២២. សិខីពុទ្ធវំសោ

១. វិបស្សិស្ស អបរេន, សម្ពុទ្ធោ ទ្វិបទុត្តមោ;

សិខិវ្ហយោ អាសិ ជិនោ, អសមោ អប្បដិបុគ្គលោ.

២. មារសេនំ បមទ្ទិត្វា, បត្តោ សម្ពោធិមុត្តមំ;

ធម្មចក្កំ បវត្តេសិ, អនុកម្បាយ បាណិនំ.

៣. ធម្មចក្កំ បវត្តេន្តេ, សិខិម្ហិ ជិនបុង្គវេ [មុនិបុង្គវេ (សី.)];

កោដិសតសហស្សានំ, បឋមាភិសមយោ អហុ.

៤. អបរម្បិ ធម្មំ ទេសេន្តេ, គណសេដ្ឋេ នរុត្តមេ;

នវុតិកោដិសហស្សានំ, ទុតិយាភិសមយោ អហុ.

៥. យមកបាដិហារិយញ្ច [យមកំ បាដិហីរញ្ច (សី.)], ទស្សយន្តេ សទេវកេ;

អសីតិកោដិសហស្សានំ, តតិយាភិសមយោ អហុ.

៦. សន្និបាតា តយោ អាសុំ, សិខិស្សាបិ មហេសិនោ;

ខីណាសវានំ វិមលានំ, សន្តចិត្តាន តាទិនំ.

៧. ភិក្ខុសតសហស្សានំ, បឋមោ អាសិ សមាគមោ;

អសីតិភិក្ខុសហស្សានំ, ទុតិយោ អាសិ សមាគមោ.

៨. សត្តតិភិក្ខុសហស្សានំ, តតិយោ អាសិ សមាគមោ;

អនុបលិត្តោ បទុមំវ, តោយម្ហិ សម្បវឌ្ឍិតំ.

៩. អហំ តេន សមយេន, អរិន្ទមោ នាម ខត្តិយោ;

សម្ពុទ្ធប្បមុខំ សង្ឃំ, អន្នបានេន តប្បយិំ.

១០. ពហុំ ទុស្សវរំ ទត្វា, ទុស្សកោដិំ អនប្បកំ;

អលង្កតំ ហត្ថិយានំ, សម្ពុទ្ធស្ស អទាសហំ.

១១. ហត្ថិយានំ និម្មិនិត្វា, កប្បិយំ ឧបនាមយិំ;

បូរយិំ មានសំ មយ្ហំ, និច្ចំ ទឡ្ហមុបដ្ឋិតំ.

១២. សោបិ មំ ពុទ្ធោ ព្យាកាសិ, សិខី លោកគ្គនាយកោ;

‘‘ឯកតិំសេ ឥតោ កប្បេ, អយំ ពុទ្ធោ ភវិស្សតិ.

១៣. ‘‘អហុ កបិលវ្ហយា រម្មា…បេ… ហេស្សាម សម្មុខា ឥមំ’’.

១៤. តស្សាហំ វចនំ សុត្វា, ភិយ្យោ ចិត្តំ បសាទយិំ;

ឧត្តរិំ វតមធិដ្ឋាសិំ, ទសបារមិបូរិយា.

១៥. នគរំ អរុណវតី នាម, អរុណោ នាម ខត្តិយោ;

បភាវតី នាម ជនិកា, សិខិស្សាបិ មហេសិនោ.

១៦. សត្តវស្សសហស្សានិ, អគារំ អជ្ឈ សោ វសិ;

សុចន្ទកោ គិរិ វសភោ [សុចន្ទោ គិរិវហនោ (សី.)], តយោ បាសាទមុត្តមា.

១៧. ចតុវីសសហស្សានិ, នារិយោ សមលង្កតា;

សព្ពកាមា នាម នារី, អតុលោ នាម អត្រជោ.

១៨. និមិត្តេ ចតុរោ ទិស្វា, ហត្ថិយានេន និក្ខមិ;

អដ្ឋមាសំ បធានចារំ, អចរី បុរិសុត្តមោ.

១៩. ព្រហ្មុនា យាចិតោ សន្តោ, សិខី លោកគ្គនាយកោ;

វត្តិ ចក្កំ មហាវីរោ, មិគទាយេ នរុត្តមោ.

២០. អភិភូ សម្ភវោ ចេវ, អហេសុំ អគ្គសាវកា;

ខេមង្ករោ នាមុបដ្ឋាកោ, សិខិស្សាបិ មហេសិនោ.

២១. សខិលា ច បទុមា ច, អហេសុំ អគ្គសាវិកា;

ពោធិ តស្ស ភគវតោ, បុណ្ឌរីកោតិ វុច្ចតិ.

២២. សិរិវឌ្ឍោ ច នន្ទោ ច, អហេសុំ អគ្គុបដ្ឋកា;

ចិត្តា ចេវ សុគុត្តា ច, អហេសុំ អគ្គុបដ្ឋិកា.

២៣. ឧច្ចត្តនេន សោ ពុទ្ធោ, សត្តតិហត្ថមុគ្គតោ;

កញ្ចនគ្ឃិយសង្កាសោ, ទ្វត្តិំសវរលក្ខណោ.

២៤. តស្សាបិ ព្យាមប្បភា កាយា, ទិវារត្តិំ និរន្តរំ;

ទិសោទិសំ និច្ឆរន្តិ, តីណិយោជនសោ បភា.

២៥. សត្តតិវស្សសហស្សានិ, អាយុ តស្ស មហេសិនោ;

តាវតា តិដ្ឋមានោ សោ, តារេសិ ជនតំ ពហុំ.

២៦. ធម្មមេឃំ បវស្សេត្វា, តេមយិត្វា សទេវកេ;

ខេមន្តំ បាបយិត្វាន, និព្ពុតោ សោ សសាវកោ.

២៧. អនុព្យញ្ជនសម្បន្នំ, ទ្វត្តិំសវរលក្ខណំ;

សព្ពំ តមន្តរហិតំ, ននុ រិត្តា សព្ពសង្ខារា.

២៨. សិខី មុនិវរោ ពុទ្ធោ, អស្សារាមម្ហិ និព្ពុតោ;

តត្ថេវស្ស ថូបវរោ, តីណិយោជនមុគ្គតោតិ.

សិខិស្ស ភគវតោ វំសោ វីសតិមោ.