១២. បទុមុត្តរពុទ្ធវំសោ

១. នារទស្ស អបរេន, សម្ពុទ្ធោ ទ្វិបទុត្តមោ;

បទុមុត្តរោ នាម ជិនោ, អក្ខោភោ សាគរូបមោ.

២. មណ្ឌកប្បោវ សោ អាសិ, យម្ហិ ពុទ្ធោ អជាយថ;

ឧស្សន្នកុសលា ជនតា, តម្ហិ កប្បេ អជាយថ.

៣. បទុមុត្តរស្ស ភគវតោ, បឋមេ ធម្មទេសនេ;

កោដិសតសហស្សានំ, ធម្មាភិសមយោ អហុ.

៤. តតោ បរម្បិ វស្សន្តេ, តប្បយន្តេ ច បាណិនេ;

សត្តតិំសសតសហស្សានំ, ទុតិយាភិសមយោ អហុ.

៥. យម្ហិ កាលេ មហាវីរោ, អានន្ទំ ឧបសង្កមិ;

បិតុសន្តិកំ ឧបគន្ត្វា, អាហនី អមតទុន្ទុភិំ.

៦. អាហតេ អមតភេរិម្ហិ, វស្សន្តេ ធម្មវុដ្ឋិយា;

បញ្ញាសសតសហស្សានំ, តតិយាភិសមយោ អហុ.

៧. ឱវាទកោ វិញ្ញាបកោ, តារកោ សព្ពបាណិនំ;

ទេសនាកុសលោ ពុទ្ធោ, តារេសិ ជនតំ ពហុំ.

៨. សន្និបាតា តយោ អាសុំ, បទុមុត្តរស្ស សត្ថុនោ;

កោដិសតសហស្សានំ, បឋមោ អាសិ សមាគមោ.

៩. យទា ពុទ្ធោ អសមសមោ, វសិ វេភារបព្ពតេ;

នវុតិកោដិសហស្សានំ, ទុតិយោ អាសិ សមាគមោ.

១០. បុន ចារិកំ បក្កន្តេ, គាមនិគមរដ្ឋតោ;

អសីតិកោដិសហស្សានំ, តតិយោ អាសិ សមាគមោ.

១១. អហំ តេន សមយេន, ជដិលោ នាម រដ្ឋិកោ;

សម្ពុទ្ធប្បមុខំ សង្ឃំ, សភត្តំ ទុស្សមទាសហំ.

១២. សោបិ មំ ពុទ្ធោ ព្យាកាសិ, សង្ឃមជ្ឈេ និសីទិយ;

‘‘សតសហស្សិតោ កប្បេ, អយំ ពុទ្ធោ ភវិស្សតិ.

១៣. ‘‘បធានំ បទហិត្វាន…បេ… ហេស្សាម សម្មុខា ឥមំ’’.

១៤. តស្សាបិ វចនំ សុត្វា, ឧត្តរិំ វតមធិដ្ឋហិំ;

អកាសិំ ឧគ្គទឡ្ហំ ធិតិំ, ទសបារមិបូរិយា.

១៥. ព្យាហតា តិត្ថិយា សព្ពេ, វិមនា ទុម្មនា តទា;

ន តេសំ កេចិ បរិចរន្តិ, រដ្ឋតោ និច្ឆុភន្តិ តេ.

១៦. សព្ពេ តត្ថ សមាគន្ត្វា, ឧបគច្ឆុំ ពុទ្ធសន្តិកេ;

តុវំ នាថោ មហាវីរ, សរណំ ហោហិ ចក្ខុម.

១៧. អនុកម្បកោ ការុណិកោ, ហិតេសី សព្ពបាណិនំ;

សម្បត្តេ តិត្ថិយេ សព្ពេ, បញ្ចសីលេ បតិដ្ឋបិ.

១៨. ឯវំ និរាកុលំ អាសិ, សុញ្ញតំ តិត្ថិយេហិ តំ;

វិចិត្តំ អរហន្តេហិ, វសីភូតេហិ តាទិហិ.

១៩. នគរំ ហំសវតី នាម, អានន្ទោ នាម ខត្តិយោ;

សុជាតា នាម ជនិកា, បទុមុត្តរស្ស សត្ថុនោ.

២០. ទសវស្សសហស្សានិ, អគារំ អជ្ឈ សោ វសិ;

នរវាហនោ យសោ វសវត្តី [នារិវាហនោ យសវតី (ស្យា. កំ.)], តយោ បាសាទមុត្តមា.

២១. តិចត្តារីសសហស្សានិ, នារិយោ សមលង្កតា;

វសុទត្តា នាម នារី, ឧត្តមោ នាម អត្រជោ.

២២. និមិត្តេ ចតុរោ ទិស្វា, បាសាទេនាភិនិក្ខមិ;

សត្តាហំ បធានចារំ, អចរី បុរិសុត្តមោ.

២៣. ព្រហ្មុនា យាចិតោ សន្តោ, បទុមុត្តរោ វិនាយកោ;

វត្តិ ចក្កំ មហាវីរោ, មិថិលុយ្យានមុត្តមេ.

២៤. ទេវលោ ច សុជាតោ ច, អហេសុំ អគ្គសាវកា;

សុមនោ នាមុបដ្ឋាកោ, បទុមុត្តរស្ស មហេសិនោ.

២៥. អមិតា ច អសមា ច, អហេសុំ អគ្គសាវិកា;

ពោធិ តស្ស ភគវតោ, សលលោតិ បវុច្ចតិ.

២៦. វិតិណ្ណោ ចេវ [អមិតោ ចេវ (ស្យា.)] តិស្សោ ច, អហេសុំ អគ្គុបដ្ឋកា;

ហដ្ឋា ចេវ វិចិត្តា ច, អហេសុំ អគ្គុបដ្ឋិកា.

២៧. អដ្ឋបណ្ណាសរតនំ, អច្ចុគ្គតោ មហាមុនិ;

កញ្ចនគ្ឃិយសង្កាសោ, ទ្វត្តិំសវរលក្ខណោ.

២៨. កុដ្ដា កវាដា ភិត្តី ច, រុក្ខា នគសិលុច្ចយា;

ន តស្សាវរណំ អត្ថិ, សមន្តា ទ្វាទសយោជនេ.

២៩. វស្សសតសហស្សានិ, អាយុ វិជ្ជតិ តាវទេ;

តាវតា តិដ្ឋមានោ សោ, តារេសិ ជនតំ ពហុំ.

៣០. សន្តារេត្វា ពហុជនំ, ឆិន្ទិត្វា សព្ពសំសយំ;

ជលិត្វា អគ្គិក្ខន្ធោវ និព្ពុតោ សោ សសាវកោ.

៣១. បទុមុត្តរោ ជិនោ ពុទ្ធោ, នន្ទារាមម្ហិ និព្ពុតោ;

តត្ថេវស្ស ថូបវរោ, ទ្វាទសុព្ពេធយោជនោតិ.

បទុមុត្តរស្ស ភគវតោ វំសោ ទសមោ.