៩. បឋមរាគសុត្តំ

៦៨. វុត្តញ្ហេតំ ភគវតា, វុត្តមរហតាតិ មេ សុតំ –

‘‘យស្ស កស្សចិ, ភិក្ខវេ, រាគោ អប្បហីនោ, ទោសោ អប្បហីនោ, មោហោ អប្បហីនោ – អយំ វុច្ចតិ, ភិក្ខវេ, ‘ពទ្ធោ [ពន្ទោ (ពហូសុ)] មារស្ស បដិមុក្កស្ស មារបាសោ យថាកាមករណីយោ [យថា កាមករណីយោ ច (សី. ស្យា. បី. ក.)] បាបិមតោ’. យស្ស កស្សចិ, ភិក្ខវេ, រាគោ បហីនោ, ទោសោ បហីនោ, មោហោ បហីនោ – អយំ វុច្ចតិ, ភិក្ខវេ, ‘អពទ្ធោ មារស្ស ឱមុក្កស្ស មារបាសោ ន យថា កាមករណីយោ [ន យថាកាមករណីយោ ច (ស្យា.)] បាបិមតោ’’’តិ. ឯតមត្ថំ ភគវា អវោច. តត្ថេតំ ឥតិ វុច្ចតិ –

‘‘យស្ស រាគោ ច ទោសោ ច, អវិជ្ជា ច វិរាជិតា;

តំ ភាវិតត្តញ្ញតរំ, ព្រហ្មភូតំ តថាគតំ;

ពុទ្ធំ វេរភយាតីតំ, អាហុ សព្ពប្បហាយិន’’ន្តិ.

អយម្បិ អត្ថោ វុត្តោ ភគវតា, ឥតិ មេ សុតន្តិ. នវមំ.