១៤. សុជាតពុទ្ធវំសោ

១. តត្ថេវ មណ្ឌកប្បម្ហិ, សុជាតោ នាម នាយកោ;

សីហហនុសភក្ខន្ធោ, អប្បមេយ្យោ ទុរាសទោ.

២. ចន្ទោវ វិមលោ សុទ្ធោ, សតរំសីវ បតាបវា;

ឯវំ សោភតិ សម្ពុទ្ធោ, ជលន្តោ សិរិយា សទា.

៣. បាបុណិត្វាន សម្ពុទ្ធោ, កេវលំ ពោធិមុត្តមំ;

សុមង្គលម្ហិ នគរេ, ធម្មចក្កំ បវត្តយិ.

៤. ទេសេន្តេ [ទេសេន្តោ (ស្យា. កំ.)] បវរំ ធម្មំ, សុជាតេ លោកនាយកេ [សុជាតោ លោកនាយកោ (ស្យា. កំ.)];

អសីតិកោដី អភិសមិំសុ, បឋមេ ធម្មទេសនេ.

៥. យទា សុជាតោ អមិតយសោ, ទេវេ វស្សំ ឧបាគមិ;

សត្តតិំសសតសហស្សានំ, ទុតិយាភិសមយោ អហុ.

៦. យទា សុជាតោ អសមសមោ, ឧបគច្ឆិ បិតុសន្តិកំ;

សដ្ឋិសតសហស្សានំ [សត្តតិំសសហស្សានំ (សី.)], តតិយាភិសមយោ អហុ.

៧. សន្និបាតា តយោ អាសុំ, សុជាតស្ស មហេសិនោ;

ខីណាសវានំ វិមលានំ, សន្តចិត្តាន តាទិនំ.

៨. អភិញ្ញាពលប្បត្តានំ, អប្បត្តានំ ភវាភវេ;

សដ្ឋិសតសហស្សានិ, បឋមំ សន្និបតិំសុ តេ.

៩. បុនាបរំ សន្និបាតេ, តិទិវោរោហណេ ជិនេ;

បញ្ញាសសតសហស្សានំ, ទុតិយោ អាសិ សមាគមោ.

១០. ឧបសង្កមន្តោ នរាសភំ, តស្ស យោ អគ្គសាវកោ;

ចតូហិ សតសហស្សេហិ, សម្ពុទ្ធំ ឧបសង្កមិ.

១១. អហំ តេន សមយេន, ចតុទីបម្ហិ ឥស្សរោ;

អន្តលិក្ខចរោ អាសិំ, ចក្កវត្តី មហព្ពលោ.

១២. លោកេ អច្ឆរិយំ ទិស្វា, អព្ភុតំ លោមហំសនំ;

ឧបគន្ត្វាន វន្ទិំ សោ, សុជាតំ លោកនាយកំ.

១៣. ចតុទីបេ មហារជ្ជំ, រតនេ សត្ត ឧត្តមេ;

ពុទ្ធេ និយ្យាទយិត្វាន, បព្ពជិំ តស្ស សន្តិកេ.

១៤. អារាមិកា ជនបទេ, ឧដ្ឋានំ បដិបិណ្ឌិយ;

ឧបនេន្តិ ភិក្ខុសង្ឃស្ស, បច្ចយំ សយនាសនំ.

១៥. សោបិ មំ ពុទ្ធោ [តទា (ស្យា. កំ.)] ព្យាកាសិ, ទសសហស្សិម្ហិ ឥស្សរោ;

‘‘តិំសកប្បសហស្សម្ហិ, អយំ ពុទ្ធោ ភវិស្សតិ.

១៦. ‘‘បធានំ បទហិត្វាន…បេ… ហេស្សាម សម្មុខា ឥមំ’’.

១៧. តស្សាបិ វចនំ សុត្វា, ភិយ្យោ ហាសំ ជនេសហំ;

អធិដ្ឋហិំ វតំ ឧគ្គំ, ទសបារមិបូរិយា.

១៨. សុត្តន្តំ វិនយញ្ចាបិ, នវង្គំ សត្ថុសាសនំ;

សព្ពំ បរិយាបុណិត្វាន, សោភយិំ ជិនសាសនំ.

១៩. តត្ថប្បមត្តោ វិហរន្តោ, ព្រហ្មំ ភាវេត្វ ភាវនំ;

អភិញ្ញាបារមិំ គន្ត្វា, ព្រហ្មលោកមគញ្ឆហំ.

២០. សុមង្គលំ នាម នគរំ, ឧគ្គតោ នាម ខត្តិយោ;

មាតា បភាវតី នាម, សុជាតស្ស មហេសិនោ.

២១. នវវស្សសហស្សានិ, អគារំ អជ្ឈ សោ វសិ;

សិរី ឧបសិរី នន្ទោ, តយោ បាសាទមុត្តមា.

២២. តេវីសតិសហស្សានិ, នារិយោ សមលង្កតា;

សិរិនន្ទា នាម នារី, ឧបសេនោ នាម អត្រជោ.

២៣. និមិត្តេ ចតុរោ ទិស្វា, អស្សយានេន និក្ខមិ;

អនូននវមាសានិ, បធានំ បទហី ជិនោ.

២៤. ព្រហ្មុនា យាចិតោ សន្តោ, សុជាតោ លោកនាយកោ;

វត្តិ ចក្កំ មហាវីរោ, សុមង្គលុយ្យានមុត្តមេ.

២៥. សុទស្សនោ សុទេវោ ច, អហេសុំ អគ្គសាវកា;

នារទោ នាមុបដ្ឋាកោ, សុជាតស្ស មហេសិនោ.

២៦. នាគា ច នាគសមាលា ច, អហេសុំ អគ្គសាវិកា;

ពោធិ តស្ស ភគវតោ, មហាវេឡូតិ វុច្ចតិ.

២៧. សោ ច រុក្ខោ ឃនក្ខន្ធោ [ឃនរុចិរោ (សី. ក.)], អច្ឆិទ្ទោ ហោតិ បត្តិកោ;

ឧជុ វំសោ ព្រហា ហោតិ, ទស្សនីយោ មនោរមោ.

២៨. ឯកក្ខន្ធោ បវឌ្ឍិត្វា, តតោ សាខា បភិជ្ជតិ;

យថា សុពទ្ធោ មោរហត្ថោ, ឯវំ សោភតិ សោ ទុមោ.

២៩. ន តស្ស កណ្ដកា ហោន្តិ, នាបិ ឆិទ្ទំ មហា អហុ;

វិត្ថិណ្ណសាខោ អវិរលោ, សន្ទច្ឆាយោ មនោរមោ.

៣០. សុទត្តោ ចេវ ចិត្តោ ច, អហេសុំ អគ្គុបដ្ឋកា;

សុភទ្ទា ច បទុមា ច, អហេសុំ អគ្គុបដ្ឋិកា.

៣១. បញ្ញាសរតនោ អាសិ, ឧច្ចត្តនេន សោ ជិនោ;

សព្ពាការវរូបេតោ, សព្ពគុណមុបាគតោ.

៣២. តស្ស បភា អសមសមា, និទ្ធាវតិ សមន្តតោ;

អប្បមាណោ អតុលិយោ, ឱបម្មេហិ អនូបមោ.

៣៣. នវុតិវស្សសហស្សានិ, អាយុ វិជ្ជតិ តាវទេ;

តាវតា តិដ្ឋមានោ សោ, តារេសិ ជនតំ ពហុំ.

៣៤. យថាបិ សាគរេ ឩមី, គគនេ តារកា យថា;

ឯវំ តទា បាវចនំ, អរហន្តេហិ ចិត្តិតំ [ចិត្តកំ (ស្យា. កំ.)].

៣៥. សោ ច ពុទ្ធោ អសមសមោ, គុណានិ ច តានិ អតុលិយានិ;

សព្ពំ តមន្តរហិតំ, ននុ រិត្តា សព្ពសង្ខារា.

៣៦. សុជាតោ ជិនវរោ ពុទ្ធោ, សិលារាមម្ហិ និព្ពុតោ;

តត្ថេវ តស្ស ចេតិយោ [តត្ថេវ ចេតិយោ សត្ថុ (ស្យា. កំ.)], តីណិគាវុតមុគ្គតោតិ.

សុជាតស្ស ភគវតោ វំសោ ទ្វាទសមោ.