៧. ឥត្ថិវគ្គោ

៦១. អសា លោកិត្ថិយោ នាម, វេលា តាសំ ន វិជ្ជតិ;

សារត្តា ច បគព្ភា ច, សិខី សព្ពឃសោ យថា;

តា ហិត្វា បព្ពជិស្សាមិ, វិវេកមនុព្រូហយន្តិ.

អសាតមន្តជាតកំ បឋមំ.

៦២. យំ ព្រាហ្មណោ អវាទេសិ, វីណំ សមុខវេឋិតោ;

អណ្ឌភូតា ភតា ភរិយា, តាសុ កោ ជាតុ វិស្សសេតិ.

អណ្ឌភូតជាតកំ ទុតិយំ.

៦៣. កោធនា អកតញ្ញូ ច, បិសុណា មិត្តភេទិកា [បិសុណា ច វិភេទិកា (សី. ស្យា. បី.)];

ព្រហ្មចរិយំ ចរ ភិក្ខុ, សោ សុខំ ន វិហាហសីតិ [បិហាហិសីតិ (សី. ស្យា. បី.), វិហាយសិ (ក.)].

តក្កបណ្ឌិតជាតកំ [តក្កជាតកំ (សី. ស្យា. បី. អដ្ឋ.)] តតិយំ.

៦៤. មា សុ នន្ទិ ឥច្ឆតិ មំ, មា សុ សោចិ ន មិច្ឆតិ [ន ឥច្ឆតិ (សី. ស្យា. បី.)];

ថីនំ ភាវោ ទុរាជានោ, មច្ឆស្សេវោទកេ គតន្តិ.

ទុរាជានជាតកំ ចតុត្ថំ.

៦៥. យថា នទី ច បន្ថោ ច, បានាគារំ សភា បបា;

ឯវំ លោកិត្ថិយោ នាម, នាសំ កុជ្ឈន្តិ បណ្ឌិតាតិ.

អនភិរតិជាតកំ បញ្ចមំ.

៦៦. ឯកា ឥច្ឆា បុរេ អាសិ, អលទ្ធា មុទុលក្ខណំ;

យតោ លទ្ធា អឡារក្ខី, ឥច្ឆា ឥច្ឆំ វិជាយថាតិ.

មុទុលក្ខណជាតកំ ឆដ្ឋំ.

៦៧. ឧច្ឆង្គេ ទេវ មេ បុត្តោ, បថេ ធាវន្តិយា បតិ;

តញ្ច ទេសំ ន បស្សាមិ, យតោ សោទរិយមានយេតិ [សោទរិយំ នយេ (ក.)].

ឧច្ឆង្គជាតកំ សត្តមំ.

៦៨. យស្មិំ មនោ និវិសតិ, ចិត្តញ្ចាបិ [ចិត្តំ វាបិ (កត្ថចិ)] បសីទតិ;

អទិដ្ឋបុព្ពកេ បោសេ, កាមំ តស្មិម្បិ វិស្សសេតិ.

សាកេតជាតកំ អដ្ឋមំ.

៦៩. ធិរត្ថុ តំ វិសំ វន្តំ, យមហំ ជីវិតការណា;

វន្តំ បច្ចាវមិស្សាមិ [បច្ចាហរិស្សាមិ (ក.)], មតំ មេ ជីវិតា វរន្តិ.

វិសវន្តជាតកំ នវមំ.

៧០. ន តំ ជិតំ សាធុ ជិតំ, យំ ជិតំ អវជីយតិ;

តំ ខោ ជិតំ សាធុ ជិតំ, យំ ជិតំ នាវជីយតីតិ.

កុទ្ទាលជាតកំ ទសមំ.

ឥត្ថិវគ្គោ សត្តមោ.

តស្សុទ្ទានំ –

សិខីសព្ពឃសោបិ ច វីណវរោ, បិសុណា មិត្តភេទិកា នន្ទី នទី;

មុទុលក្ខណ សោទរិយា ច មនោ, វិស សាធុជិតេន ភវន្តិ ទសាតិ.