២១. វិបស្សីពុទ្ធវំសោ

១. ផុស្សស្ស ច អបរេន, សម្ពុទ្ធោ ទ្វិបទុត្តមោ;

វិបស្សី នាម នាមេន, លោកេ ឧប្បជ្ជិ ចក្ខុមា.

២. អវិជ្ជំ សព្ពំ បទាលេត្វា, បត្តោ សម្ពោធិមុត្តមំ;

ធម្មចក្កំ បវត្តេតុំ, បក្កាមិ ពន្ធុមតីបុរំ.

៣. ធម្មចក្កំ បវត្តេត្វា, ឧភោ ពោធេសិ នាយកោ;

គណនាយ ន វត្តព្ពោ, បឋមាភិសមយោ អហុ.

៤. បុនាបរំ អមិតយសោ, តត្ថ សច្ចំ បកាសយិ;

ចតុរាសីតិសហស្សានំ, ទុតិយាភិសមយោ អហុ.

៥. ចតុរាសីតិសហស្សានិ, សម្ពុទ្ធំ អនុបព្ពជុំ;

តេសមារាមបត្តានំ, ធម្មំ ទេសេសិ ចក្ខុមា.

៦. សព្ពាការេន ភាសតោ, សុត្វា ឧបនិសាទិនោ [ឧបនិស្សា ជិនោ (ស្យា. កំ.)];

តេបិ ធម្មវរំ គន្ត្វា, តតិយាភិសមយោ អហុ.

៧. សន្និបាតា តយោ អាសុំ, វិបស្សិស្ស មហេសិនោ;

ខីណាសវានំ វិមលានំ, សន្តចិត្តាន តាទិនំ.

៨. អដ្ឋសដ្ឋិសតសហស្សានំ, បឋមោ អាសិ សមាគមោ;

ភិក្ខុសតសហស្សានំ, ទុតិយោ អាសិ សមាគមោ.

៩. អសីតិភិក្ខុសហស្សានំ, តតិយោ អាសិ សមាគមោ;

តត្ថ ភិក្ខុគណមជ្ឈេ, សម្ពុទ្ធោ អតិរោចតិ.

១០. អហំ តេន សមយេន, នាគរាជា មហិទ្ធិកោ;

អតុលោ នាម នាមេន, បុញ្ញវន្តោ ជុតិន្ធរោ.

១១. នេកានំ នាគកោដីនំ, បរិវារេត្វានហំ តទា;

វជ្ជន្តោ ទិព្ពតុរិយេហិ, លោកជេដ្ឋំ ឧបាគមិំ.

១២. ឧបសង្កមិត្វា សម្ពុទ្ធំ, វិបស្សិំ លោកនាយកំ;

មណិមុត្តរតនខចិតំ, សព្ពាភរណវិភូសិតំ;

និមន្តេត្វា ធម្មរាជស្ស, សុវណ្ណបីឋមទាសហំ.

១៣. សោបិ មំ ពុទ្ធោ ព្យាកាសិ, សង្ឃមជ្ឈេ និសីទិយ;

‘‘ឯកនវុតិតោ កប្បេ, អយំ ពុទ្ធោ ភវិស្សតិ.

១៤. ‘‘អហុ កបិលវ្ហយា រម្មា, និក្ខមិត្វា តថាគតោ;

បធានំ បទហិត្វាន, កត្វា ទុក្ករការិកំ.

១៥. ‘‘អជបាលរុក្ខមូលស្មិំ, និសីទិត្វា តថាគតោ;

តត្ថ បាយាសំ បគ្គយ្ហ, នេរញ្ជរមុបេហិតិ.

១៦. ‘‘នេរញ្ជរាយ តីរម្ហិ, បាយាសំ អទ សោ ជិនោ;

បដិយត្តវរមគ្គេន, ពោធិមូលមុបេហិតិ.

១៧. ‘‘តតោ បទក្ខិណំ កត្វា, ពោធិមណ្ឌំ អនុត្តរោ;

អស្សត្ថមូលេ សម្ពោធិំ, ពុជ្ឈិស្សតិ មហាយសោ.

១៨. ‘‘ឥមស្ស ជនិកា មាតា, មាយា នាម ភវិស្សតិ;

បិតា សុទ្ធោទនោ នាម, អយំ ហេស្សតិ គោតមោ.

១៩. ‘‘អនាសវា វីតរាគា, សន្តចិត្តា សមាហិតា;

កោលិតោ ឧបតិស្សោ ច, អគ្គា ហេស្សន្តិ សាវកា;

អានន្ទោ នាមុបដ្ឋាកោ, ឧបដ្ឋិស្សតិមំ ជិនំ.

២០. ‘‘ខេមា ឧប្បលវណ្ណា ច, អគ្គា ហេស្សន្តិ សាវិកា;

អនាសវា វីតរាគា, សន្តចិត្តា សមាហិតា;

ពោធិ តស្ស ភគវតោ, អស្សត្ថោតិ បវុច្ចតិ.

២១. ‘‘ចិត្តោ ច ហត្ថាឡវកោ, អគ្គា ហេស្សន្តុបដ្ឋកា;

នន្ទមាតា ច ឧត្តរា, អគ្គា ហេស្សន្តុបដ្ឋិកា;

អាយុ វស្សសតំ តស្ស, គោតមស្ស យសស្សិនោ.

២២. ‘‘ឥទំ សុត្វាន វចនំ…បេ… ហេស្សាម សម្មុខា ឥមំ’’.

២៣. តស្សាហំ វចនំ សុត្វា, ភិយ្យោ ចិត្តំ បសាទយិំ;

ឧត្តរិំ វតមធិដ្ឋាសិំ, ទសបារមិបូរិយា.

២៤. នគរំ ពន្ធុមតី នាម, ពន្ធុមា នាម ខត្តិយោ;

មាតា ពន្ធុមតី នាម, វិបស្សិស្ស មហេសិនោ.

២៥. អដ្ឋវស្សសហស្សានិ, អគារំ អជ្ឈ សោ វសិ;

នន្ទោ សុនន្ទោ សិរិមា, តយោ បាសាទមុត្តមា.

២៦. តិចត្តារីសសហស្សានិ, នារិយោ សមលង្កតា;

សុទស្សនា នាម សា នារី, សមវត្តក្ខន្ធោ នាម អត្រជោ.

២៧. និមិត្តេ ចតុរោ ទិស្វា, រថយានេន និក្ខមិ;

អនូនអដ្ឋមាសានិ, បធានំ បទហី ជិនោ.

២៨. ព្រហ្មុនា យាចិតោ សន្តោ, វិបស្សី លោកនាយកោ;

វត្តិ ចក្កំ មហាវីរោ, មិគទាយេ នរុត្តមោ.

២៩. ខណ្ឌោ ច តិស្សនាមោ ច, អហេសុំ អគ្គសាវកា;

អសោកោ នាមុបដ្ឋាកោ, វិបស្សិស្ស មហេសិនោ.

៣០. ចន្ទា ច ចន្ទមិត្តា ច, អហេសុំ អគ្គសាវិកា;

ពោធិ តស្ស ភគវតោ, បាដលីតិ បវុច្ចតិ.

៣១. បុនព្ពសុមិត្តោ នាគោ ច, អហេសុំ អគ្គុបដ្ឋកា;

សិរិមា ឧត្តរា ចេវ, អហេសុំ អគ្គុបដ្ឋិកា.

៣២. អសីតិហត្ថមុព្ពេធោ, វិបស្សី លោកនាយកោ;

បភា និទ្ធាវតិ តស្ស, សមន្តា សត្តយោជនេ.

៣៣. អសីតិវស្សសហស្សានិ, អាយុ ពុទ្ធស្ស តាវទេ;

តាវតា តិដ្ឋមានោ សោ, តារេសិ ជនតំ ពហុំ.

៣៤. ពហុទេវមនុស្សានំ, ពន្ធនា បរិមោចយិ;

មគ្គាមគ្គញ្ច អាចិក្ខិ, អវសេសបុថុជ្ជនេ.

៣៥. អាលោកំ ទស្សយិត្វាន, ទេសេត្វា អមតំ បទំ;

ជលិត្វា អគ្គិក្ខន្ធោវ, និព្ពុតោ សោ សសាវកោ.

៣៦. ឥទ្ធិវរំ បុញ្ញវរំ, លក្ខណញ្ច កុសុមិតំ;

សព្ពំ តមន្តរហិតំ, ននុ រិត្តា សព្ពសង្ខារា.

៣៧. វិបស្សី ជិនវរោ ពុទ្ធោ, សុមិត្តារាមម្ហិ និព្ពុតោ;

តត្ថេវស្ស ថូបវរោ, សត្តយោជនមុស្សិតោតិ.

វិបស្សិស្ស ភគវតោ វំសោ ឯកូនវីសតិមោ.