៩. ទានសុត្តំ

៩៨. វុត្តញ្ហេតំ ភគវតា, វុត្តមរហតាតិ មេ សុតំ –

‘‘ទ្វេមានិ, ភិក្ខវេ, ទានានិ – អាមិសទានញ្ច ធម្មទានញ្ច. ឯតទគ្គំ, ភិក្ខវេ, ឥមេសំ ទ្វិន្នំ ទានានំ យទិទំ – ធម្មទានំ.

‘‘ទ្វេមេ, ភិក្ខវេ, សំវិភាគា – អាមិសសំវិភាគោ ច ធម្មសំវិភាគោ ច. ឯតទគ្គំ, ភិក្ខវេ, ឥមេសំ ទ្វិន្នំ សំវិភាគានំ យទិទំ – ធម្មសំវិភាគោ.

‘‘ទ្វេមេ, ភិក្ខវេ, អនុគ្គហា – អាមិសានុគ្គហោ ច ធម្មានុគ្គហោ ច. ឯតទគ្គំ, ភិក្ខវេ, ឥមេសំ ទ្វិន្នំ អនុគ្គហានំ យទិទំ – ធម្មានុគ្គហោ’’តិ. ឯតមត្ថំ ភគវា អវោច. តត្ថេតំ ឥតិ វុច្ចតិ –

‘‘យមាហុ ទានំ បរមំ អនុត្តរំ, យំ សំវិភាគំ ភគវា អវណ្ណយិ [អវណ្ណយី (សី.)];

អគ្គម្ហិ ខេត្តម្ហិ បសន្នចិត្តោ, វិញ្ញូ បជានំ កោ ន យជេថ កាលេ.

‘‘យេ ចេវ ភាសន្តិ សុណន្តិ ចូភយំ, បសន្នចិត្តា សុគតស្ស សាសនេ;

តេសំ សោ អត្ថោ បរមោ វិសុជ្ឈតិ, យេ អប្បមត្តា សុគតស្ស សាសនេ’’តិ.

អយម្បិ អត្ថោ វុត្តោ ភគវតា, ឥតិ មេ សុតន្តិ. នវមំ.