៣. ចម្បេយ្យនាគចរិយា

២០. ‘‘បុនាបរំ យទា ហោមិ, ចម្បេយ្យកោ មហិទ្ធិកោ;

តទាបិ ធម្មិកោ អាសិំ, សីលព្ពតសមប្បិតោ.

២១. ‘‘តទាបិ មំ ធម្មចារិំ, ឧបវុត្ថំ ឧបោសថំ;

អហិតុណ្ឌិកោ គហេត្វាន, រាជទ្វារម្ហិ កីឡតិ.

២២. ‘‘យំ យំ សោ វណ្ណំ ចិន្តយិ, នីលំវ បីតលោហិតំ;

តស្ស ចិត្តានុវត្តន្តោ, ហោមិ ចិន្តិតសន្និភោ.

២៣. ‘‘ថលំ ករេយ្យមុទកំ, ឧទកម្បិ ថលំ ករេ;

យទិហំ តស្ស បកុប្បេយ្យំ, ខណេន ឆារិកំ ករេ.

២៤. ‘‘យទិ ចិត្តវសី ហេស្សំ, បរិហាយិស្សាមិ សីលតោ;

សីលេន បរិហីនស្ស, ឧត្តមត្ថោ ន សិជ្ឈតិ.

២៥. ‘‘កាមំ ភិជ្ជតុយំ កាយោ, ឥធេវ វិកិរីយតុ;

នេវ សីលំ បភិន្ទេយ្យំ, វិកិរន្តេ ភុសំ វិយា’’តិ.

ចម្បេយ្យនាគចរិយំ តតិយំ.