១០. បទុមពុទ្ធវំសោ

១. អនោមទស្សិស្ស អបរេន, សម្ពុទ្ធោ ទ្វិបទុត្តមោ;

បទុមោ នាម នាមេន, អសមោ អប្បដិបុគ្គលោ.

២. តស្សាបិ អសមំ សីលំ, សមាធិបិ អនន្តកោ;

អសង្ខេយ្យំ ញាណវរំ, វិមុត្តិបិ អនូបមា.

៣. តស្សាបិ អតុលតេជស្ស, ធម្មចក្កប្បវត្តនេ;

អភិសមយា តយោ អាសុំ, មហាតមបវាហនា.

៤. បឋមាភិសមយេ ពុទ្ធោ, កោដិសតមពោធយិ;

ទុតិយាភិសមយេ ធីរោ, នវុតិកោដិមពោធយិ.

៥. យទា ច បទុមោ ពុទ្ធោ, ឱវទី សកមត្រជំ;

តទា អសីតិកោដីនំ, តតិយាភិសមយោ អហុ.

៦. សន្និបាតា តយោ អាសុំ, បទុមស្ស មហេសិនោ;

កោដិសតសហស្សានំ, បឋមោ អាសិ សមាគមោ.

៧. កថិនត្ថារសមយេ, ឧប្បន្នេ កថិនចីវរេ;

ធម្មសេនាបតិត្ថាយ, ភិក្ខូ សិព្ពិំសុ [យាចិំសុ (ក.)] ចីវរំ.

៨. តទា តេ វិមលា ភិក្ខូ, ឆឡភិញ្ញា មហិទ្ធិកា;

តីណិ សតសហស្សានិ, សមិំសុ អបរាជិតា.

៩. បុនាបរំ សោ នរាសភោ [នរវុសភោ (ស្យា. កំ.)], បវនេ វាសំ ឧបាគមិ;

តទា សមាគមោ អាសិ, ទ្វិន្នំ សតសហស្សិនំ.

១០. អហំ តេន សមយេន, សីហោ អាសិំ មិគាធិភូ;

វិវេកមនុព្រូហន្តំ, បវនេ អទ្ទសំ ជិនំ.

១១. វន្ទិត្វា សិរសា បាទេ, កត្វាន តំ បទក្ខិណំ;

តិក្ខត្តុំ អភិនាទិត្វា, សត្តាហំ ជិនមុបដ្ឋហំ.

១២. សត្តាហំ វរសមាបត្តិយា, វុដ្ឋហិត្វា តថាគតោ;

មនសា ចិន្តយិត្វាន, កោដិភិក្ខូ សមានយិ.

១៣. តទាបិ សោ មហាវីរោ, តេសំ មជ្ឈេ វិយាករិ;

‘‘អបរិមេយ្យិតោ កប្បេ, អយំ ពុទ្ធោ ភវិស្សតិ.

១៤. ‘‘បធានំ បទហិត្វាន…បេ… ហេស្សាម សម្មុខា ឥមំ’’.

១៥. តស្សាបិ វចនំ សុត្វា, ភិយ្យោ ចិត្តំ បសាទយិំ;

ឧត្តរិំ វតមធិដ្ឋាសិំ, ទសបារមិបូរិយា.

១៦. ចម្បកំ នាម នគរំ, អសមោ នាម ខត្តិយោ;

អសមា នាម ជនិកា, បទុមស្ស មហេសិនោ.

១៧. ទសវស្សសហស្សានិ, អគារំ អជ្ឈ សោ វសិ;

នន្ទាវសុយសុត្តរា, តយោ បាសាទមុត្តមា.

១៨. តេត្តិំស ច សហស្សានិ, នារិយោ សមលង្កតា;

ឧត្តរា នាម សា នារី, រម្មោ នាមាសិ អត្រជោ.

១៩. និមិត្តេ ចតុរោ ទិស្វា, រថយានេន និក្ខមិ;

អនូនអដ្ឋមាសានិ, បធានំ បទហី ជិនោ.

២០. ព្រហ្មុនា យាចិតោ សន្តោ, បទុមោ លោកនាយកោ;

វត្តិ ចក្កំ មហាវីរោ, ធនញ្ចុយ្យានមុត្តមេ.

២១. សាលោ ច ឧបសាលោ ច, អហេសុំ អគ្គសាវកា;

វរុណោ នាមុបដ្ឋាកោ, បទុមស្ស មហេសិនោ.

២២. រាធា ចេវ សុរាធា ច, អហេសុំ អគ្គសាវិកា;

ពោធិ តស្ស ភគវតោ, មហាសោណោតិ វុច្ចតិ.

២៣. ភិយ្យោ ចេវ អសមោ ច, អហេសុំ អគ្គុបដ្ឋកា;

រុចី ច នន្ទរាមា ច, អហេសុំ អគ្គុបដ្ឋិកា.

២៤. អដ្ឋបណ្ណាសរតនំ, អច្ចុគ្គតោ មហាមុនិ;

បភា និទ្ធាវតី តស្ស, អសមា សព្ពសោ ទិសា.

២៥. ចន្ទប្បភា សូរិយប្បភា, រតនគ្គិមណិប្បភា;

សព្ពាបិ តា ហតា ហោន្តិ, បត្វា ជិនបភុត្តមំ.

២៦. វស្សសតសហស្សានិ, អាយុ វិជ្ជតិ តាវទេ;

តាវតា តិដ្ឋមានោ សោ, តារេសិ ជនតំ ពហុំ.

២៧. បរិបក្កមានសេ សត្តេ, ពោធយិត្វា អសេសតោ;

សេសកេ អនុសាសិត្វា, និព្ពុតោ សោ សសាវកោ.

២៨. ឧរគោវ តចំ ជិណ្ណំ, វទ្ធបត្តំវ បាទបោ;

ជហិត្វា សព្ពសង្ខារេ, និព្ពុតោ សោ យថា សិខី.

២៩. បទុមោ ជិនវរោ សត្ថា, ធម្មារាមម្ហិ និព្ពុតោ;

ធាតុវិត្ថារិកំ អាសិ, តេសុ តេសុ បទេសតោតិ.

បទុមស្ស ភគវតោ វំសោ អដ្ឋមោ.