១៩. ធម្មដ្ឋវគ្គោ

២៥៦. ន តេន ហោតិ ធម្មដ្ឋោ, យេនត្ថំ សាហសា [សហសា (សី. ស្យា. ក.)] នយេ;

យោ ច អត្ថំ អនត្ថញ្ច, ឧភោ និច្ឆេយ្យ បណ្ឌិតោ.

២៥៧. អសាហសេន ធម្មេន, សមេន នយតី បរេ;

ធម្មស្ស គុត្តោ មេធាវី, ‘‘ធម្មដ្ឋោ’’តិ បវុច្ចតិ.

២៥៨. ន តេន បណ្ឌិតោ ហោតិ, យាវតា ពហុ ភាសតិ;

ខេមី អវេរី អភយោ, ‘‘បណ្ឌិតោ’’តិ បវុច្ចតិ.

២៥៩. ន តាវតា ធម្មធរោ, យាវតា ពហុ ភាសតិ;

យោ ច អប្បម្បិ សុត្វាន, ធម្មំ កាយេន បស្សតិ;

ស វេ ធម្មធរោ ហោតិ, យោ ធម្មំ នប្បមជ្ជតិ.

២៦០. ន តេន ថេរោ សោ ហោតិ [ថេរោ ហោតិ (សី. ស្យា.)], យេនស្ស បលិតំ សិរោ;

បរិបក្កោ វយោ តស្ស, ‘‘មោឃជិណ្ណោ’’តិ វុច្ចតិ.

២៦១. យម្ហិ សច្ចញ្ច ធម្មោ ច, អហិំសា សំយមោ ទមោ;

ស វេ វន្តមលោ ធីរោ, ‘‘ថេរោ’’ ឥតិ [សោ ថេរោតិ (ស្យា. ក.)] បវុច្ចតិ.

២៦២. ន វាក្ករណមត្តេន, វណ្ណបោក្ខរតាយ វា;

សាធុរូបោ នរោ ហោតិ, ឥស្សុកី មច្ឆរី សឋោ.

២៦៣. យស្ស ចេតំ សមុច្ឆិន្នំ, មូលឃច្ចំ សមូហតំ;

ស វន្តទោសោ មេធាវី, ‘‘សាធុរូបោ’’តិ វុច្ចតិ.

២៦៤. ន មុណ្ឌកេន សមណោ, អព្ពតោ អលិកំ ភណំ;

ឥច្ឆាលោភសមាបន្នោ, សមណោ កិំ ភវិស្សតិ.

២៦៥. យោ ច សមេតិ បាបានិ, អណុំ ថូលានិ សព្ពសោ;

សមិតត្តា ហិ បាបានំ, ‘‘សមណោ’’តិ បវុច្ចតិ.

២៦៦. ន តេន ភិក្ខុ សោ ហោតិ, យាវតា ភិក្ខតេ បរេ;

វិស្សំ ធម្មំ សមាទាយ, ភិក្ខុ ហោតិ ន តាវតា.

២៦៧. យោធ បុញ្ញញ្ច បាបញ្ច, ពាហេត្វា ព្រហ្មចរិយវា [ព្រហ្មចរិយំ (ក.)];

សង្ខាយ លោកេ ចរតិ, ស វេ ‘‘ភិក្ខូ’’តិ វុច្ចតិ.

២៦៨. ន មោនេន មុនី ហោតិ, មូឡ្ហរូបោ អវិទ្ទសុ;

យោ ច តុលំវ បគ្គយ្ហ, វរមាទាយ បណ្ឌិតោ.

២៦៩. បាបានិ បរិវជ្ជេតិ, ស មុនី តេន សោ មុនិ;

យោ មុនាតិ ឧភោ លោកេ, ‘‘មុនិ’’ តេន បវុច្ចតិ.

២៧០. ន តេន អរិយោ ហោតិ, យេន បាណានិ ហិំសតិ;

អហិំសា សព្ពបាណានំ, ‘‘អរិយោ’’តិ បវុច្ចតិ.

២៧១. ន សីលព្ពតមត្តេន, ពាហុសច្ចេន វា បន;

អថ វា សមាធិលាភេន, វិវិត្តសយនេន វា.

២៧២. ផុសាមិ នេក្ខម្មសុខំ, អបុថុជ្ជនសេវិតំ;

ភិក្ខុ វិស្សាសមាបាទិ, អប្បត្តោ អាសវក្ខយំ.

ធម្មដ្ឋវគ្គោ ឯកូនវីសតិមោ និដ្ឋិតោ.