១៤. អសម្បទានវគ្គោ

១៣១. អសម្បទានេនិតរីតរស្ស, ពាលស្ស មិត្តានិ កលី ភវន្តិ;

តស្មា ហរាមិ ភុសំ អឌ្ឍមានំ, មា មេ មិត្តិ ជីយិត្ថ សស្សតាយន្តិ.

អសម្បទានជាតកំ បឋមំ.

១៣២. កុសលូបទេសេ ធិតិយា ទឡ្ហាយ ច, អនិវត្តិតត្តាភយភីរុតាយ [អវត្ថិតត្តាភយភីរុតាយ (សី. ស្យា. បី.)] ច;

ន រក្ខសីនំ វសមាគមិម្ហសេ, ស សោត្ថិភាវោ មហតា ភយេន មេតិ.

ភីរុក [បញ្ចគរុក (សី. បី.), បញ្ចភីរុក (ស្យា.), អភយភីរុត§(?)] ជាតកំ ទុតិយំ.

១៣៣. ខេមំ យហិំ តត្ថ អរី ឧទីរិតោ [អរិ ឧទ្ធរិតោ (ក.)], ទកស្ស មជ្ឈេ ជលតេ ឃតាសនោ;

ន អជ្ជ វាសោ មហិយា មហីរុហេ, ទិសា ភជវ្ហោ សរណាជ្ជ នោ ភយន្តិ.

ឃតាសនជាតកំ តតិយំ.

១៣៤. យេ សញ្ញិនោ តេបិ ទុគ្គតា, យេបិ អសញ្ញិនោ តេបិ ទុគ្គតា;

ឯតំ ឧភយំ វិវជ្ជយ, តំ សមាបត្តិសុខំ អនង្គណន្តិ.

ឈានសោធនជាតកំ ចតុត្ថំ.

១៣៥. ចន្ទាភំ សូរិយាភញ្ច, យោធ បញ្ញាយ គាធតិ.

អវិតក្កេន ឈានេន, ហោតិ អាភស្សរូបគោតិ.

ចន្ទាភជាតកំ បញ្ចមំ.

១៣៦. យំ លទ្ធំ តេន តុដ្ឋព្ពំ, អតិលោភោ ហិ បាបកោ;

ហំសរាជំ គហេត្វាន, សុវណ្ណា បរិហាយថាតិ.

សុវណ្ណហំសជាតកំ ឆដ្ឋំ.

១៣៧. យត្ថេកោ លភតេ ពព្ពុ, ទុតិយោ តត្ថ ជាយតិ;

តតិយោ ច ចតុត្ថោ ច, ឥទំ តេ ពព្ពុកា ពិលន្តិ.

ពព្ពុជាតកំ សត្តមំ.

១៣៨. កិំ តេ ជដាហិ ទុម្មេធ, កិំ តេ អជិនសាដិយា;

អព្ភន្តរំ តេ គហនំ, ពាហិរំ បរិមជ្ជសីតិ.

គោធជាតកំ អដ្ឋមំ.

១៣៩. អក្ខី ភិន្នា បដោ នដ្ឋោ, សខិគេហេ ច ភណ្ឌនំ;

ឧភតោ បទុដ្ឋា កម្មន្តា [បទុដ្ឋកម្មន្តោ (សី.), បទុដ្ឋោ កម្មន្តោ (បី.)], ឧទកម្ហិ ថលម្ហិ ចាតិ.

ឧភតោភដ្ឋជាតកំ នវមំ.

១៤០. និច្ចំ ឧព្ពិគ្គហទយា, សព្ពលោកវិហេសកា;

តស្មា នេសំ វសា នត្ថិ, កាកានម្ហាក [កាកានស្មាក (សី. ស្យា. បី.)] ញាតិនន្តិ.

កាកជាតកំ ទសមំ.

អសម្បទានវគ្គោ ចុទ្ទសមោ.

តស្សុទ្ទានំ –

ឥតរីតរ រក្ខសិ ខេមិយោ ច, បរោសតបញ្ហេន អាភស្សរោ បុន;

អថ ហំសវរុត្តមពព្ពុជដំ, បដនដ្ឋក កាកវរេន ទសាតិ.