១៨. សិទ្ធត្ថពុទ្ធវំសោ

១. ធម្មទស្សិស្ស អបរេន, សិទ្ធត្ថោ នាម នាយកោ;

និហនិត្វា តមំ សព្ពំ, សូរិយោ អព្ភុគ្គតោ យថា.

២. សោបិ បត្វាន សម្ពោធិំ, សន្តារេន្តោ សទេវកំ;

អភិវស្សិ ធម្មមេឃេន, និព្ពាបេន្តោ សទេវកំ.

៣. តស្សាបិ អតុលតេជស្ស, អហេសុំ អភិសមយា តយោ;

កោដិសតសហស្សានំ, បឋមាភិសមយោ អហុ.

៤. បុនាបរំ ភីមរថេ [ហិមរដ្ឋេ (ក.)], យទា អាហនិ ទុន្ទុភិំ;

តទា នវុតិកោដីនំ, ទុតិយាភិសមយោ អហុ.

៥. យទា ពុទ្ធោ ធម្មំ ទេសេសិ, វេភារេ សោ បុរុត្តមេ;

តទា នវុតិកោដីនំ, តតិយាភិសមយោ អហុ.

៦. សន្និបាតា តយោ អាសុំ, តស្មិម្បិ ទ្វិបទុត្តមេ;

ខីណាសវានំ វិមលានំ, សន្តចិត្តាន តាទិនំ.

៧. កោដិសតានំ នវុតីនំ [នវុតិយា (ស្យា. កំ.)], អសីតិយាបិ ច កោដិនំ;

ឯតេ អាសុំ តយោ ឋានា, វិមលានំ សមាគមេ.

៨. អហំ តេន សមយេន, មង្គលោ នាម តាបសោ;

ឧគ្គតេជោ ទុប្បសហោ, អភិញ្ញាពលសមាហិតោ.

៩. ជម្ពុតោ ផលមានេត្វា [ផលមាហត្វា (សី. ស្យា.)] សិទ្ធត្ថស្ស អទាសហំ;

បដិគ្គហេត្វា សម្ពុទ្ធោ, ឥទំ វចនមព្រវិ.

១០. ‘‘បស្សថ ឥមំ តាបសំ, ជដិលំ ឧគ្គតាបនំ;

ចតុន្នវុតិតោ កប្បេ, អយំ ពុទ្ធោ ភវិស្សតិ.

១១. ‘‘បធានំ បទហិត្វាន…បេ… ហេស្សាម សម្មុខា ឥមំ’’.

១២. តស្សាបិ វចនំ សុត្វា, ភិយ្យោ ចិត្តំ បសាទយិំ;

ឧត្តរិំ វតមធិដ្ឋាសិំ, ទសបារមិបូរិយា.

១៣. វេភារំ នាម នគរំ, ឧទេនោ នាម ខត្តិយោ;

សុផស្សា នាម ជនិកា, សិទ្ធត្ថស្ស មហេសិនោ.

១៤. ទសវស្សសហស្សានិ, អគារំ អជ្ឈ សោ វសិ;

កោកាសុប្បលកោកនទា, តយោ បាសាទមុត្តមា.

១៥. តិសោឡសសហស្សានិ, នារិយោ សមលង្កតា;

សោមនស្សា នាម សា នារី, អនុបមោ នាម អត្រជោ.

១៦. និមិត្តេ ចតុរោ ទិស្វា, សិវិកាយាភិនិក្ខមិ;

អនូនទសមាសានិ, បធានំ បទហី ជិនោ.

១៧. ព្រហ្មុនា យាចិតោ សន្តោ, សិទ្ធត្ថោ លោកនាយកោ;

វត្តិ ចក្កំ មហាវីរោ, មិគទាយេ នរុត្តមោ.

១៨. សម្ពលោ ច សុមិត្តោ ច, អហេសុំ អគ្គសាវកា;

រេវតោ នាមុបដ្ឋាកោ, សិទ្ធត្ថស្ស មហេសិនោ.

១៩. សីវលា ច សុរាមា ច, អហេសុំ អគ្គសាវិកា;

ពោធិ តស្ស ភគវតោ, កណិការោតិ វុច្ចតិ.

២០. សុប្បិយោ ច សមុទ្ទោ ច, អហេសុំ អគ្គុបដ្ឋកា;

រម្មា ចេវ សុរម្មា ច, អហេសុំ អគ្គុបដ្ឋិកា.

២១. សោ ពុទ្ធោ សដ្ឋិរតនំ, អហោសិ នភមុគ្គតោ;

កញ្ចនគ្ឃិយសង្កាសោ, ទសសហស្សី វិរោចតិ.

២២. សោបិ ពុទ្ធោ អសមសមោ, អតុលោ អប្បដិបុគ្គលោ;

វស្សសតសហស្សានិ, លោកេ អដ្ឋាសិ ចក្ខុមា.

២៣. វិបុលំ បភំ ទស្សយិត្វា, បុប្ផាបេត្វាន សាវកេ;

វិលាសេត្វា សមាបត្យា, និព្ពុតោ សោ សសាវកោ.

២៤. សិទ្ធត្ថោ មុនិវរោ ពុទ្ធោ, អនោមារាមម្ហិ និព្ពុតោ;

តត្ថេវស្ស ថូបវរោ, ចតុយោជនមុគ្គតោតិ.

សិទ្ធត្ថស្ស ភគវតោ វំសោ សោឡសមោ.