៤. កុលាវកវគ្គោ

៣១. កុលាវកា មាតលិ សិម្ពលិស្មិំ, ឦសាមុខេន បរិវជ្ជយស្សុ;

កាមំ ចជាម អសុរេសុ បាណំ, មា មេ ទិជា វិក្កុលវា [មាយិមេ ទិជា វិកុលាវា (សី. ស្យា. បី.)] អហេសុន្តិ.

កុលាវកជាតកំ បឋមំ.

៣២. រុទំ មនុញ្ញំ រុចិរា ច បិដ្ឋិ, វេឡុរិយវណ្ណូបនិភា [វណ្ណូបដិភា (ស្យា.), វណ្ណសន្និភា (ក.)] ច គីវា;

ព្យាមមត្តានិ ច បេខុណានិ, នច្ចេន តេ ធីតរំ នោ ទទាមីតិ.

នច្ចជាតកំ ទុតិយំ.

៣៣. សម្មោទមានា គច្ឆន្តិ, ជាលមាទាយ បក្ខិនោ;

យទា តេ វិវទិស្សន្តិ, តទា ឯហិន្តិ មេ វសន្តិ.

សម្មោទមានជាតកំ តតិយំ.

៣៤. ន មំ សីតំ ន មំ ឧណ្ហំ, ន មំ ជាលស្មិ ពាធនំ;

យញ្ច មំ មញ្ញតេ មច្ឆី, អញ្ញំ សោ រតិយា គតោតិ.

មច្ឆជាតកំ ចតុត្ថំ.

៣៥. សន្តិ បក្ខា អបតនា, សន្តិ បាទា អវញ្ចនា;

មាតាបិតា ច និក្ខន្តា, ជាតវេទ បដិក្កមាតិ.

វដ្ដកជាតកំ បញ្ចមំ.

៣៦. យំ និស្សិតា ជគតិរុហំ វិហង្គមា, ស្វាយំ អគ្គិំ បមុញ្ចតិ;

ទិសា ភជថ វក្កង្គា [វង្កង្គា (ស្យា.)], ជាតំ សរណតោ ភយន្តិ.

សកុណជាតកំ ឆដ្ឋំ.

៣៧. យេ វុឌ្ឍ [វទ្ធ (សី. បី.)] មបចាយន្តិ, នរា ធម្មស្ស កោវិទា;

ទិដ្ឋេវ ធម្មេ បាសំសា, សម្បរាយេ ច សុគ្គតីតិ.

តិត្តិរជាតកំ សត្តមំ.

៣៨. នាច្ចន្តំ និកតិប្បញ្ញោ, និកត្យា សុខមេធតិ;

អារាធេតិ និកតិប្បញ្ញោ [អារាធេ និកតិប្បញ្ញោ (បី.)], ពកោ កក្កដកាមិវាតិ.

ពកជាតកំ អដ្ឋមំ.

៣៩. មញ្ញេ សោវណ្ណយោ រាសិ, សោណ្ណមាលា ច នន្ទកោ;

យត្ថ ទាសោ អាមជាតោ, ឋិតោ ថុល្លានិ [ថូលានិ (ក.)] គជ្ជតីតិ.

នន្ទជាតកំ នវមំ.

៤០. កាមំ បតាមិ និរយំ, ឧទ្ធំបាទោ អវំសិរោ;

នានរិយំ ករិស្សាមិ, ហន្ទ បិណ្ឌំ បដិគ្គហាតិ.

ខទិរង្គារជាតកំ ទសមំ.

កុលាវកវគ្គោ ចតុត្ថោ.

តស្សុទ្ទានំ –

សិរិមាតលិ ធីតរ បក្ខិវរោ, រតិយាគតោ មាតាបិតា ច បុន;

ជគតីរុហ វុឌ្ឍ សុកក្កដកោ, តថា នន្ទកបិណ្ឌវរេន ទសាតិ.