១៣. សុមេធពុទ្ធវំសោ

១. បទុមុត្តរស្ស អបរេន, សុមេធោ នាម នាយកោ;

ទុរាសទោ ឧគ្គតេជោ, សព្ពលោកុត្តមោ មុនិ.

២. បសន្ននេត្តោ សុមុខោ, ព្រហា ឧជុ បតាបវា;

ហិតេសី សព្ពសត្តានំ, ពហូ មោចេសិ ពន្ធនា.

៣. យទា ពុទ្ធោ បាបុណិត្វា, កេវលំ ពោធិមុត្តមំ;

សុទស្សនម្ហិ នគរេ, ធម្មចក្កំ បវត្តយិ.

៤. តស្សាបិ អភិសមយា តីណិ, អហេសុំ ធម្មទេសនេ;

កោដិសតសហស្សានំ, បឋមាភិសមយោ អហុ.

៥. បុនាបរំ កុម្ភកណ្ណំ, យក្ខំ សោ ទមយី ជិនោ;

នវុតិកោដិសហស្សានំ, ទុតិយាភិសមយោ អហុ.

៦. បុនាបរំ អមិតយសោ, ចតុសច្ចំ បកាសយិ;

អសីតិកោដិសហស្សានំ, តតិយាភិសមយោ អហុ.

៧. សន្និបាតា តយោ អាសុំ, សុមេធស្ស មហេសិនោ;

ខីណាសវានំ វិមលានំ, សន្តចិត្តាន តាទិនំ.

៨. សុទស្សនំ នាម នគរំ, ឧបគញ្ឆិ ជិនោ យទា;

តទា ខីណាសវា ភិក្ខូ, សមិំសុ សតកោដិយោ.

៩. បុនាបរំ ទេវកូដេ, ភិក្ខូនំ កថិនត្ថតេ;

តទា នវុតិកោដីនំ, ទុតិយោ អាសិ សមាគមោ.

១០. បុនាបរំ ទសពលោ, យទា ចរតិ ចារិកំ;

តទា អសីតិកោដីនំ, តតិយោ អាសិ សមាគមោ.

១១. អហំ តេន សមយេន, ឧត្តរោ នាម មាណវោ;

អសីតិកោដិយោ មយ្ហំ, ឃរេ សន្និចិតំ ធនំ.

១២. កេវលំ សព្ពំ ទត្វាន, សសង្ឃេ លោកនាយកេ;

សរណំ តស្សុបគញ្ឆិំ, បព្ពជ្ជញ្ចាភិរោចយិំ.

១៣. សោបិ មំ ពុទ្ធោ ព្យាកាសិ, ករោន្តោ អនុមោទនំ;

‘‘តិំសកប្បសហស្សម្ហិ, អយំ ពុទ្ធោ ភវិស្សតិ.

១៤. ‘‘បធានំ បទហិត្វាន…បេ… ហេស្សាម សម្មុខា ឥមំ’’.

១៥. តស្សាបិ វចនំ សុត្វា, ភិយ្យោ ចិត្តំ បសាទយិំ;

ឧត្តរិំ វតមធិដ្ឋាសិំ, ទសបារមិបូរិយា.

១៦. សុត្តន្តំ វិនយញ្ចាបិ, នវង្គំ សត្ថុសាសនំ;

សព្ពំ បរិយាបុណិត្វាន, សោភយិំ ជិនសាសនំ.

១៧. តត្ថប្បមត្តោ វិហរន្តោ, និសជ្ជដ្ឋានចង្កមេ;

អភិញ្ញាសុ បារមិំ គន្ត្វា, ព្រហ្មលោកមគញ្ឆហំ.

១៨. សុទស្សនំ នាម នគរំ, សុទត្តោ នាម ខត្តិយោ;

សុទត្តា នាម ជនិកា, សុមេធស្ស មហេសិនោ.

១៩. នវវស្សសហស្សានិ, អគារំ អជ្ឈ សោ វសិ;

សុចន្ទកញ្ចនសិរិវឌ្ឍា, តយោ បាសាទមុត្តមា.

២០. តិសោឡសសហស្សានិ, នារិយោ សមលង្កតា;

សុមនា នាម សា នារី, បុនព្ពសុ នាម អត្រជោ.

២១. និមិត្តេ ចតុរោ ទិស្វា, ហត្ថិយានេន និក្ខមិ;

អនូនកំ អឌ្ឍមាសំ, បធានំ បទហី ជិនោ.

២២. ព្រហ្មុនា យាចិតោ សន្តោ, សុមេធោ លោកនាយកោ;

វត្តិ ចក្កំ មហាវីរោ, សុទស្សនុយ្យានមុត្តមេ.

២៣. សរណោ សព្ពកាមោ ច, អហេសុំ អគ្គសាវកា;

សាគរោ នាមុបដ្ឋាកោ, សុមេធស្ស មហេសិនោ.

២៤. រាមា ចេវ សុរាមា ច, អហេសុំ អគ្គសាវិកា;

ពោធិ តស្ស ភគវតោ, មហានីបោតិ វុច្ចតិ.

២៥. ឧរុវេលា យសវា ច, អហេសុំ អគ្គុបដ្ឋកា;

យសោធរា សិរិមា ច [យសា នាម សិរិមា ច (ស្យា. កំ.)], អហេសុំ អគ្គុបដ្ឋិកា.

២៦. អដ្ឋាសីតិរតនានិ, អច្ចុគ្គតោ មហាមុនិ;

ឱភាសេតិ ទិសា សព្ពា, ចន្ទោ តារគណេ យថា.

២៧. ចក្កវត្តិមណី នាម, យថា តបតិ យោជនំ;

តថេវ តស្ស រតនំ, សមន្តា ផរតិ យោជនំ.

២៨. នវុតិវស្សសហស្សានិ, អាយុ វិជ្ជតិ តាវទេ;

តាវតា តិដ្ឋមានោ សោ, តារេសិ ជនតំ ពហុំ.

២៩. តេវិជ្ជឆឡភិញ្ញេហិ, ពលប្បត្តេហិ តាទិហិ;

សមាកុលមិទំ អាសិ, អរហន្តេហិ សាធុហិ.

៣០. តេបិ សព្ពេ អមិតយសា, វិប្បមុត្តា និរូបធី;

ញាណាលោកំ ទស្សយិត្វា, និព្ពុតា តេ មហាយសា.

៣១. សុមេធោ ជិនវរោ ពុទ្ធោ, មេធារាមម្ហិ និព្ពុតោ;

ធាតុវិត្ថារិកំ អាសិ, តេសុ តេសុ បទេសតោតិ.

សុមេធស្ស ភគវតោ វំសោ ឯកាទសមោ.