១. វិតក្កសុត្តំ

៨០. វុត្តញ្ហេតំ ភគវតា, វុត្តមរហតាតិ មេ សុតំ –

‘‘តយោមេ, ភិក្ខវេ, អកុសលវិតក្កា. កតមេ តយោ? អនវញ្ញត្តិបដិសំយុត្តោ វិតក្កោ, លាភសក្ការសិលោកបដិសំយុត្តោ វិតក្កោ, បរានុទ្ទយតាបដិសំយុត្តោ វិតក្កោ. ឥមេ ខោ, ភិក្ខវេ, តយោ អកុសលវិតក្កា’’តិ. ឯតមត្ថំ ភគវា អវោច. តត្ថេតំ ឥតិ វុច្ចតិ –

‘‘អនវញ្ញត្តិសំយុត្តោ, លាភសក្ការគារវោ;

សហនន្ទី អមច្ចេហិ, អារា សំយោជនក្ខយា.

‘‘យោ ច បុត្តបសុំ ហិត្វា, វិវាហេ សំហរានិ [សង្គហានិ (ក. សី. ស្យា. បី.)] ច;

ភព្ពោ សោ តាទិសោ ភិក្ខុ, ផុដ្ឋុំ សម្ពោធិមុត្តម’’ន្តិ.

អយម្បិ អត្ថោ វុត្តោ ភគវតា, ឥតិ មេ សុតន្តិ. បឋមំ.