៨. ធម្មទេវបុត្តចរិយា

៦៦. ‘‘បុនាបរំ យទា ហោមិ, មហាបក្ខោ មហិទ្ធិកោ;

ធម្មោ នាម មហាយក្ខោ, សព្ពលោកានុកម្បកោ.

៦៧. ‘‘ទសកុសលកម្មបថេ, សមាទបេន្តោ មហាជនំ;

ចរាមិ គាមនិគមំ, សមិត្តោ សបរិជ្ជនោ.

៦៨. ‘‘បាបោ កទរិយោ យក្ខោ, ទីបេន្តោ ទស បាបកេ;

សោបេត្ថ មហិយា ចរតិ, សមិត្តោ សបរិជ្ជនោ.

៦៩. ‘‘ធម្មវាទី អធម្មោ ច, ឧភោ បច្ចនិកា មយំ;

ធុរេ ធុរំ ឃដ្ដយន្តា, សមិម្ហា បដិបថេ ឧភោ.

៧០. ‘‘កលហោ វត្តតី ភេស្មា, កល្យាណបាបកស្ស ច;

មគ្គា ឱក្កមនត្ថាយ, មហាយុទ្ធោ ឧបដ្ឋិតោ.

៧១. ‘‘យទិហំ តស្ស កុប្បេយ្យំ, យទិ ភិន្ទេ តបោគុណំ;

សហបរិជនំ តស្ស, រជភូតំ ករេយ្យហំ.

៧២. ‘‘អបិចាហំ សីលរក្ខាយ, និព្ពាបេត្វាន មានសំ;

សហ ជនេនោក្កមិត្វា, បថំ បាបស្ស ទាសហំ.

៧៣. ‘‘សហ បថតោ ឱក្កន្តេ, កត្វា ចិត្តស្ស និព្ពុតិំ;

វិវរំ អទាសិ បថវី, បាបយក្ខស្ស តាវទេ’’តិ.

ធម្មទេវបុត្តចរិយំ អដ្ឋមំ.