១១. នារទពុទ្ធវំសោ

១. បទុមស្ស អបរេន, សម្ពុទ្ធោ ទ្វិបទុត្តមោ;

នារទោ នាម នាមេន, អសមោ អប្បដិបុគ្គលោ.

២. សោ ពុទ្ធោ ចក្កវត្តិស្ស, ជេដ្ឋោ ទយិតឱរសោ;

អាមុក្កមាលាភរណោ, ឧយ្យានំ ឧបសង្កមិ.

៣. តត្ថាសិ រុក្ខោ យសវិបុលោ, អភិរូបោ ព្រហា សុចិ;

តមជ្ឈបត្វា ឧបនិសីទិ, មហាសោណស្ស ហេដ្ឋតោ.

៤. តត្ថ ញាណវរុប្បជ្ជិ, អនន្តំ វជិរូបមំ;

តេន វិចិនិ សង្ខារេ, ឧក្កុជ្ជមវកុជ្ជកំ [កុជ្ជតំ (ស្យា. កំ.)].

៥. តត្ថ សព្ពកិលេសានិ, អសេសមភិវាហយិ;

បាបុណី កេវលំ ពោធិំ, ពុទ្ធញាណេ ច ចុទ្ទស.

៦. បាបុណិត្វាន សម្ពោធិំ, ធម្មចក្កំ បវត្តយិ;

កោដិសតសហស្សានំ, បឋមាភិសមយោ អហុ.

៧. មហាទោណំ នាគរាជំ, វិនយន្តោ មហាមុនិ;

បាដិហេរំ តទាកាសិ, ទស្សយន្តោ សទេវកេ.

៨. តទា ទេវមនុស្សានំ, តម្ហិ ធម្មប្បកាសនេ;

នវុតិកោដិសហស្សានិ, តរិំសុ សព្ពសំសយំ.

៩. យម្ហិ កាលេ មហាវីរោ, ឱវទី សកមត្រជំ;

អសីតិកោដិសហស្សានំ, តតិយាភិសមយោ អហុ.

១០. សន្និបាតា តយោ អាសុំ, នារទស្ស មហេសិនោ;

កោដិសតសហស្សានំ, បឋមោ អាសិ សមាគមោ.

១១. យទា ពុទ្ធោ ពុទ្ធគុណំ, សនិទានំ បកាសយិ;

នវុតិកោដិសហស្សានិ, សមិំសុ វិមលា តទា.

១២. យទា វេរោចនោ នាគោ, ទានំ ទទាតិ សត្ថុនោ;

តទា សមិំសុ ជិនបុត្តា, អសីតិសតសហស្សិយោ.

១៣. អហំ តេន សមយេន, ជដិលោ ឧគ្គតាបនោ;

អន្តលិក្ខចរោ អាសិំ, បញ្ចាភិញ្ញាសុ បារគូ.

១៤. តទាបាហំ អសមសមំ, សសង្ឃំ សបរិជ្ជនំ;

អន្នបានេន តប្បេត្វា, ចន្ទនេនាភិបូជយិំ.

១៥. សោបិ មំ តទា ព្យាកាសិ, នារទោ លោកនាយកោ;

‘‘អបរិមេយ្យិតោ កប្បេ, អយំ ពុទ្ធោ ភវិស្សតិ.

១៦. ‘‘បធានំ បទហិត្វាន…បេ… ហេស្សាម សម្មុខា ឥមំ’’.

១៧. តស្សាបិ វចនំ សុត្វា, ភិយ្យោ ហាសេត្វ មានសំ;

អធិដ្ឋហិំ វតំ ឧគ្គំ, ទសបារមិបូរិយា.

១៨. នគរំ ធញ្ញវតី នាម, សុទេវោ នាម ខត្តិយោ;

អនោមា នាម ជនិកា, នារទស្ស មហេសិនោ.

១៩. នវវស្សសហស្សានិ, អគារំ អជ្ឈ សោ វសិ;

ជិតោ វិជិតាភិរាមោ, តយោ បាសាទមុត្តមា.

២០. តិចត្តារីសសហស្សានិ, នារិយោ សមលង្កតា;

វិជិតសេនា នាម នារី, នន្ទុត្តរោ នាម អត្រជោ.

២១. និមិត្តេ ចតុរោ ទិស្វា, បទសា គមនេន និក្ខមិ;

សត្តាហំ បធានចារំ, អចរី បុរិសុត្តមោ [លោកនាយកោ (សី. ក.)].

២២. ព្រហ្មុនា យាចិតោ សន្តោ, នារទោ លោកនាយកោ;

វត្តិ ចក្កំ មហាវីរោ, ធនញ្ចុយ្យានមុត្តមេ.

២៣. ភទ្ទសាលោ ជិតមិត្តោ, អហេសុំ អគ្គសាវកា;

វាសេដ្ឋោ នាមុបដ្ឋាកោ, នារទស្ស មហេសិនោ.

២៤. ឧត្តរា ផគ្គុនី ចេវ, អហេសុំ អគ្គសាវិកា;

ពោធិ តស្ស ភគវតោ, មហាសោណោតិ វុច្ចតិ.

២៥. ឧគ្គរិន្ទោ វសភោ ច, អហេសុំ អគ្គុបដ្ឋកា;

ឥន្ទាវរី ច វណ្ឌី [ឧន្ទី (សី.), គណ្ឌី (ស្យា. កំ.)] ច, អហេសុំ អគ្គុបដ្ឋិកា.

២៦. អដ្ឋាសីតិរតនានិ, អច្ចុគ្គតោ មហាមុនិ;

កញ្ចនគ្ឃិយសង្កាសោ, ទសសហស្សី វិរោចតិ.

២៧. តស្ស ព្យាមប្បភា កាយា, និទ្ធាវតិ ទិសោទិសំ;

និរន្តរំ ទិវារត្តិំ, យោជនំ ផរតេ សទា.

២៨. ន កេចិ តេន សមយេន, សមន្តា យោជនេ ជនា;

ឧក្កាបទីបេ ឧជ្ជាលេន្តិ, ពុទ្ធរំសីហិ ឱត្ថដា.

២៩. នវុតិវស្សសហស្សានិ, អាយុ វិជ្ជតិ តាវទេ;

តាវតា តិដ្ឋមានោ សោ, តារេសិ ជនតំ ពហុំ.

៣០. យថា ឧឡូហិ គគនំ, វិចិត្តំ ឧបសោភតិ;

តថេវ សាសនំ តស្ស, អរហន្តេហិ សោភតិ.

៣១. សំសារសោតំ តរណាយ, សេសកេ បដិបន្នកេ;

ធម្មសេតុំ ទឡ្ហំ កត្វា, និព្ពុតោ សោ នរាសភោ.

៣២. សោបិ ពុទ្ធោ អសមសមោ, តេបិ ខីណាសវា អតុលតេជា;

សព្ពំ តមន្តរហិតំ, ននុ រិត្តា សព្ពសង្ខារា.

៣៣. នារទោ ជិនវសភោ, និព្ពុតោ សុទស្សនេ បុរេ;

តត្ថេវស្ស ថូបវរោ, ចតុយោជនមុគ្គតោតិ.

នារទស្ស ភគវតោ វំសោ នវមោ.