៦. អាសីសវគ្គោ

៥១. អាសីសេថេវ [អាសិំសេថេវ (សី. ស្យា. បី.)] បុរិសោ, ន និព្ពិន្ទេយ្យ បណ្ឌិតោ;

បស្សាមិ វោហំ អត្តានំ, យថា ឥច្ឆិំ តថា អហូតិ.

មហាសីលវជាតកំ បឋមំ.

៥២. វាយមេថេវ បុរិសោ, ន និព្ពិន្ទេយ្យ បណ្ឌិតោ;

បស្សាមិ វោហំ អត្តានំ, ឧទកា ថលមុព្ភតន្តិ.

ចូឡជនកជាតកំ ទុតិយំ.

៥៣. តថេវ បុណ្ណា បាតិយោ, អញ្ញាយំ វត្តតេ កថា;

អាការណេន [អាការកេន (សី. ស្យា. បី.)] ជានាមិ, ន ចាយំ ភទ្ទិកា សុរាតិ.

បុណ្ណបាតិជាតកំ តតិយំ.

៥៤. នាយំ រុក្ខោ ទុរារុហោ, នបិ គាមតោ អារកា;

អាការណេន ជានាមិ, នាយំ សាទុផលោ ទុមោតិ.

កិំផលជាតកំ ចតុត្ថំ.

៥៥. យោ អលីនេន ចិត្តេន, អលីនមនសោ នរោ;

ភាវេតិ កុសលំ ធម្មំ, យោគក្ខេមស្ស បត្តិយា;

បាបុណេ អនុបុព្ពេន, សព្ពសំយោជនក្ខយន្តិ.

បញ្ចាវុធជាតកំ បញ្ចមំ.

៥៦. យោ បហដ្ឋេន ចិត្តេន, បហដ្ឋមនសោ នរោ;

ភាវេតិ កុសលំ ធម្មំ, យោគក្ខេមស្ស បត្តិយា;

បាបុណេ អនុបុព្ពេន, សព្ពសំយោជនក្ខយន្តិ.

កញ្ចនក្ខន្ធជាតកំ ឆដ្ឋំ.

៥៧. យស្សេតេ ចតុរោ ធម្មា, វានរិន្ទ យថា តវ;

សច្ចំ ធម្មោ ធិតិ [ធិតី (សី. បី.)] ចាគោ, ទិដ្ឋំ សោ អតិវត្តតីតិ.

វានរិន្ទជាតកំ សត្តមំ.

៥៨. យស្សេតេ ច [យស្ស ឯតេ (សី. បី.)] តយោ ធម្មា, វានរិន្ទ យថា តវ;

ទក្ខិយំ សូរិយំ បញ្ញា, ទិដ្ឋំ សោ អតិវត្តតីតិ.

តយោធម្មជាតកំ អដ្ឋមំ.

៥៩. ធមេ ធមេ នាតិធមេ, អតិធន្តញ្ហិ បាបកំ;

ធន្តេន ហិ សតំ លទ្ធំ, អតិធន្តេន នាសិតន្តិ.

ភេរិវាទកជាតកំ នវមំ.

៦០. ធមេ ធមេ នាតិធមេ, អតិធន្តញ្ហិ បាបកំ;

ធន្តេនាធិគតា ភោគា, តេ តាតោ វិធមី ធមន្តិ.

សង្ខធមជាតកំ ទសមំ.

អាសីសវគ្គោ ឆដ្ឋោ.

តស្សុទ្ទានំ –

យថា ឥច្ឆិំ តថាហុទកា ថលា, សុរ សាទុផលោ ច អលីនមនោ;

សម្បហដ្ឋមនោ ចតុរោ ច តយោ, សតលទ្ធក ភោគធនេន ទសាតិ.