២០. ផុស្សពុទ្ធវំសោ

១. តត្ថេវ មណ្ឌកប្បម្ហិ, អហុ សត្ថា អនុត្តរោ;

អនុបមោ អសមសមោ, ផុស្សោ លោកគ្គនាយកោ.

២. សោបិ សព្ពំ តមំ ហន្ត្វា, វិជដេត្វា មហាជដំ;

សទេវកំ តប្បយន្តោ, អភិវស្សិ អមតម្ពុនា.

៣. ធម្មចក្កំ បវត្តេន្តេ, ផុស្សេ នក្ខត្តមង្គលេ;

កោដិសតសហស្សានំ, បឋមាភិសមយោ អហុ.

៤. នវុតិសតសហស្សានំ, ទុតិយាភិសមយោ អហុ;

អសីតិសតសហស្សានំ, តតិយាភិសមយោ អហុ.

៥. សន្និបាតា តយោ អាសុំ, ផុស្សស្សាបិ មហេសិនោ;

ខីណាសវានំ វិមលានំ, សន្តចិត្តាន តាទិនំ.

៦. សដ្ឋិសតសហស្សានំ, បឋមោ អាសិ សមាគមោ;

បញ្ញាសសតសហស្សានំ, ទុតិយោ អាសិ សមាគមោ.

៧. ចត្តារីសសតសហស្សានំ, តតិយោ អាសិ សមាគមោ;

អនុបាទា វិមុត្តានំ, វោច្ឆិន្នបដិសន្ធិនំ.

៨. អហំ តេន សមយេន, វិជិតាវី នាម ខត្តិយោ;

ឆឌ្ឌយិត្វា មហារជ្ជំ, បព្ពជិំ តស្ស សន្តិកេ.

៩. សោបិ មំ ពុទ្ធោ ព្យាកាសិ, ផុស្សោ លោកគ្គនាយកោ;

‘‘ទ្វេនវុតេ ឥតោ កប្បេ, អយំ ពុទ្ធោ ភវិស្សតិ.

១០. ‘‘បធានំ បទហិត្វាន…បេ… ហេស្សាម សម្មុខា ឥមំ’’.

១១. តស្សាបិ វចនំ សុត្វា, ភិយ្យោ ចិត្តំ បសាទយិំ;

ឧត្តរិំ វតមធិដ្ឋាសិំ, ទសបារមិបូរិយា.

១២. សុត្តន្តំ វិនយញ្ចាបិ, នវង្គំ សត្ថុសាសនំ;

សព្ពំ បរិយាបុណិត្វា, សោភយិំ ជិនសាសនំ.

១៣. តត្ថប្បមត្តោ វិហរន្តោ, ព្រហ្មំ ភាវេត្វ ភាវនំ;

អភិញ្ញាសុ បារមិំ គន្ត្វា, ព្រហ្មលោកមគញ្ឆហំ.

១៤. កាសិកំ នាម នគរំ, ជយសេនោ នាម ខត្តិយោ;

សិរិមា នាម ជនិកា, ផុស្សស្សាបិ មហេសិនោ.

១៥. នវវស្សសហស្សានិ, អគារំ អជ្ឈ សោ វសិ;

គរុឡបក្ខ ហំស សុវណ្ណភារា, តយោ បាសាទមុត្តមា.

១៦. តិំសឥត្ថិសហស្សានិ, នារិយោ សមលង្កតា;

កិសាគោតមី នាម នារី, អនូបមោ នាម អត្រជោ.

១៧. និមិត្តេ ចតុរោ ទិស្វា, ហត្ថិយានេន និក្ខមិ;

ឆមាសំ បធានចារំ, អចរី បុរិសុត្តមោ.

១៨. ព្រហ្មុនា យាចិតោ សន្តោ, ផុស្សោ លោកគ្គនាយកោ;

វត្តិ ចក្កំ មហាវីរោ, មិគទាយេ នរុត្តមោ.

១៩. សុរក្ខិតោ ធម្មសេនោ, អហេសុំ អគ្គសាវកា;

សភិយោ នាមុបដ្ឋាកោ, ផុស្សស្សាបិ មហេសិនោ.

២០. ចាលា ច ឧបចាលា ច, អហេសុំ អគ្គសាវិកា;

ពោធិ តស្ស ភគវតោ, អាមណ្ឌោតិ បវុច្ចតិ.

២១. ធនញ្ចយោ វិសាខោ ច, អហេសុំ អគ្គុបដ្ឋកា;

បទុមា ចេវ នាគា ច, អហេសុំ អគ្គុបដ្ឋិកា.

២២. អដ្ឋបណ្ណាសរតនំ, សោបិ អច្ចុគ្គតោ មុនិ;

សោភតេ សតរំសីវ, ឧឡុរាជាវ បូរិតោ.

២៣. នវុតិវស្សសហស្សានិ, អាយុ វិជ្ជតិ តាវទេ;

តាវតា តិដ្ឋមានោ សោ, តារេសិ ជនតំ ពហុំ.

២៤. ឱវទិត្វា ពហូ សត្តេ, សន្តារេត្វា ពហូ ជនេ;

សោបិ សត្ថា អតុលយសោ, និព្ពុតោ សោ សសាវកោ.

២៥. ផុស្សោ ជិនវរោ សត្ថា, សេនារាមម្ហិ និព្ពុតោ;

ធាតុវិត្ថារិកំ អាសិ, តេសុ តេសុ បទេសតោតិ.

ផុស្សស្ស ភគវតោ វំសោ អដ្ឋារសមោ.