៤. អវិជ្ជានីវរណសុត្តំ

១៤. វុត្តញ្ហេតំ ភគវតា, វុត្តមរហតាតិ មេ សុតំ –

‘‘នាហំ, ភិក្ខវេ, អញ្ញំ ឯកនីវរណម្បិ សមនុបស្សាមិ យេន [យេនេវំ (?)] នីវរណេន និវុតា បជា ទីឃរត្តំ សន្ធាវន្តិ សំសរន្តិ យថយិទំ, ភិក្ខវេ, អវិជ្ជានីវរណំ [អវិជ្ជានីវរណេន (?)]. អវិជ្ជានីវរណេន ហិ, ភិក្ខវេ, និវុតា បជា ទីឃរត្តំ សន្ធាវន្តិ សំសរន្តី’’តិ. ឯតមត្ថំ ភគវា អវោច. តត្ថេតំ ឥតិ វុច្ចតិ –

‘‘នត្ថញ្ញោ ឯកធម្មោបិ, យេនេវំ [យេនេវ (សី. បី. ក.)] និវុតា បជា;

សំសរន្តិ អហោរត្តំ, យថា មោហេន អាវុតា.

‘‘យេ ច មោហំ បហន្ត្វាន, តមោខន្ធំ [តមោក្ខន្ធំ (សី. ស្យា. បី.)] បទាលយុំ;

ន តេ បុន សំសរន្តិ, ហេតុ តេសំ ន វិជ្ជតី’’តិ.

អយម្បិ អត្ថោ វុត្តោ ភគវតា, ឥតិ មេ សុតន្តិ. ចតុត្ថំ.