៥. អត្ថកាមវគ្គោ

៤១. យោ អត្ថកាមស្ស ហិតានុកម្បិនោ, ឱវជ្ជមានោ ន ករោតិ សាសនំ;

អជិយា បាទមោលម្ព [បាទមោលុម្ព (សី. ស្យា. បី.)], មិត្តកោ វិយ សោចតីតិ.

លោសកជាតកំ បឋមំ.

៤២. យោ អត្ថកាមស្ស ហិតានុកម្បិនោ, ឱវជ្ជមានោ ន ករោតិ សាសនំ;

កបោតកស្ស វចនំ អកត្វា, អមិត្តហត្ថត្ថគតោវ សេតីតិ.

កបោតជាតកំ ទុតិយំ.

៤៣. យោ អត្ថកាមស្ស ហិតានុកម្បិនោ, ឱវជ្ជមានោ ន ករោតិ សាសនំ;

ឯវំ សោ និហតោ សេតិ, វេឡុកស្ស យថា បិតាតិ.

វេឡុកជាតកំ តតិយំ.

៤៤. សេយ្យោ អមិត្តោ មតិយា ឧបេតោ, ន ត្វេវ មិត្តោ មតិវិប្បហីនោ;

មកសំ វធិស្សន្តិ ហិ ឯឡមូគោ, បុត្តោ បិតុ អព្ភិទា ឧត្តមង្គន្តិ.

មកសជាតកំ ចតុត្ថំ.

៤៥. សេយ្យោ អមិត្តោ មេធាវី, យញ្ចេ ពាលានុកម្បកោ;

បស្ស រោហិណិកំ ជម្មិំ, មាតរំ ហន្ត្វាន សោចតីតិ.

រោហិណិជាតកំ បញ្ចមំ.

៤៦. ន វេ អនត្ថកុសលេន, អត្ថចរិយា សុខាវហា;

ហាបេតិ អត្ថំ ទុម្មេធោ, កបិ អារាមិកោ យថាតិ.

អារាមទូសកជាតកំ ឆដ្ឋំ.

៤៧. ន វេ អនត្ថកុសលេន, អត្ថចរិយា សុខាវហា;

ហាបេតិ អត្ថំ ទុម្មេធោ, កោណ្ឌញ្ញោ វារុណិំ យថាតិ.

វារុណិទូសកជាតកំ សត្តមំ.

៤៨. អនុបាយេន យោ អត្ថំ, ឥច្ឆតិ សោ វិហញ្ញតិ;

ចេតា ហនិំសុ វេទព្ពំ [វេទព្ភំ (សី. បី.)], សព្ពេ តេ ព្យសនមជ្ឈគូតិ.

វេទព្ព [វេទព្ភ (សី. បី.)] ជាតកំ អដ្ឋមំ.

៤៩. នក្ខត្តំ បដិមានេន្តំ, អត្ថោ ពាលំ ឧបច្ចគា;

អត្ថោ អត្ថស្ស នក្ខត្តំ, កិំ ករិស្សន្តិ តារកាតិ.

នក្ខត្តជាតកំ នវមំ.

៥០. ទុម្មេធានំ សហស្សេន, យញ្ញោ មេ ឧបយាចិតោ;

ឥទានិ ខោហំ យជិស្សាមិ, ពហុ [ពហូ (សី. បី.), ពហុំ (ក.)] អធម្មិកោ ជនោតិ.

ទុម្មេធជាតកំ ទសមំ.

អត្ថកាមវគ្គោ បញ្ចមោ.

តស្សុទ្ទានំ –

អថ មិត្តក មាតុ កបោតវរោ, តថា វេឡូក ឯឡមូគោ រោហិណី;

កបិ វារុណិ ចេតចរា ច បុន, តថា តារក យញ្ញវរេន ទសាតិ.

បឋមោ បណ្ណាសកោ.