២៣. វេស្សភូពុទ្ធវំសោ

១. តត្ថេវ មណ្ឌកប្បម្ហិ, អសមោ អប្បដិបុគ្គលោ;

វេស្សភូ នាម នាមេន, លោកេ ឧប្បជ្ជិ នាយកោ [សោ ជិនោ (ស្យា. កំ. ក.)].

២. អាទិត្តំ វត រាគគ្គិ, តណ្ហានំ វិជិតំ តទា;

នាគោវ ពន្ធនំ ឆេត្វា, បត្តោ សម្ពោធិមុត្តមំ.

៣. ធម្មចក្កំ បវត្តេន្តេ, វេស្សភូលោកនាយកេ;

អសីតិកោដិសហស្សានំ, បឋមាភិសមយោ អហុ.

៤. បក្កន្តេ ចារិកំ រដ្ឋេ, លោកជេដ្ឋេ នរាសភេ;

សត្តតិកោដិសហស្សានំ, ទុតិយាភិសមយោ អហុ.

៥. មហាទិដ្ឋិំ វិនោទេន្តោ, បាដិហេរំ ករោតិ សោ;

សមាគតា នរមរូ, ទសសហស្សី សទេវកេ.

៦. មហាអច្ឆរិយំ ទិស្វា, អព្ភុតំ លោមហំសនំ;

ទេវា ចេវ មនុស្សា ច, ពុជ្ឈរេ សដ្ឋិកោដិយោ.

៧. សន្និបាតា តយោ អាសុំ, វេស្សភុស្ស មហេសិនោ;

ខីណាសវានំ វិមលានំ, សន្តចិត្តាន តាទិនំ.

៨. អសីតិភិក្ខុសហស្សានំ, បឋមោ អាសិ សមាគមោ;

សត្តតិភិក្ខុសហស្សានំ, ទុតិយោ អាសិ សមាគមោ.

៩. សដ្ឋិភិក្ខុសហស្សានំ, តតិយោ អាសិ សមាគមោ;

ជរាទិភយភីតានំ, ឱរសានំ មហេសិនោ.

១០. អហំ តេន សមយេន, សុទស្សនោ នាម ខត្តិយោ;

និមន្តេត្វា មហាវីរំ, ទានំ ទត្វា មហារហំ;

អន្នបានេន វត្ថេន, សសង្ឃំ ជិន បូជយិំ.

១១. តស្ស ពុទ្ធស្ស អសមស្ស, ចក្កំ វត្តិតមុត្តមំ;

សុត្វាន បណិតំ ធម្មំ, បព្ពជ្ជមភិរោចយិំ.

១២. មហាទានំ បវត្តេត្វា, រត្តិន្ទិវមតន្ទិតោ;

បព្ពជ្ជំ គុណសម្បន្នំ, បព្ពជិំ ជិនសន្តិកេ.

១៣. អាចារគុណសម្បន្នោ, វត្តសីលសមាហិតោ;

សព្ពញ្ញុតំ គវេសន្តោ, រមាមិ ជិនសាសនេ.

១៤. សទ្ធាបីតិំ ឧបគន្ត្វា, ពុទ្ធំ វន្ទាមិ សត្ថរំ;

បីតិ ឧប្បជ្ជតិ មយ្ហំ, ពោធិយាយេវ ការណា.

១៥. អនិវត្តមានសំ ញត្វា, សម្ពុទ្ធោ ឯតទព្រវិ;

‘‘ឯកតិំសេ ឥតោ កប្បេ, អយំ ពុទ្ធោ ភវិស្សតិ.

១៦. ‘‘អហុ កបិលវ្ហយា រម្មា…បេ… ហេស្សាម សម្មុខា ឥមំ’’.

១៧. តស្សាហំ វចនំ សុត្វា, ភិយ្យោ ចិត្តំ បសាទយិំ;

ឧត្តរិំ វតមធិដ្ឋាសិំ, ទសបារមិបូរិយា.

១៨. អនោមំ នាម នគរំ, សុប្បតីតោ នាម ខត្តិយោ;

មាតា យសវតី នាម, វេស្សភុស្ស មហេសិនោ.

១៩. ឆ ច វស្សសហស្សានិ, អគារំ អជ្ឈ សោ វសិ;

រុចិ សុរុចិ រតិវឌ្ឍនោ, តយោ បាសាទមុត្តមា.

២០. អនូនតិំសសហស្សានិ, នារិយោ សមលង្កតា;

សុចិត្តា នាម សា នារី, សុប្បពុទ្ធោ នាម អត្រជោ.

២១. និមិត្តេ ចតុរោ ទិស្វា, សិវិកាយាភិនិក្ខមិ;

ឆមាសំ បធានចារំ, អចរី បុរិសុត្តមោ.

២២. ព្រហ្មុនា យាចិតោ សន្តោ, វេស្សភូលោកនាយកោ;

វត្តិ ចក្កំ មហាវីរោ, អរុណារាមេ នរុត្តមោ.

២៣. សោណោ ច ឧត្តរោ ចេវ, អហេសុំ អគ្គសាវកា;

ឧបសន្តោ នាមុបដ្ឋាកោ, វេស្សភុស្ស មហេសិនោ.

២៤. រាមា [ទាមា (សី.)] ចេវ សមាលា ច, អហេសុំ អគ្គសាវិកា;

ពោធិ តស្ស ភគវតោ, មហាសាលោតិ វុច្ចតិ.

២៥. សោត្ថិកោ ចេវ រម្ភោ ច, អហេសុំ អគ្គុបដ្ឋកា;

គោតមី សិរិមា ចេវ, អហេសុំ អគ្គុបដ្ឋិកា.

២៦. សដ្ឋិរតនមុព្ពេធោ, ហេមយូបសមូបមោ;

កាយា និច្ឆរតិ រស្មិ, រត្តិំវ បព្ពតេ សិខី.

២៧. សដ្ឋិវស្សសហស្សានិ, អាយុ តស្ស មហេសិនោ;

តាវតា តិដ្ឋមានោ សោ, តារេសិ ជនតំ ពហុំ.

២៨. ធម្មំ វិត្ថារិកំ កត្វា, វិភជិត្វា មហាជនំ;

ធម្មនាវំ ឋបេត្វាន, និព្ពុតោ សោ សសាវកោ.

២៩. ទស្សនេយ្យំ សព្ពជនំ, វិហារំ ឥរិយាបថំ;

សព្ពំ តមន្តរហិតំ, ននុ រិត្តា សព្ពសង្ខារា.

៣០. វេស្សភូ ជិនវរោ សត្ថា, ខេមារាមម្ហិ និព្ពុតោ;

ធាតុវិត្ថារិកំ អាសិ, តេសុ តេសុ បទេសតោតិ.

វេស្សភុស្ស ភគវតោ វំសោ ឯកវីសតិមោ.