១៥. កកណ្ដកវគ្គោ

១៤១. គោធជាតកំ

១៤១. ន បាបជនសំសេវី, អច្ចន្តសុខមេធតិ;

គោធាកុលំ [គោធក្កុលំ (ក.)] កកណ្ដាវ [កកណ្ដកា (ក.)], កលិំ បាបេតិ អត្តនន្តិ.

គោធជាតកំ បឋមំ.

១៤២. សិង្គាលជាតកំ

១៤២. ឯតញ្ហិ តេ ទុរាជានំ, យំ សេសិ មតសាយិកំ;

យស្ស តេ កឌ្ឍមានស្ស, ហត្ថា ទណ្ឌោ ន មុច្ចតីតិ.

សិង្គាលជាតកំ ទុតិយំ.

១៤៣. វិរោចជាតកំ

១៤៣. លសី ច តេ និប្ផលិតា, មត្ថកោ ច បទាលិតោ [វិទាលិតោ (សី. បី.)];

សព្ពា តេ ផាសុកា ភគ្គា, អជ្ជ ខោ ត្វំ វិរោចសីតិ.

វិរោចជាតកំ តតិយំ.

១៤៤. នង្គុដ្ឋជាតកំ

១៤៤. ពហុម្បេតំ អសព្ភិ [ពហុបេតមសព្ភិ (ក.)] ជាតវេទ, យំ តំ វាលធិនាភិបូជយាម;

មំសារហស្ស នត្ថជ្ជ មំសំ, នង្គុដ្ឋម្បិ ភវំ បដិគ្គហាតូតិ.

នង្គុដ្ឋជាតកំ ចតុត្ថំ.

១៤៥. រាធជាតកំ

១៤៥. ន ត្វំ រាធ វិជានាសិ, អឌ្ឍរត្តេ អនាគតេ;

អព្យយតំ [អព្យាយតំ (សី. ស្យា. បី.), អព្យត្តតំ (?)] វិលបសិ, វិរត្តា កោសិយាយនេតិ.

រាធជាតកំ បញ្ចមំ.

១៤៦. សមុទ្ទកាកជាតកំ

១៤៦. អបិ នុ ហនុកា សន្តា, មុខញ្ច បរិសុស្សតិ;

ឱរមាម ន បារេម, បូរតេវ មហោទធីតិ.

សមុទ្ទកាកជាតកំ ឆដ្ឋំ.

១៤៧. បុប្ផរត្តជាតកំ

១៤៧. នយិទំ ទុក្ខំ អទុំ ទុក្ខំ, យំ មំ តុទតិ វាយសោ;

យំ សាមា បុប្ផរត្តេន, កត្តិកំ នានុភោស្សតីតិ.

បុប្ផរត្តជាតកំ សត្តមំ.

១៤៨. សិង្គាលជាតកំ

១៤៨. នាហំ បុនំ ន ច បុនំ, ន ចាបិ អបុនប្បុនំ;

ហត្ថិពោន្ទិំ បវេក្ខាមិ, តថា ហិ ភយតជ្ជិតោតិ.

សិង្គាលជាតកំ អដ្ឋមំ.

១៤៩. ឯកបណ្ណជាតកំ

១៤៩. ឯកបណ្ណោ អយំ រុក្ខោ, ន ភូម្យា ចតុរង្គុលោ;

ផលេន វិសកប្បេន, មហាយំ កិំ ភវិស្សតីតិ.

ឯកបណ្ណជាតកំ នវមំ.

១៥០. សញ្ជីវជាតកំ

១៥០. អសន្តំ យោ បគ្គណ្ហាតិ, អសន្តំ ចូបសេវតិ;

តមេវ ឃាសំ កុរុតេ, ព្យគ្ឃោ សញ្ជីវកោ យថាតិ.

សញ្ជីវជាតកំ ទសមំ.

កកណ្ដក [បាបសេវន (ក.)] វគ្គោ បន្នរសមោ.

តស្សុទ្ទានំ –

សុខមេធតិ ទណ្ឌវរោ ច បុន, លសិ វាលធិ បញ្ចមរាធវរោ;

សមហោទធិ កត្តិក ពោន្ទិ បុន, ចតុរង្គុលព្យគ្ឃវរេន ទសាតិ.

(ឧបរិមោ បណ្ណាសកោ.) [( ) សីហឡបោត្ថកេយេវ ទិស្សតិ]

អថ វគ្គុទ្ទានំ –

អបណ្ណកំ សីលវគ្គកុរុង្គ, កុលាវកំ អត្ថកាមេន បញ្ចមំ;

អាសីសោ ឥត្ថិវរុណំ អបាយិ, លិត្តវគ្គេន តេ ទស;

បរោសតំ ហំចិ កុសនាឡិ [ហំសិ សរិក្ខំ (សព្ពត្ថ)], អសម្បទំ កកណ្ដកវគ្គោ.

ឯកនិបាតម្ហិលង្កតន្តិ.

ឯកកនិបាតំ និដ្ឋិតំ.