៣. កុរុង្គវគ្គោ

២១. ញាតមេតំ កុរុង្គស្ស, យំ ត្វំ សេបណ្ណិ សិយ្យសិ [សេយ្យសិ (សី. ស្យា. បី.)];

អញ្ញំ សេបណ្ណិ គច្ឆាមិ, ន មេ តេ រុច្ចតេ ផលន្តិ.

កុរុង្គមិគជាតកំ បឋមំ.

២២. យេ កុក្កុរា រាជកុលម្ហិ វទ្ធា, កោលេយ្យកា វណ្ណពលូបបន្នា;

តេមេ ន វជ្ឈា មយមស្ម វជ្ឈា, នាយំ សឃច្ចា ទុព្ពលឃាតិកាយន្តិ.

កុក្កុរជាតកំ ទុតិយំ.

២៣. អបិ បស្សេន សេមានោ, សល្លេភិ សល្លលីកតោ;

សេយ្យោវ វឡវា គោជោ [ភោជ្ជោ (សី.), ភោជ្ឈោ (ស្យា. បី.)], យុញ្ជ មញ្ញេវ សារថីតិ.

គោជានីយ [ភោជាជានីយ (សី. ស្យា. បី.)] ជាតកំ តតិយំ.

២៤. យទា យទា យត្ថ យទា, យត្ថ យត្ថ យទា យទា;

អាជញ្ញោ កុរុតេ វេគំ, ហាយន្តិ តត្ថ វាឡវាតិ.

អាជញ្ញជាតកំ ចតុត្ថំ.

២៥. អញ្ញមញ្ញេហិ តិត្ថេហិ, អស្សំ បាយេហិ សារថិ;

អច្ចាសនស្ស បុរិសោ, បាយាសស្សបិ តប្បតីតិ.

តិត្ថជាតកំ បញ្ចមំ.

២៦. បុរាណចោរាន វចោ និសម្ម, មហិឡាមុខោ បោថយមន្វចារី;

សុសញ្ញតានញ្ហិ វចោ និសម្ម, គជុត្តមោ សព្ពគុណេសុ អដ្ឋាតិ.

មហិឡាមុខជាតកំ ឆដ្ឋំ.

២៧. នាលំ កពឡំ បទាតវេ, ន ច បិណ្ឌំ ន កុសេ ន ឃំសិតុំ;

មញ្ញាមិ អភិណ្ហទស្សនា, នាគោ ស្នេហមកាសិ [សិនេហមកាសិ (សី. ស្យា. បី.)] កុក្កុរេតិ.

អភិណ្ហជាតកំ សត្តមំ.

២៨. មនុញ្ញមេវ ភាសេយ្យ, នាមនុញ្ញំ កុទាចនំ;

មនុញ្ញំ ភាសមានស្ស, គរុំ ភារំ ឧទទ្ធរិ;

ធនញ្ច នំ អលាភេសិ, តេន ចត្តមនោ អហូតិ.

នន្ទិវិសាលជាតកំ អដ្ឋមំ.

២៩. យតោ យតោ គរុ ធុរំ, យតោ គម្ភីរវត្តនី;

តទាស្សុ កណ្ហំ យុញ្ជន្តិ, ស្វាស្សុ តំ វហតេ ធុរន្តិ.

កណ្ហជាតកំ នវមំ.

៣០. មា មុនិកស្ស បិហយិ, អាតុរន្នានិ ភុញ្ជតិ;

អប្បោស្សុក្កោ ភុសំ ខាទ, ឯតំ ទីឃាយុលក្ខណន្តិ.

មុនិកជាតកំ ទសមំ.

កុរុង្គវគ្គោ តតិយោ.

តស្សុទ្ទានំ –

កុរុង្គស្ស កុក្កុរគោជវរោ, បុន វាឡវស្សសិរិវ្ហយនោ [សិរិវយនោ (សព្ពត្ថ)];

មហិឡាមុខនាមនុញ្ញវរោ, វហតេ ធុរ មុនិកេន ទសាតិ.