៨. វរុណវគ្គោ

៧១. យោ បុព្ពេ ករណីយានិ, បច្ឆា សោ កាតុមិច្ឆតិ;

វរុណកដ្ឋ [វរណកដ្ឋ (សី. បី.)] ភញ្ជោវ, ស បច្ឆា មនុតប្បតីតិ.

វរុណជាតកំ បឋមំ.

៧២. អកតញ្ញុស្ស បោសស្ស, និច្ចំ វិវរទស្សិនោ;

សព្ពំ ចេ បថវិំ [បឋវិំ (សី. ស្យា. បី.)] ទជ្ជា, នេវ នំ អភិរាធយេតិ.

សីលវហត្ថិជាតកំ ទុតិយំ.

៧៣. សច្ចំ កិរេវមាហំសុ, នរា ឯកច្ចិយា ឥធ;

កដ្ឋំ និប្លវិតំ [វិប្លាវិតំ (សី. បី.)] សេយ្យោ, ន ត្វេវេកច្ចិយោ នរោតិ.

សច្ចំកិរជាតកំ តតិយំ.

៧៤. សាធូ សម្ពហុលា ញាតី, អបិ រុក្ខា អរញ្ញជា;

វាតោ វហតិ ឯកដ្ឋំ, ព្រហន្តម្បិ វនប្បតិន្តិ.

រុក្ខធម្មជាតកំ ចតុត្ថំ.

៧៥. អភិត្ថនយ បជ្ជុន្ន, និធិំ កាកស្ស នាសយ;

កាកំ សោកាយ រន្ធេហិ, មញ្ច សោកា បមោចយាតិ.

មច្ឆជាតកំ បញ្ចមំ.

៧៦. អសង្កិយោម្ហិ គាមម្ហិ, អរញ្ញេ នត្ថិ មេ ភយំ;

ឧជុំ មគ្គំ សមារូឡ្ហោ, មេត្តាយ ករុណាយ ចាតិ.

អសង្កិយជាតកំ ឆដ្ឋំ.

៧៧. ឧសភា រុក្ខា គាវិយោ គវា ច, អស្សោ កំសោ សិង្គាលី [សិគាសី (សី. ស្យា. បី.)] ច កុម្ភោ;

បោក្ខរណី ច អបាកចន្ទនំ, លាពូនិ សីទន្តិ សិលា ប្លវន្តិ.

មណ្ឌូកិយោ កណ្ហសប្បេ គិលន្តិ, កាកំ សុបណ្ណា បរិវារយន្តិ;

តសា វកា ឯឡកានំ ភយាហិ, វិបរិយាសោ [វិបរិយាយោ (ស្យា. ក.)] វត្តតិ នយិធ មត្ថីតិ.

មហាសុបិនជាតកំ សត្តមំ.

៧៨. ឧភោ ខញ្ជា ឧភោ កុណី, ឧភោ វិសមចក្ខុកា [ចក្ខុលា (សី. បី.)];

ឧភិន្នំ បិឡកា [បីឡកា (ស្យា.)] ជាតា, នាហំ បស្សាមិ ឥល្លិសន្តិ.

ឥល្លិសជាតកំ អដ្ឋមំ.

៧៩. យតោ វិលុត្តា ច ហតា ច គាវោ, ទឌ្ឍានិ គេហានិ ជនោ ច នីតោ;

អថាគមា បុត្តហតាយ បុត្តោ, ខរស្សរំ ឌិណ្ឌិមំ [ទេណ្ឌិមំ (សី. ស្យា. បី.), ឌិន្ទិមំ (ក.)] វាទយន្តោតិ.

ខរស្សរជាតកំ នវមំ.

៨០. យំ តេ បវិកត្ថិតំ បុរេ, អថ តេ បូតិសរា សជន្តិ បច្ឆា;

ឧភយំ ន សមេតិ ភីមសេន, យុទ្ធកថា ច ឥទញ្ច តេ វិហញ្ញន្តិ.

ភីមសេនជាតកំ ទសមំ.

វរុណវគ្គោ [វរណវគ្គោ (សី. បី.)] អដ្ឋមោ.

តស្សុទ្ទានំ –

វរុណា អកតញ្ញូវរេ តុ សច្ចវរំ, សវនប្បតិនា ច អភិត្ថនយ;

ករុណាយ សិលាប្លវ ឥល្លិសតោ, បុន ឌិណ្ឌិមបូតិសរេន ទសាតិ.