៥. សោណបណ្ឌិតចរិយា

៤២. ‘‘បុនាបរំ យទា ហោមិ, នគរេ ព្រហ្មវឌ្ឍនេ;

តត្ថ កុលវរេ សេដ្ឋេ, មហាសាលេ អជាយហំ.

៤៣. ‘‘តទាបិ លោកំ ទិស្វាន, អន្ធីភូតំ តមោត្ថដំ;

ចិត្តំ ភវតោ បតិកុដតិ, តុត្តវេគហតំ វិយ.

៤៤. ‘‘ទិស្វាន វិវិធំ បាបំ, ឯវំ ចិន្តេសហំ តទា;

‘កទាហំ គេហា និក្ខម្ម, បវិសិស្សាមិ កាននំ’.

៤៥. ‘‘តទាបិ មំ និមន្តេសុំ, កាមភោគេហិ ញាតយោ;

តេសម្បិ ឆន្ទមាចិក្ខិំ, ‘មា និមន្តេថ តេហិ មំ’.

៤៦. ‘‘យោ មេ កនិដ្ឋកោ ភាតា, នន្ទោ នាមាសិ បណ្ឌិតោ;

សោបិ មំ អនុសិក្ខន្តោ, បព្ពជ្ជំ សមរោចយិ.

៤៧. ‘‘អហំ សោណោ ច នន្ទោ ច, ឧភោ មាតាបិតា មម;

តទាបិ ភោគេ ឆឌ្ឌេត្វា, បាវិសិម្ហា មហាវន’’ន្តិ.

សោណបណ្ឌិតចរិយំ បញ្ចមំ.