១៣. កុសនាឡិវគ្គោ

១២១. ករេ សរិក្ខោ អថ វាបិ សេដ្ឋោ, និហីនកោ វាបិ ករេយ្យ ឯកោ;

ករេយ្យុមេតេ [ករេយ្យុំ តេ (សី. បី.)] ព្យសនេ ឧត្តមត្ថំ, យថា អហំ កុសនាឡិ រុចាយន្តិ.

កុសនាឡិជាតកំ បឋមំ.

១២២. យសំ លទ្ធាន ទុម្មេធោ, អនត្ថំ ចរតិ អត្តនោ;

អត្តនោ ច បរេសញ្ច, ហិំសាយ បដិបជ្ជតីតិ.

ទុម្មេធជាតកំ ទុតិយំ.

១២៣. អសព្ពត្ថគាមិំ វាចំ, ពាលោ សព្ពត្ថ ភាសតិ;

នាយំ ទធិំ វេទិ ន [ន វេទិ (ក.)] នង្គលីសំ, ទធិប្បយំ [ទធិម្បយំ (សី. បី.)] មញ្ញតិ នង្គលីសន្តិ.

នង្គលីសជាតកំ តតិយំ.

១២៤. វាយមេថេវ បុរិសោ, ន និព្ពិន្ទេយ្យ បណ្ឌិតោ;

វាយាមស្ស ផលំ បស្ស, ភុត្តា អម្ពា អនីតិហន្តិ.

អម្ពជាតកំ ចតុត្ថំ.

១២៥. ពហុម្បិ សោ វិកត្ថេយ្យ, អញ្ញំ ជនបទំ គតោ;

អន្វាគន្ត្វាន ទូសេយ្យ, ភុញ្ជ ភោគេ កដាហកាតិ.

កដាហកជាតកំ បញ្ចមំ.

១២៦. តទេវេកស្ស [តថេវេកស្ស (សី. ស្យា. បី. អដ្ឋ. មូលបាឋោ)] កល្យាណំ, តទេវេកស្ស បាបកំ;

តស្មា សព្ពំ ន កល្យាណំ, សព្ពំ វាបិ ន បាបកន្តិ.

អសិលក្ខណជាតកំ ឆដ្ឋំ.

១២៧. តេ ទេសា តានិ វត្ថូនិ, អហញ្ច វនគោចរោ;

អនុវិច្ច ខោ តំ គណ្ហេយ្យុំ, បិវ [បិប (សី. បី.)] ខីរំ កលណ្ឌុកាតិ.

កលណ្ឌុកជាតកំ សត្តមំ.

១២៨. យោ វេ ធម្មំ ធជំ [ធម្មធជំ (ស្យា. បី. ក.)] កត្វា, និគូឡ្ហោ បាបមាចរេ;

វិស្សាសយិត្វា ភូតានិ, ពិឡារំ នាម តំ វតន្តិ.

ពិឡារវតជាតកំ អដ្ឋមំ.

១២៩. នាយំ សិខា បុញ្ញហេតុ, ឃាសហេតុ អយំ សិខា;

នាង្គុដ្ឋគណនំ យាតិ, អលំ តេ ហោតុ អគ្គិកាតិ.

អគ្គិកភារទ្វាជជាតកំ នវមំ.

១៣០. យថា វាចា ច ភុញ្ជស្សុ, យថា ភុត្តញ្ច ព្យាហរ;

ឧភយំ តេ ន សមេតិ, វាចា ភុត្តញ្ច កោសិយេតិ.

កោសិយជាតកំ ទសមំ.

កុសនាឡិវគ្គោ [សរិក្ខវគ្គោ (ក.)] តេរសមោ.

តស្សុទ្ទានំ –

កុសនាឡិសិរិវ្ហយនោ ច យសំ, ទធិ មម្ព កដាហកបញ្ចមកោ;

អថ បាបក ខីរ ពិឡារវតំ, សិខិ កោសិយសវ្ហយនេន ទសាតិ.