៦. កាមូបបត្តិសុត្តំ

៩៥. វុត្តញ្ហេតំ ភគវតា, វុត្តមរហតាតិ មេ សុតំ –

‘‘តិស្សោ ឥមា, ភិក្ខវេ, កាមូបបត្តិយោ [កាមុប្បត្តិយោ (សី.)]. កតមា តិស្សោ? បច្ចុបដ្ឋិតកាមា, និម្មានរតិនោ, បរនិម្មិតវសវត្តិនោ – ឥមា ខោ, ភិក្ខវេ, តិស្សោ កាមូបបត្តិយោ’’តិ. ឯតមត្ថំ ភគវា អវោច. តត្ថេតំ ឥតិ វុច្ចតិ –

‘‘បច្ចុបដ្ឋិតកាមា ច, យេ ទេវា វសវត្តិនោ;

និម្មានរតិនោ ទេវា, យេ ចញ្ញេ កាមភោគិនោ;

ឥត្ថភាវញ្ញថាភាវំ, សំសារំ នាតិវត្តរេ.

‘‘ឯតមាទីនវំ ញត្វា, កាមភោគេសុ បណ្ឌិតោ;

សព្ពេ បរិច្ចជេ កាមេ, យេ ទិព្ពា យេ ច មានុសា.

‘‘បិយរូបសាតគធិតំ, ឆេត្វា សោតំ ទុរច្ចយំ;

អសេសំ បរិនិព្ពន្តិ, អសេសំ ទុក្ខមច្ចគុំ.

‘‘អរិយទ្ទសា វេទគុនោ, សម្មទញ្ញាយ បណ្ឌិតា;

ជាតិក្ខយមភិញ្ញាយ, នាគច្ឆន្តិ បុនព្ភវ’’ន្តិ.

អយម្បិ អត្ថោ វុត្តោ ភគវតា, ឥតិ មេ សុតន្តិ. ឆដ្ឋំ.