១០. បទុដ្ឋចិត្តសុត្តំ

២០. វុត្តញ្ហេតំ ភគវតា, វុត្តមរហតាតិ មេ សុតំ –

‘‘ឥធាហំ, ភិក្ខវេ, ឯកច្ចំ បុគ្គលំ បទុដ្ឋចិត្តំ ឯវំ ចេតសា ចេតោ បរិច្ច បជានាមិ – ‘ឥមម្ហិ ចាយំ សមយេ បុគ្គលោ កាលង្ករេយ្យ យថាភតំ និក្ខិត្តោ ឯវំ និរយេ’. តំ កិស្ស ហេតុ? ចិត្តំ ហិស្ស, ភិក្ខវេ, បទុដ្ឋំ. ចេតោបទោសហេតុ ខោ បន, ភិក្ខវេ, ឯវមិធេកច្ចេ សត្តា កាយស្ស ភេទា បរំ មរណា អបាយំ ទុគ្គតិំ វិនិបាតំ និរយំ ឧបបជ្ជន្តី’’តិ. ឯតមត្ថំ ភគវា អវោច. តត្ថេតំ ឥតិ វុច្ចតិ –

‘‘បទុដ្ឋចិត្តំ ញត្វាន, ឯកច្ចំ ឥធ បុគ្គលំ;

ឯតមត្ថញ្ច ព្យាកាសិ, ពុទ្ធោ ភិក្ខូន សន្តិកេ.

‘‘ឥមម្ហិ ចាយំ សមយេ, កាលំ កយិរាថ បុគ្គលោ;

និរយំ ឧបបជ្ជេយ្យ, ចិត្តំ ហិស្ស បទូសិតំ.

‘‘យថា ហរិត្វា និក្ខិបេយ្យ, ឯវមេវ តថាវិធោ;

ចេតោបទោសហេតុ ហិ, សត្តា គច្ឆន្តិ ទុគ្គតិ’’ន្តិ.

អយម្បិ អត្ថោ វុត្តោ ភគវតា, ឥតិ មេ សុតន្តិ. ទសមំ.

ទុតិយោ វគ្គោ និដ្ឋិតោ.

តស្សុទ្ទានំ –

មោហោ កោធោ អថ មក្ខោ, វិជ្ជា តណ្ហា សេខទុវេ ច;

ភេទោ សាមគ្គិបុគ្គលោ [មោហកោធ អថ មក្ខាគតោ, មូហា កាមសេក្ខទុវេ; ភេទសាមគ្គបុគ្គលោ ច (សី. ក.) មោហកោធា អថ មក្ខោ មោហកាមា សេក្ខា ទុវេ; ភេទមោទា បុគ្គលោ ច (ស្យា. បី.)], វគ្គមាហុ ទុតិយន្តិ វុច្ចតីតិ.