១៥. បិយទស្សីពុទ្ធវំសោ

១. សុជាតស្ស អបរេន, សយម្ភូ លោកនាយកោ;

ទុរាសទោ អសមសមោ, បិយទស្សី មហាយសោ.

២. សោបិ ពុទ្ធោ អមិតយសោ, អាទិច្ចោវ វិរោចតិ;

សព្ពំ តមំ និហន្ត្វាន, ធម្មចក្កំ បវត្តយិ.

៣. តស្សាបិ អតុលតេជស្ស, អហេសុំ អភិសមយា តយោ;

កោដិសតសហស្សានំ, បឋមាភិសមយោ អហុ.

៤. សុទស្សនោ ទេវរាជា, មិច្ឆាទិដ្ឋិមរោចយិ;

តស្ស ទិដ្ឋិំ វិនោទេន្តោ, សត្ថា ធម្មមទេសយិ.

៥. ជនសន្និបាតោ អតុលោ, មហាសន្និបតី តទា;

នវុតិកោដិសហស្សានំ, ទុតិយាភិសមយោ អហុ.

៦. យទា ទោណមុខំ ហត្ថិំ, វិនេសិ នរសារថិ;

អសីតិកោដិសហស្សានំ, តតិយាភិសមយោ អហុ.

៧. សន្និបាតា តយោ អាសុំ, តស្សាបិ បិយទស្សិនោ;

កោដិសតសហស្សានំ, បឋមោ អាសិ សមាគមោ.

៨. តតោ បរំ នវុតិកោដី, សមិំសុ ឯកតោ មុនី;

តតិយេ សន្និបាតម្ហិ, អសីតិកោដិយោ អហូ.

៩. អហំ តេន សមយេន, កស្សបោ នាម ព្រាហ្មណោ [មានវោ (ស្យា. កំ.)];

អជ្ឈាយកោ មន្តធរោ, តិណ្ណំ វេទាន បារគូ.

១០. តស្ស ធម្មំ សុណិត្វាន, បសាទំ ជនយិំ អហំ;

កោដិសតសហស្សេហិ, សង្ឃារាមំ អមាបយិំ.

១១. តស្ស ទត្វាន អារាមំ, ហដ្ឋោ សំវិគ្គមានសោ;

សរណេ បញ្ច សីលេ ច [សរណំ បញ្ចសីលញ្ច (សី.)], ទឡ្ហំ កត្វា សមាទិយិំ.

១២. សោបិ មំ ពុទ្ធោ ព្យាកាសិ, សង្ឃមជ្ឈេ និសីទិយ;

‘‘អដ្ឋារសេ កប្បសតេ, អយំ ពុទ្ធោ ភវិស្សតិ.

១៣. ‘‘បធានំ បទហិត្វាន…បេ… ហេស្សាម សម្មុខា ឥមំ’’.

១៤. តស្សាបិ វចនំ សុត្វា, ភិយ្យោ ចិត្តំ បសាទយិំ;

ឧត្តរិំ វតមធិដ្ឋាសិំ, ទសបារមិបូរិយា.

១៥. សុធញ្ញំ នាម នគរំ, សុទត្តោ នាម ខត្តិយោ;

ចន្ទា នាមាសិ ជនិកា, បិយទស្សិស្ស សត្ថុនោ.

១៦. នវវស្សសហស្សានិ, អគារំ អជ្ឈ សោ វសិ;

សុនិម្មលវិមលគិរិគុហា, តយោ បាសាទមុត្តមា.

១៧. តេត្តិំសសហស្សានិ ច, នារិយោ សមលង្កតា;

វិមលា នាម នារី ច, កញ្ចនាវេឡោ នាម អត្រជោ.

១៨. និមិត្តេ ចតុរោ ទិស្វា, រថយានេន និក្ខមិ;

ឆមាសំ បធានចារំ, អចរី បុរិសុត្តមោ.

១៩. ព្រហ្មុនា យាចិតោ សន្តោ, បិយទស្សី មហាមុនិ;

វត្តិ ចក្កំ មហាវីរោ, ឧសភុយ្យានេ មនោរមេ.

២០. បាលិតោ សព្ពទស្សី ច, អហេសុំ អគ្គសាវកា;

សោភិតោ នាមុបដ្ឋាកោ, បិយទស្សិស្ស សត្ថុនោ.

២១. សុជាតា ធម្មទិន្នា ច, អហេសុំ អគ្គសាវិកា;

ពោធិ តស្ស ភគវតោ, កកុធោតិ បវុច្ចតិ.

២២. សន្ធកោ ធម្មកោ ចេវ, អហេសុំ អគ្គុបដ្ឋកា;

វិសាខា ធម្មទិន្នា ច, អហេសុំ អគ្គុបដ្ឋិកា.

២៣. សោបិ ពុទ្ធោ អមិតយសោ, ទ្វត្តិំសវរលក្ខណោ;

អសីតិហត្ថមុព្ពេធោ, សាលរាជាវ ទិស្សតិ.

២៤. អគ្គិចន្ទសូរិយានំ, នត្ថិ តាទិសិកា បភា;

យថា អហុ បភា តស្ស, អសមស្ស មហេសិនោ.

២៥. តស្សាបិ ទេវទេវស្ស, អាយុ តាវតកំ អហុ;

នវុតិវស្សសហស្សានិ, លោកេ អដ្ឋាសិ ចក្ខុមា.

២៦. សោបិ ពុទ្ធោ អសមសមោ, យុគានិបិ តានិ អតុលិយានិ;

សព្ពំ តមន្តរហិតំ, ននុ រិត្តា សព្ពសង្ខារា.

២៧. បិយទស្សី មុនិវរោ, អស្សត្ថារាមម្ហិ និព្ពុតោ;

តត្ថេវស្ស ជិនថូបោ, តីណិយោជនមុគ្គតោតិ.

បិយទស្សិស្ស ភគវតោ វំសោ តេរសមោ.