២០. មគ្គវគ្គោ

២៧៣. មគ្គានដ្ឋង្គិកោ សេដ្ឋោ, សច្ចានំ ចតុរោ បទា;

វិរាគោ សេដ្ឋោ ធម្មានំ, ទ្វិបទានញ្ច ចក្ខុមា.

២៧៤. ឯសេវ [ឯសោវ (សី. បី.)] មគ្គោ នត្ថញ្ញោ, ទស្សនស្ស វិសុទ្ធិយា;

ឯតញ្ហិ តុម្ហេ បដិបជ្ជថ, មារស្សេតំ បមោហនំ.

២៧៥. ឯតញ្ហិ តុម្ហេ បដិបន្នា, ទុក្ខស្សន្តំ ករិស្សថ;

អក្ខាតោ វោ [អក្ខាតោ វេ (សី. បី.)] មយា មគ្គោ, អញ្ញាយ សល្លកន្តនំ [សល្លសន្ថនំ (សី. បី.), សល្លសត្ថនំ (ស្យា.)].

២៧៦. តុម្ហេហិ កិច្ចមាតប្បំ, អក្ខាតារោ តថាគតា;

បដិបន្នា បមោក្ខន្តិ, ឈាយិនោ មារពន្ធនា.

២៧៧. ‘‘សព្ពេ សង្ខារា អនិច្ចា’’តិ, យទា បញ្ញាយ បស្សតិ;

អថ និព្ពិន្ទតិ ទុក្ខេ, ឯស មគ្គោ វិសុទ្ធិយា.

២៧៨. ‘‘សព្ពេ សង្ខារា ទុក្ខា’’តិ, យទា បញ្ញាយ បស្សតិ;

អថ និព្ពិន្ទតិ ទុក្ខេ, ឯស មគ្គោ វិសុទ្ធិយា.

២៧៩. ‘‘សព្ពេ ធម្មា អនត្តា’’តិ, យទា បញ្ញាយ បស្សតិ;

អថ និព្ពិន្ទតិ ទុក្ខេ, ឯស មគ្គោ វិសុទ្ធិយា.

២៨០. ឧដ្ឋានកាលម្ហិ អនុដ្ឋហានោ, យុវា ពលី អាលសិយំ ឧបេតោ;

សំសន្នសង្កប្បមនោ [អសម្បន្នសង្កប្បមនោ (ក.)] កុសីតោ, បញ្ញាយ មគ្គំ អលសោ ន វិន្ទតិ.

២៨១. វាចានុរក្ខី មនសា សុសំវុតោ, កាយេន ច នាកុសលំ កយិរា [អកុសលំ ន កយិរា (សី. ស្យា. កំ. បី.)];

ឯតេ តយោ កម្មបថេ វិសោធយេ, អារាធយេ មគ្គមិសិប្បវេទិតំ.

២៨២. យោគា វេ ជាយតី [ជាយតេ (កត្ថចិ)] ភូរិ, អយោគា ភូរិសង្ខយោ;

ឯតំ ទ្វេធាបថំ ញត្វា, ភវាយ វិភវាយ ច;

តថាត្តានំ និវេសេយ្យ, យថា ភូរិ បវឌ្ឍតិ.

២៨៣. វនំ ឆិន្ទថ មា រុក្ខំ, វនតោ ជាយតេ ភយំ;

ឆេត្វា វនញ្ច វនថញ្ច, និព្ពនា ហោថ ភិក្ខវោ.

២៨៤. យាវ ហិ វនថោ ន ឆិជ្ជតិ, អណុមត្តោបិ នរស្ស នារិសុ;

បដិពទ្ធមនោវ [បដិពន្ធមនោវ (ក.)] តាវ សោ, វច្ឆោ ខីរបកោវ [ខីរបានោវ (បី.)] មាតរិ.

២៨៥. ឧច្ឆិន្ទ សិនេហមត្តនោ កុមុទំ សារទិកំវ [បាណិនា];

សន្តិមគ្គមេវ ព្រូហយ, និព្ពានំ សុគតេន ទេសិតំ.

២៨៦. ឥធ វស្សំ វសិស្សាមិ, ឥធ ហេមន្តគិម្ហិសុ;

ឥតិ ពាលោ វិចិន្តេតិ, អន្តរាយំ ន ពុជ្ឈតិ.

២៨៧. តំ បុត្តបសុសម្មត្តំ, ព្យាសត្តមនសំ នរំ;

សុត្តំ គាមំ មហោឃោវ, មច្ចុ អាទាយ គច្ឆតិ.

២៨៨. ន សន្តិ បុត្តា តាណាយ, ន បិតា នាបិ ពន្ធវា;

អន្តកេនាធិបន្នស្ស, នត្ថិ ញាតីសុ តាណតា.

២៨៩. ឯតមត្ថវសំ ញត្វា, បណ្ឌិតោ សីលសំវុតោ;

និព្ពានគមនំ មគ្គំ, ខិប្បមេវ វិសោធយេ.

មគ្គវគ្គោ វីសតិមោ និដ្ឋិតោ.