៩. អនោមទស្សីពុទ្ធវំសោ

១. សោភិតស្ស អបរេន, សម្ពុទ្ធោ ទ្វិបទុត្តមោ;

អនោមទស្សី អមិតយសោ, តេជស្សី ទុរតិក្កមោ.

២. សោ ឆេត្វា ពន្ធនំ សព្ពំ, វិទ្ធំសេត្វា តយោ ភវេ;

អនិវត្តិគមនំ មគ្គំ, ទេសេសិ ទេវមានុសេ.

៣. សាគរោវ អសង្ខោភោ, បព្ពតោវ ទុរាសទោ;

អាកាសោវ អនន្តោ សោ, សាលរាជាវ ផុល្លិតោ.

៤. ទស្សនេនបិ តំ ពុទ្ធំ, តោសិតា ហោន្តិ បាណិនោ;

ព្យាហរន្តំ គិរំ សុត្វា, អមតំ បាបុណន្តិ តេ.

៥. ធម្មាភិសមយោ តស្ស, ឥទ្ធោ ផីតោ តទា អហុ;

កោដិសតានិ អភិសមិំសុ, បឋមេ ធម្មទេសនេ.

៦. តតោ បរំ អភិសមយេ, វស្សន្តេ ធម្មវុដ្ឋិយោ;

អសីតិកោដិយោភិសមិំសុ, ទុតិយេ ធម្មទេសនេ.

៧. តតោបរញ្ហិ វស្សន្តេ, តប្បយន្តេ ច បាណិនំ;

អដ្ឋសត្តតិកោដីនំ, តតិយាភិសមយោ អហុ.

៨. សន្និបាតា តយោ អាសុំ, តស្សាបិ ច មហេសិនោ;

អភិញ្ញាពលប្បត្តានំ, បុប្ផិតានំ វិមុត្តិយា.

៩. អដ្ឋសតសហស្សានំ, សន្និបាតោ តទា អហុ;

បហីនមទមោហានំ, សន្តចិត្តាន តាទិនំ.

១០. សត្តសតសហស្សានំ, ទុតិយោ អាសិ សមាគមោ;

អនង្គណានំ វិរជានំ, ឧបសន្តាន តាទិនំ.

១១. ឆន្នំ សតសហស្សានំ, តតិយោ អាសិ សមាគមោ;

អភិញ្ញាពលប្បត្តានំ, និព្ពុតានំ តបស្សិនំ.

១២. អហំ តេន សមយេន, យក្ខោ អាសិំ មហិទ្ធិកោ;

នេកានំ យក្ខកោដីនំ, វសវត្តិម្ហិ ឥស្សរោ.

១៣. តទាបិ តំ ពុទ្ធវរំ, ឧបគន្ត្វា មហេសិនំ;

អន្នបានេន តប្បេសិំ, សសង្ឃំ លោកនាយកំ.

១៤. សោបិ មំ តទា ព្យាកាសិ, វិសុទ្ធនយនោ មុនិ;

‘‘អបរិមេយ្យិតោ កប្បេ, អយំ ពុទ្ធោ ភវិស្សតិ.

១៥. ‘‘បធានំ បទហិត្វាន…បេ… ហេស្សាម សម្មុខា ឥមំ’’.

១៦. តស្សាបិ វចនំ សុត្វា, ហដ្ឋោ សំវិគ្គមានសោ;

ឧត្តរិំ វតមធិដ្ឋាសិំ, ទសបារមិបូរិយា.

១៧. នគរំ ចន្ទវតី នាម, យសវា នាម ខត្តិយោ;

មាតា យសោធរា នាម, អនោមទស្សិស្ស សត្ថុនោ.

១៨. ទសវស្សសហស្សានិ, អគារំ អជ្ឈ សោ វសិ;

សិរី ឧបសិរី វឌ្ឍោ, តយោ បាសាទមុត្តមា.

១៩. តេវីសតិសហស្សានិ, នារិយោ សមលង្កតា;

សិរិមា នាម សា នារី, ឧបវាណោ នាម អត្រជោ.

២០. និមិត្តេ ចតុរោ ទិស្វា, សិវិកាយាភិនិក្ខមិ;

អនូនទសមាសានិ, បធានំ បទហី ជិនោ.

២១. ព្រហ្មុនា យាចិតោ សន្តោ, អនោមទស្សី មហាមុនិ;

វត្តិ ចក្កំ មហាវីរោ, ឧយ្យានេ សោ សុទស្សនេ [សុទស្សនុយ្យានមុត្តមេ (ស្យា. កំ.)].

២២. និសភោ ច អនោមោ ច [អសោកោ ច (សី.)], អហេសុំ អគ្គសាវកា;

វរុណោ នាមុបដ្ឋាកោ, អនោមទស្សិស្ស សត្ថុនោ.

២៣. សុន្ទរី ច សុមនា ច, អហេសុំ អគ្គសាវិកា;

ពោធិ តស្ស ភគវតោ, អជ្ជុនោតិ បវុច្ចតិ.

២៤. នន្ទិវឌ្ឍោ សិរិវឌ្ឍោ, អហេសុំ អគ្គុបដ្ឋកា;

ឧប្បលា ចេវ បទុមា ច, អហេសុំ អគ្គុបដ្ឋិកា.

២៥. អដ្ឋបណ្ណាសរតនំ, អច្ចុគ្គតោ មហាមុនិ;

បភា និទ្ធាវតី តស្ស, សតរំសីវ ឧគ្គតោ.

២៦. វស្សសតសហស្សានិ, អាយុ វិជ្ជតិ តាវទេ;

តាវតា តិដ្ឋមានោ សោ, តារេសិ ជនតំ ពហុំ.

២៧. សុបុប្ផិតំ បាវចនំ, អរហន្តេហិ តាទិហិ;

វីតរាគេហិ វិមលេហិ, សោភិត្ថ ជិនសាសនំ.

២៨. សោ ច សត្ថា អមិតយសោ, យុគានិ តានិ អតុលិយានិ;

សព្ពំ តមន្តរហិតំ, ននុ រិត្តា សព្ពសង្ខារា.

២៩. អនោមទស្សី ជិនោ សត្ថា, ធម្មារាមម្ហិ និព្ពុតោ;

តត្ថេវស្ស ជិនថូបោ, ឧព្ពេធោ បញ្ចវីសតីតិ.

អនោមទស្សិស្ស ភគវតោ វំសោ សត្តមោ.