១៩. តិស្សពុទ្ធវំសោ

១. សិទ្ធត្ថស្ស អបរេន, អសមោ អប្បដិបុគ្គលោ;

អនន្តតេជោ អមិតយសោ, តិស្សោ លោកគ្គនាយកោ.

២. តមន្ធការំ វិធមិត្វា, ឱភាសេត្វា សទេវកំ;

អនុកម្បកោ មហាវីរោ, លោកេ ឧប្បជ្ជិ ចក្ខុមា.

៣. តស្សាបិ អតុលា ឥទ្ធិ, អតុលំ សីលំ សមាធិ ច;

សព្ពត្ថ បារមិំ គន្ត្វា, ធម្មចក្កំ បវត្តយិ.

៤. សោ ពុទ្ធោ ទសសហស្សិម្ហិ, វិញ្ញាបេសិ គិរំ សុចិំ;

កោដិសតានិ អភិសមិំសុ, បឋមេ ធម្មទេសនេ.

៥. ទុតិយោ នវុតិកោដីនំ, តតិយោ សដ្ឋិកោដិយោ;

ពន្ធនាតោ បមោចេសិ, សត្តេ [សម្បត្តេ (ក.)] នរមរូ តទា.

៦. សន្និបាតា តយោ អាសុំ, តិស្សេ លោកគ្គនាយកេ;

ខីណាសវានំ វិមលានំ, សន្តចិត្តាន តាទិនំ.

៧. ខីណាសវសតសហស្សានំ, បឋមោ អាសិ សមាគមោ;

នវុតិសតសហស្សានំ, ទុតិយោ អាសិ សមាគមោ.

៨. អសីតិសតសហស្សានំ, តតិយោ អាសិ សមាគមោ;

ខីណាសវានំ វិមលានំ, បុប្ផិតានំ វិមុត្តិយា.

៩. អហំ តេន សមយេន, សុជាតោ នាម ខត្តិយោ;

មហាភោគំ ឆឌ្ឌយិត្វា, បព្ពជិំ ឥសិបព្ពជំ.

១០. មយិ បព្ពជិតេ សន្តេ, ឧប្បជ្ជិ លោកនាយកោ;

ពុទ្ធោតិ សទ្ទំ សុត្វាន, បីតិ មេ ឧបបជ្ជថ.

១១. ទិព្ពំ មន្ទារវំ បុប្ផំ, បទុមំ បារិឆត្តកំ;

ឧភោ ហត្ថេហិ បគ្គយ្ហ, ធុនមានោ ឧបាគមិំ.

១២. ចតុវណ្ណបរិវុតំ, តិស្សំ លោកគ្គនាយកំ;

តមហំ បុប្ផំ គហេត្វា, មត្ថកេ ធារយិំ ជិនំ.

១៣. សោបិ មំ ពុទ្ធោ ព្យាកាសិ, ជនមជ្ឈេ និសីទិយ;

‘‘ទ្វេនវុតេ ឥតោ កប្បេ, អយំ ពុទ្ធោ ភវិស្សតិ.

១៤. ‘‘បធានំ បទហិត្វាន…បេ… ហេស្សាម សម្មុខា ឥមំ’’.

១៥. តស្សាបិ វចនំ សុត្វា, ភិយ្យោ ចិត្តំ បសាទយិំ;

ឧត្តរិំ វតមធិដ្ឋាសិំ, ទសបារមិបូរិយា.

១៦. ខេមកំ នាម នគរំ, ជនសន្ធោ នាម ខត្តិយោ;

បទុមា នាម ជនិកា, តិស្សស្ស ច មហេសិនោ.

១៧. សត្តវស្សសហស្សានិ, អគារំ អជ្ឈ សោ វសិ;

គុហាសេល នារិសយ និសភា [កុមុទោ នាឡិយោ បទុមោ (ក.)], តយោ បាសាទមុត្តមា.

១៨. សមតិំសសហស្សានិ, នារិយោ សមលង្កតា;

សុភទ្ទានាមិកា នារី, អានន្ទោ នាម អត្រជោ.

១៩. និមិត្តេ ចតុរោ ទិស្វា, អស្សយានេន និក្ខមិ;

អនូនអដ្ឋមាសានិ, បធានំ បទហី ជិនោ.

២០. ព្រហ្មុនា យាចិតោ សន្តោ, តិស្សោ លោកគ្គនាយកោ;

វត្តិ ចក្កំ មហាវីរោ, យសវតិយមុត្តមេ.

២១. ព្រហ្មទេវោ ឧទយោ ច, អហេសុំ អគ្គសាវកា;

សមង្គោ នាមុបដ្ឋាកោ, តិស្សស្ស ច មហេសិនោ.

២២. ផុស្សា ចេវ សុទត្តា ច, អហេសុំ អគ្គសាវិកា;

ពោធិ តស្ស ភគវតោ, អសនោតិ បវុច្ចតិ.

២៣. សម្ពលោ ច សិរិមា ចេវ, អហេសុំ អគ្គុបដ្ឋកា;

កិសាគោតមី ឧបសេនា, អហេសុំ អគ្គុបដ្ឋិកា.

២៤. សោ ពុទ្ធោ សដ្ឋិរតនោ, អហុ ឧច្ចត្តនេ ជិនោ;

អនូបមោ អសទិសោ, ហិមវា វិយ ទិស្សតិ.

២៥. តស្សាបិ អតុលតេជស្ស, អាយុ អាសិ អនុត្តរោ;

វស្សសតសហស្សានិ, លោកេ អដ្ឋាសិ ចក្ខុមា.

២៦. ឧត្តមំ បវរំ សេដ្ឋំ, អនុភោត្វា មហាយសំ;

ជលិត្វា អគ្គិក្ខន្ធោវ, និព្ពុតោ សោ សសាវកោ.

២៧. វលាហកោវ អនិលេន, សូរិយេន វិយ ឧស្សវោ;

អន្ធការោវ បទីបេន, និព្ពុតោ សោ សសាវកោ.

២៨. តិស្សោ ជិនវរោ ពុទ្ធោ, នន្ទារាមម្ហិ និព្ពុតោ;

តត្ថេវស្ស ជិនថូបោ, តីណិយោជនមុគ្គតោតិ.

តិស្សស្ស ភគវតោ វំសោ សត្តរសមោ.