១២. ហំចិវគ្គោ

១១១. គទ្រភបញ្ហជាតកំ

១១១. ហំចិ [ហំសិ (សី. ស្យា.), ហញ្ចិ (?)] តុវំ ឯវមញ្ញសិ សេយ្យោ, បុត្តេន បិតាតិ រាជសេដ្ឋ;

ហន្ទស្សតរស្ស តេ អយំ, អស្សតរស្ស ហិ គទ្រភោ បិតាតិ.

គទ្រភបញ្ហជាតកំ បឋមំ.

១១២. អមរាទេវីបញ្ហជាតកំ

១១២. យេន សត្តុពិលង្គា ច, ទិគុណបលាសោ ច បុប្ផិតោ;

យេន ទទាមិ [យេនា’ទាមិ (សី. ស្យា.)] តេន វទាមិ, យេន ន ទទាមិ [យេន នា’ទាមិ (សី. ស្យា.)] ន តេន វទាមិ;

ឯស មគ្គោ យវមជ្ឈកស្ស, ឯតំ ឆន្នបថំ វិជានាហីតិ.

អមរាទេវីបញ្ហជាតកំ ទុតិយំ.

១១៣. សិង្គាលជាតកំ

១១៣. សទ្ទហាសិ សិង្គាលស្ស [សិគាលស្ស (សី. ស្យា. បី.)], សុរាបីតស្ស ព្រាហ្មណ;

សិប្បិកានំ សតំ នត្ថិ, កុតោ កំសសតា ទុវេតិ.

សិង្គាលជាតកំ តតិយំ.

១១៤. មិតចិន្តិជាតកំ

១១៤. ពហុចិន្តី អប្បចិន្តី, ឧភោ ជាលេ អពជ្ឈរេ;

មិតចិន្តី បមោចេសី, ឧភោ តត្ថ សមាគតាតិ.

មិតចិន្តិជាតកំ ចតុត្ថំ.

១១៥. អនុសាសិកជាតកំ

១១៥. យាយញ្ញ [យាយញ្ញេ (ក.)] មនុសាសតិ, សយំ លោលុប្បចារិនី;

សាយំ វិបក្ខិកា សេតិ, ហតា ចក្កេន សាសិកាតិ [សាលិកាតិ (សី. ស្យា. បី.)].

អនុសាសិកជាតកំ បញ្ចមំ.

១១៦. ទុព្ពចជាតកំ

១១៦. អតិករមករាចរិយ, មយ្ហម្បេតំ ន រុច្ចតិ;

ចតុត្ថេ លង្ឃយិត្វាន, បញ្ចមាយសិ អាវុតោតិ.

ទុព្ពចជាតកំ ឆដ្ឋំ.

១១៧. តិត្តិរជាតកំ

១១៧. អច្ចុគ្គតាតិលបតា [អតិពលតា (សី. ស្យា. បី.), អតិលបកា (កត្ថចិ)], អតិវេលំ បភាសិតា;

វាចា ហនតិ ទុម្មេធំ, តិត្តិរំវាតិវស្សិតន្តិ.

តិត្តិរជាតកំ សត្តមំ.

១១៨. វដ្ដកជាតកំ

១១៨. នាចិន្តយន្តោ បុរិសោ, វិសេសមធិគច្ឆតិ;

ចិន្តិតស្ស ផលំ បស្ស, មុត្តោស្មិ វធពន្ធនាតិ.

វដ្ដកជាតកំ អដ្ឋមំ.

១១៩. អកាលរាវិជាតកំ

១១៩. អមាតាបិតរសំវទ្ធោ [បិតរិ (សី. បី.), បិតុ (ស្យា.)], អនាចេរកុលេ វសំ;

នាយំ កាលំ អកាលំ វា, អភិជានាតិ កុក្កុដោតិ.

អកាលរាវិជាតកំ នវមំ.

១២០. ពន្ធនមោក្ខជាតកំ

១២០. អពទ្ធា តត្ថ ពជ្ឈន្តិ, យត្ថ ពាលា បភាសរេ;

ពទ្ធាបិ តត្ថ មុច្ចន្តិ, យត្ថ ធីរា បភាសរេតិ.

ពន្ធនមោក្ខជាតកំ ទសមំ.

ហំចិវគ្គោ [ហំសិវគ្គោ (សី. ស្យា.)] ទ្វាទសមោ.

តស្សុទ្ទានំ –

អថ គទ្រភ សត្តុវ កំសសតំ, ពហុចិន្តិ សាសិកាយាតិករ;

អតិវេល វិសេសមនាចរិយោវ, ធីរាបភាសរតេន ទសាតិ.