១៧. ធម្មទស្សីពុទ្ធវំសោ

១. តត្ថេវ មណ្ឌកប្បម្ហិ, ធម្មទស្សី មហាយសោ;

តមន្ធការំ វិធមិត្វា, អតិរោចតិ សទេវកេ.

២. តស្សាបិ អតុលតេជស្ស, ធម្មចក្កប្បវត្តនេ;

កោដិសតសហស្សានំ, បឋមាភិសមយោ អហុ.

៣. យទា ពុទ្ធោ ធម្មទស្សី, វិនេសិ សញ្ជយំ ឥសិំ;

តទា នវុតិកោដីនំ, ទុតិយាភិសមយោ អហុ.

៤. យទា សក្កោ ឧបាគញ្ឆិ, សបរិសោ វិនាយកំ;

តទា អសីតិកោដីនំ, តតិយាភិសមយោ អហុ.

៥. តស្សាបិ ទេវទេវស្ស, សន្និបាតា តយោ អហុំ [អាសុំ (សី. ស្យា.)];

ខីណាសវានំ វិមលានំ, សន្តចិត្តាន តាទិនំ.

៦. យទា ពុទ្ធោ ធម្មទស្សី, សរណេ វស្សំ ឧបាគមិ;

តទា កោដិសតសហស្សានំ [កោដិសហស្សានំ (សី. ស្យា. កំ.)], បឋមោ អាសិ សមាគមោ.

៧. បុនាបរំ យទា ពុទ្ធោ, ទេវតោ ឯតិ មានុសំ;

តទាបិ សតកោដីនំ, ទុតិយោ អាសិ សមាគមោ.

៨. បុនាបរំ យទា ពុទ្ធោ, បកាសេសិ ធុតេ គុណេ;

តទា អសីតិកោដីនំ, តតិយោ អាសិ សមាគមោ.

៩. អហំ តេន សមយេន, សក្កោ អាសិំ បុរិន្ទទោ;

ទិព្ពេន គន្ធមាលេន, តុរិយេនាភិបូជយិំ.

១០. សោបិ មំ ពុទ្ធោ ព្យាកាសិ, ទេវមជ្ឈេ និសីទិយ;

‘‘អដ្ឋារសេ កប្បសតេ, អយំ ពុទ្ធោ ភវិស្សតិ.

១១. ‘‘បធានំ បទហិត្វាន…បេ… ហេស្សាម សម្មុខា ឥមំ’’.

១២. តស្សាបិ វចនំ សុត្វា, ភិយ្យោ ចិត្តំ បសាទយិំ;

ឧត្តរិំ វតមធិដ្ឋាសិំ, ទសបារមិបូរិយា.

១៣. សរណំ នាម នគរំ, សរណោ នាម ខត្តិយោ;

សុនន្ទា នាម ជនិកា, ធម្មទស្សិស្ស សត្ថុនោ.

១៤. អដ្ឋវស្សសហស្សានិ, អគារំ អជ្ឈ សោ វសិ;

អរជោ វិរជោ សុទស្សនោ, តយោ បាសាទមុត្តមា.

១៥. តិចត្តារីសសហស្សានិ [ចត្តាលីសសហស្សានិ (ស្យា. កំ.)], នារិយោ សមលង្កតា;

វិចិកោឡិ នាម នារី, អត្រជោ បុញ្ញវឌ្ឍនោ.

១៦. និមិត្តេ ចតុរោ ទិស្វា, បាសាទេនាភិនិក្ខមិ;

សត្តាហំ បធានចារំ, អចរី បុរិសុត្តមោ.

១៧. ព្រហ្មុនា យាចិតោ សន្តោ, ធម្មទស្សី នរាសភោ;

វត្តិ ចក្កំ មហាវីរោ, មិគទាយេ នរុត្តមោ.

១៨. បទុមោ ផុស្សទេវោ ច, អហេសុំ អគ្គសាវកា;

សុនេត្តោ [សុទត្តោ (ស្យា. កំ.)] នាមុបដ្ឋាកោ, ធម្មទស្សិស្ស សត្ថុនោ.

១៩. ខេមា ច សច្ចនាមា ច, អហេសុំ អគ្គសាវិកា;

ពោធិ តស្ស ភគវតោ, ពិម្ពិជាលោតិ វុច្ចតិ.

២០. សុភទ្ទោ កដិស្សហោ ចេវ, អហេសុំ អគ្គុបដ្ឋកា;

សាឡិយា [សាលិសា (ស្យា. កំ.)] ច កឡិយា ច, អហេសុំ អគ្គុបដ្ឋិកា.

២១. សោបិ ពុទ្ធោ អសមសមោ, អសីតិហត្ថមុគ្គតោ;

អតិរោចតិ តេជេន, ទសសហស្សិម្ហិ ធាតុយា.

២២. សុផុល្លោ សាលរាជាវ, វិជ្ជូវ គគនេ យថា;

មជ្ឈន្ហិកេវ សូរិយោ, ឯវំ សោ ឧបសោភថ.

២៣. តស្សាបិ អតុលតេជស្ស, សមកំ អាសិ ជីវិតំ;

វស្សសតសហស្សានិ, លោកេ អដ្ឋាសិ ចក្ខុមា.

២៤. ឱភាសំ ទស្សយិត្វាន, វិមលំ កត្វាន សាសនំ;

ចវិ ចន្ទោវ គគនេ, និព្ពុតោ សោ សសាវកោ.

២៥. ធម្មទស្សី មហាវីរោ, សាលារាមម្ហិ និព្ពុតោ;

តត្ថេវស្ស ថូបវរោ, តីណិយោជនមុគ្គតោតិ.

ធម្មទស្សិស្ស ភគវតោ វំសោ បន្នរសមោ.