត្តំ វា, ទុក្ខំ វសតិ វេរិសូតិ.

វេរិជាតកំ តតិយំ.

១០៤. ចតុព្ភិ អដ្ឋជ្ឈគមា, អដ្ឋាហិបិ ច សោឡស;

សោឡសាហិ ច ពាត្តិំស [ពត្តិំស (សី. ស្យា. បី.)], អត្រិច្ឆំ ចក្កមាសទោ;

ឥច្ឆាហតស្ស បោសស្ស, ចក្កំ ភមតិ មត្ថកេតិ.

មិត្តវិន្ទកជាតកំ ចតុត្ថំ.

១០៥. ពហុម្បេតំ វនេ កដ្ឋំ, វាតោ ភញ្ជតិ ទុព្ពលំ;

តស្ស ចេ ភាយសី នាគ, កិសោ នូន ភវិស្សសីតិ.

ទុព្ពលកដ្ឋជាតកំ បញ្ចមំ.

១០៦. សុខំ វត មំ ជីវន្តំ [សុខកំ វត ជីវំ (ក.)], បចមានា ឧទញ្ចនី;

ចោរី ជាយប្បវាទេន, តេលំ លោណញ្ច យាចតីតិ.

ឧទញ្ចនីជាតកំ ឆដ្ឋំ.

១០៧. សាធុ ខោ សិប្បកំ នាម, អបិ យាទិស កីទិសំ;

បស្ស ខញ្ជប្បហារេន, លទ្ធា គាមា ចតុទ្ទិសាតិ.

សាលិត្តកជាតកំ សត្តមំ.

១០៨. សិក្ខេយ្យ សិក្ខិតព្ពានិ, សន្តិ តច្ឆន្ទិនោ [សច្ឆន្ទិនោ (សី. បី.)] ជនា;

ពាហិយា ហិ [បិ (សី. ស្យា. បី.)] សុហន្នេន, រាជានមភិរាធយីតិ.

ពាហិយជាតកំ អដ្ឋមំ.

១០៩. យថន្នោ បុរិសោ ហោតិ, តថន្នា តស្ស ទេវតា;

អាហរេតំ កុណ្ឌបូវំ [កណំ បូវំ (សី. បី.)], មា មេ ភាគំ វិនាសយាតិ.

កុណ្ឌបូវជាតកំ នវមំ.

១១០. សព្ពសំហារកោ [សព្ពសាហារកោ (ក.)] នត្ថិ, សុទ្ធំ កង្គុ បវាយតិ;

អលិកំ ភាយតិយំ ធុត្តី, សច្ចមាហ មហល្លិកាតិ.

សព្ពសំហារកបញ្ហជាតកំ ទសមំ.

បរោសតវគ្គោ ឯកាទសមោ.

តស្សុទ្ទានំ –

សបរោសត តាយិត វេរី បុន, ភមចក្កថ នាគសិរិវ្ហយនោ;

សុខកញ្ច វត សិប្បក ពាហិយា, កុណ្ឌបូវ មហល្លិកកា ច ទសាតិ.