១. យុធញ្ជយចរិយា

១. ‘‘យទាហំ អមិតយសោ, រាជបុត្តោ យុធញ្ជយោ;

ឧស្សាវពិន្ទុំ សូរិយាតបេ, បតិតំ ទិស្វាន សំវិជិំ.

២. ‘‘តញ្ញេវាធិបតិំ កត្វា, សំវេគមនុព្រូហយិំ;

មាតាបិតូ ច វន្ទិត្វា, បព្ពជ្ជមនុយាចហំ.

៣. ‘‘យាចន្តិ មំ បញ្ជលិកា, សនេគមា សរដ្ឋកា;

‘អជ្ជេវ បុត្ត បដិបជ្ជ, ឥទ្ធំ ផីតំ មហាមហិំ’.

៤. ‘‘សរាជកេ សហោរោធេ, សនេគមេ សរដ្ឋកេ;

ករុណំ បរិទេវន្តេ, អនបេក្ខោវ បរិច្ចជិំ.

៥. ‘‘កេវលំ បថវិំ រជ្ជំ, ញាតិបរិជនំ យសំ;

ចជមានោ ន ចិន្តេសិំ, ពោធិយាយេវ ការណា.

៦. ‘‘មាតាបិតា ន មេ ទេស្សា, នបិ មេ ទេស្សំ មហាយសំ;

សព្ពញ្ញុតំ បិយំ មយ្ហំ, តស្មា រជ្ជំ បរិច្ចជិ’’ន្តិ.

យុធញ្ជយចរិយំ បឋមំ.