២. ចក្ខុសុត្តំ

៦១. វុត្តញ្ហេតំ ភគវតា, វុត្តមរហតាតិ មេ សុតំ –

‘‘តីណិមានិ, ភិក្ខវេ, ចក្ខូនិ. កតមានិ តីណិ? មំសចក្ខុ, ទិព្ពចក្ខុ, បញ្ញាចក្ខុ – ឥមានិ ខោ, ភិក្ខវេ, តីណិ ចក្ខូនី’’តិ. ឯតមត្ថំ ភគវា អវោច. តត្ថេតំ ឥតិ វុច្ចតិ –

‘‘មំសចក្ខុ ទិព្ពចក្ខុ, បញ្ញាចក្ខុ អនុត្តរំ;

ឯតានិ តីណិ ចក្ខូនិ, អក្ខាសិ បុរិសុត្តមោ.

‘‘មំសចក្ខុស្ស ឧប្បាទោ, មគ្គោ ទិព្ពស្ស ចក្ខុនោ;

យតោ ញាណំ ឧទបាទិ, បញ្ញាចក្ខុ អនុត្តរំ;

យស្ស ចក្ខុស្ស បដិលាភា, សព្ពទុក្ខា បមុច្ចតី’’តិ.

អយម្បិ អត្ថោ វុត្តោ ភគវតា, ឥតិ មេ សុតន្តិ. ទុតិយំ.