១៦. អត្ថទស្សីពុទ្ធវំសោ

១. តត្ថេវ មណ្ឌកប្បម្ហិ, អត្ថទស្សី មហាយសោ;

មហាតមំ និហន្ត្វាន, បត្តោ សម្ពោធិមុត្តមំ.

២. ព្រហ្មុនា យាចិតោ សន្តោ, ធម្មចក្កំ បវត្តយិ;

អមតេន តប្បយី លោកំ, ទសសហស្សិសទេវកំ.

៣. តស្សាបិ លោកនាថស្ស, អហេសុំ អភិសមយា តយោ;

កោដិសតសហស្សានំ, បឋមាភិសមយោ អហុ.

៤. យទា ពុទ្ធោ អត្ថទស្សី, ចរតេ ទេវចារិកំ;

កោដិសតសហស្សានំ, ទុតិយាភិសមយោ អហុ.

៥. បុនាបរំ យទា ពុទ្ធោ, ទេសេសិ បិតុសន្តិកេ;

កោដិសតសហស្សានំ, តតិយាភិសមយោ អហុ.

៦. សន្និបាតា តយោ អាសុំ, តស្សាបិ ច មហេសិនោ;

ខីណាសវានំ វិមលានំ, សន្តចិត្តាន តាទិនំ.

៧. អដ្ឋនវុតិសហស្សានំ, បឋមោ អាសិ សមាគមោ;

អដ្ឋាសីតិសហស្សានំ, ទុតិយោ អាសិ សមាគមោ.

៨. អដ្ឋសត្តតិសតសហស្សានំ, តតិយោ អាសិ សមាគមោ;

អនុបាទា វិមុត្តានំ, វិមលានំ មហេសិនំ.

៩. អហំ តេន សមយេន, ជដិលោ ឧគ្គតាបនោ;

សុសីមោ នាម នាមេន, មហិយា សេដ្ឋសម្មតោ.

១០. ទិព្ពំ មន្ទារវំ បុប្ផំ, បទុមំ បារិឆត្តកំ;

ទេវលោកាហរិត្វាន, សម្ពុទ្ធមភិបូជយិំ.

១១. សោបិ មំ ពុទ្ធោ ព្យាកាសិ, អត្ថទស្សី មហាមុនិ;

‘‘អដ្ឋារសេ កប្បសតេ, អយំ ពុទ្ធោ ភវិស្សតិ.

១២. ‘‘បធានំ បទហិត្វាន…បេ… ហេស្សាម សម្មុខា ឥមំ’’.

១៣. តស្សាបិ វចនំ សុត្វា, ហដ្ឋោ [តុដ្ឋោ (ស្យា. កំ.)] សំវិគ្គមានសោ;

ឧត្តរិំ វតមធិដ្ឋាសិំ, ទសបារមិបូរិយា.

១៤. សោភណំ នាម នគរំ, សាគរោ នាម ខត្តិយោ;

សុទស្សនា នាម ជនិកា, អត្ថទស្សិស្ស សត្ថុនោ.

១៥. ទសវស្សសហស្សានិ, អគារំ អជ្ឈ សោ វសិ;

អមរគិរិ សុគិរិ វាហនា, តយោ បាសាទមុត្តមា.

១៦. តេត្តិំសញ្ច សហស្សានិ, នារិយោ សមលង្កតា;

វិសាខា នាម នារី ច, សេលោ នាមាសិ អត្រជោ.

១៧. និមិត្តេ ចតុរោ ទិស្វា, អស្សយានេន និក្ខមិ;

អនូនអដ្ឋមាសានិ, បធានំ បទហី ជិនោ.

១៨. ព្រហ្មុនា យាចិតោ សន្តោ, អត្ថទស្សី មហាយសោ;

វត្តិ ចក្កំ មហាវីរោ, អនោមុយ្យានេ នរាសភោ.

១៩. សន្តោ ច ឧបសន្តោ ច, អហេសុំ អគ្គសាវកា;

អភយោ នាមុបដ្ឋាកោ, អត្ថទស្សិស្ស សត្ថុនោ.

២០. ធម្មា ចេវ សុធម្មា ច, អហេសុំ អគ្គសាវិកា;

ពោធិ តស្ស ភគវតោ, ចម្បកោតិ បវុច្ចតិ.

២១. នកុលោ ច និសភោ ច, អហេសុំ អគ្គុបដ្ឋកា;

មកិលា ច សុនន្ទា ច, អហេសុំ អគ្គុបដ្ឋិកា.

២២. សោបិ ពុទ្ធោ អសមសមោ, អសីតិហត្ថមុគ្គតោ;

សោភតេ សាលរាជាវ, ឧឡុរាជាវ បូរិតោ.

២៣. តស្ស បាកតិកា រំសី, អនេកសតកោដិយោ;

ឧទ្ធំ អធោ ទស ទិសា, ផរន្តិ យោជនំ សទា.

២៤. សោបិ ពុទ្ធោ នរាសភោ, សព្ពសត្តុត្តមោ មុនិ;

វស្សសតសហស្សានិ, លោកេ អដ្ឋាសិ ចក្ខុមា.

២៥. អតុលំ ទស្សេត្វា ឱភាសំ, វិរោចេត្វា សទេវកេ [អតុលំ ទស្សយិត្វាន, ឱភាសេត្វា សទេវកេ (សី. ក.)];

សោបិ អនិច្ចតំ បត្តោ, យថគ្គុបាទានសង្ខយា.

២៦. អត្ថទស្សី ជិនវរោ, អនោមារាមម្ហិ និព្ពុតោ;

ធាតុវិត្ថារិកំ អាសិ, តេសុ តេសុ បទេសតោតិ.

អត្ថទស្សិស្ស ភគវតោ វំសោ ចុទ្ទសមោ.